Charles Peter Mayiga

Katikkiro (Prime Minister) of the Kingdom of Buganda (@BugandaKingdom_). Personal posts end with CPM.

[Charles Peter Mayiga @cpmayiga]

Omuk. Fabian Kasi ne mukyala we Rita Kasi bajaguza emyaka 25 mu bufumbo, tubayozaayoza nnyo okutuuka ku kkula lino.

Abajaguza nga bongera okukuumagana, basaana okweyubula, bye bayiseemu mu myaka 25 nga bibakooya babireke, banyweze ebibasanyusa. Olw'okuba banywedde mu bufumbo, ate twesunga okwongera okulaba obuweereza bwabwe obulungi eri Obwakabaka ne Uganda okutwaliza awamu.

Mu kujaguza kwabwe, ntongozza n'ekitabo ekyawandiikiddwa Omuk. Kasi kye yatuuma 'Entrusted', yawandiise kw'ebyo by'ayiseemu, obukugu bwe, obukulembeze n'ebirala, okugabanako amagezi n'abalala.

[Charles Peter Mayiga @cpmayiga]

Obufumbo busaana kuyingiramu n'oyo bwemwetegeera obulungi era nga mukwano gwo, bwe mubeera nga mumanyiganye bulungi obufumbo bubanguyira.

Nkulisa Keith Mugisha ne Karungi Kajura abagattiddwa empeta leero mu kkanisa y'Omutukuvu Stefano Kisugu, tubaagaliza obufumbo obulungi.

Njozaayoza ne Kenneth Wycliff Mugisha eyaliko Governor wa Rotary, azaala Keith olw'okutuuka ku kkula ly'okulaba omwana ng'akula era ng'atandika amaka.

[Charles Peter Mayiga @cpmayiga]

Nkyaddeko mu Ttaba, Butozi, okulamusa ku bakojjange/bammange wamu ne Jjajja Teo Nakalema (abazaala) olw'okufiirwa Kojja Andrew Lubega Mulindwa, eyafiira mu kkuumiro ly'ebisolo erya Murchison Falls oluvannyuma lw'enjovu okusesebbula emmotoka mwe yali atambulira n'abantu abalala.

Kojja Lubega yali musomesa mu Mengo SSS ne Mackay College, Nateete.
Mukama amuwummuze mirembe. CPM

[Charles Peter Mayiga @cpmayiga]

Owek. Vincent Mayiga ne mukyala we Rosemary Bella Namutosi Mayiga ekijjulo ky'okujaguza emyaka 50 mu bufumbo, bakitugabulidde ku Nabisere Hotel e Kaliisizo.

Emyaka 50 mu bufumbo ssi kyangu olw'ebisoomooza eby'enjawulo ebibaawo, kale bannaffe bano tubeebaza obugumiikiriza n'obuvumu, era kirungi bajaguze.

Abavubuka bangi ensangi balemwa obufumbo lwa nsonga enkulu bbiri; obutiitizi, n'okwagala eby'amangu. Tewali kyangu mu bulamu kyokka abo abafunvubira okwaŋŋanga embeera, bamala ne bawangula, nga bwe tulaba abajaguza bano.

Oweek. Vincent Mayiga ne Rose Mayiga, kyakulabirako kirungi, eri ffenna era tubasabira Katonda ayongere okubakuuma.

[Charles Peter Mayiga @cpmayiga]

Nkulisa mukulu wange, Oweek. Vincent Mayiga ne mukyala we Rosemary Bella Namutosi Mayiga okuweza emyaka 50 mu bufumbo.

Mu Buganda, obufumbo nsonga nkulu nnyo kubanga bwe bukola amaka amateefu, mwe tukuliza abaana mu mpisa ennungi ez’obuntubulamu.

Mu kwolesebwa kwaffe okw'okuzza Buganda ku ntikko, amaka amalungi nsonga nkulu, ate nga geesigama ku buwangaazi bwa bufumbo. Bannaffe bano tubayozaayoza nnyo naddala olw'ebibala by'obufumbo bwabwe, naddala abaana abagunjuddwa obulungi.

[Charles Peter Mayiga @cpmayiga]

Nkedde mu Ekeleziya y’Omutukuvu Andereya e Matale, Kaliisizo mu Buddu okwetaba mu mmisa y’ekijaguzo eky’emyaka 50 egy'obufumbo bw’eyaliko Omwami wa Ssaabasajja Kabaka ow’essaza Buddu Pookino Vincent Mayiga.

