لو طوّلت في الجدال مع شخص حمار، الناس من بره مش هتعرف تفرق بينكم وهتشوف اتنين بينهقوا.. ده غير إنه هيخليك تنزل لمستواه، وهناك هو اللي هيغلبك بخبرته في الحمورية..
الأديب "جورج برنارد شو" قال: (المجادلة مع الناس الأغبياء تشب�� قتل بعوضة وقفت على خدك قد تقتلها أو لا تقتلها لكن في كلتا الحالتين سينتهي الأمر بك أن تصفع نفسك).
عايزين نفكر نفسنا من وقت للتاني إن اللي هتوافق تعمله عشان اتكسفت في مرة، هيعتبروه فرض عليك وهيطلبوه منك كل مرة..
التنازلات بتجيب تنازلات، واللي هتيجي على نفسك عشانه قيراط هيطمع في الفدان..
تتكسف مرة واحدة وأنت بتقول "لأ"، أحسن ما تتكسف العمر كله وأنت بتقول "حاضر"..
اللي مش بيحط لنفسه تمن الناس بتسترخصه.
مع كل يوم بيفوت بتكبر أكتر، وبتتعلم أكتر إن الكنز الحقيقي في إن صحتك، وعلاقتك بربنا، ودايرتك القريبة القليلة جداً يكونوا بخير..
دول أهم، وأغلى، وأقيم حاجات يستحقوا يحتلوا كل أولوياتك واللي لو خسرت واحدة منهم خسارتك بتبقى مضاعفة..
باقي ما باقي سواء ناس أو أماكن والله ما مهمين وبيتعوضوا.
مش كل انسحاب هزيمة..
ساعات المكسب الحقيقي بيبقى في إنك تنسحب، وتسيب، وتبعد مش تفضل، وتاخد، وتقرب..
مش كل المعارك تستحق الخوض، ولا كل منسحب لازم يكون جبان.
الأذية هي أبشع فعل بشري، والإنسان اللي هيقدر يضرك بأي تصرف عمره ما كان بيحبك في يوم، مهما حلف إنه ما يقصدش، أو كان مضطر، أو كان مجبور..
والله لو إيه؛ مستحيل الحب والأذى يجتمعوا في قلب نفس الشخص.