[Charles Peter Mayiga @cpmayiga]

*mulimu

[Charles Peter Mayiga @cpmayiga]

Ekisaawe ky'Essaza Buddu kijja kuyitibwanga “Kabaka Daudi Chwa II EACOP Stadium Buddu”, leero ntemye evvuunike ku ttaka ewagenda okuzimbibwa ekisaawe kino era mu butongole omulimu gutandise.

Kabaka Daudi Chwa II, ye Pulezidenti wa FUFA eyasooka mu Uganda mu 1924, ye yawaayo n'ettaka okuli ekitebe kya FUFA e Mmengo. Tusaanidde okumujjukiranga nadala kati nga muzzukulu we Kabaka Mutebi II aweza emyaka 33 ku Nnamulondo.

Ekimu ku bikonzibya eby’emizannyo mu Uganda bbula lya bisaawe, kirungi tutandise kati, era nneebaza Minisitule y’Obuggaga obw’omuttaka, EACOP, Oceans General Holdings Limited, ne kkampuni endala ze tukwataganye nazo ku mulimi guno.
#Amatikkira33

[Charles Peter Mayiga @cpmayiga]

Ntuuse mirembe e Buddu ku kitebe ky’essaza okutema evvuunike, okuggulawo omulimu gw’okuzimba ekisaawe ky’essaza Buddu ekijja okutuumibwa “Kabaka Daudi Chwa II EACOP Stadium”.

Okutema evvuunike y'emu ku nteekateeka z'okujaguza Amatikkira ga Kabaka omulundi ogwa 33.

#Amatikkira33

[Charles Peter Mayiga @cpmayiga]

Enkya ya leero mu Bulange, nsisinkanye Abeekika kya Nnyonyi Nnyange nga bakulembeddwamu Omukulu w'Ekika, Omutaka Mbaziira Kakooto Frank Kisaala, mbategeezezza nti Kabaka yantuma gye bali ku nsonga y'okuzzaawo ekyoto bbungu mu Lubiri e Mmengo.

Banyanjulidde Olukiiko olwalondebwa okukola ku nsonga eno, era ndutongozza okulaba nti omulimu guno gugguka mu bwangu ddala olw'obukulu bwagwo mu nnono za Buganda.

Bbungukalyomu, kyoto ekikumibwa Abayange, era ku kyoto kino Kabaka kw'agabira entabaalo. Wewaawo tetukyalina ntabaalo za mafumu, naye era ku mulembe guno Kabaka atuma basajja be ku ntabaalo nnyingi okugeza; okugoba obwavu mu Buganda, okulwanyisa mukenenya, okutumbula ebyenjigiriza n'endala.

Kale omulimu guno mukulu nnyo era gunyweza ennono zaffe.

[Charles Peter Mayiga @cpmayiga]

@MaserukaRobert

[Charles Peter Mayiga @cpmayiga]

Omubaka wa Mukono South, Hon. @MaserukaRobert ankyaliddeko leero mu Bulange, ne tunyumyamu ku nsonga ez’enjawulo.

Ng'omuvubuka omuto abantu gwe beesigikisa akalulu okubakulembera, musabye okubeera omwesigwa obutayiwaayo bantu baamulonda, asoosowaze ensonga z'abantu b'akulembera, abaweereze mu bwerufu, n'obuvumu ate era mu bwegendereza.

Mmwebaza okukiikanga Embuga era mmusabye okuteeka ku mwanjo ensonga za Buganda n'okulwanirira omugabo gwaffe ebbanga lyonna.

Tumwagaliza obuweereza obulungi🙏

[Charles Peter Mayiga @cpmayiga]

Obulimi n'Obulunzi birimu ssente kasita owaayo obudde, wabula mpulira nnyo abantu abagamba nti okulima kuzibu, bangi ku bano bayingira obulimi n'obulunzi nga tebetegese kuwaayo budde kulambula bye balima.

Tewali kintu ky'oyinza kufunamu okuggyako ng'okyemaliddemu, kyetuva tukubiriza abantu okulimira ku mutindo basobole okufuna mu maanyi gaabwe.

Leero nnambudde Mw. Latima Kagimu Mukasa omulimi w'emmwanyi e Kabunyata, Kamira mu Bulemeezi, alina emmwanyi ku yiika 70 n'okusoba, alina n'ekyuma ekizisunsula ate mulunzi. Bino byonna abikolera wamu ne mukyala we n'abaana. Buli kyebakola bakolera ku mutindo era ebibala babirako kati. Kino kituzzaamu amaanyi.

Temulima kutuusa mukolo oba kugezaako, bw'osalawo okuyingira obulimi n'obulunzi malirira era okolere ku mutindo. #SitulaOmutindo