Top Tweets for #devide

HABARI: Wanachama wa Umoja wa Walimu Wasiokuwa na Ajira nchini Tanzania (NETO) wametoa msimamo wao rasmi, wakieleza kusikitishwa na kile wanachokiita "usaliti" wa viongozi wa umoja huo katika harakati za kudai ajira. Wamepinga na kujitenga na misimamo ya viongozi hao, hasa baada ya kukutana kwao na Serikali jijini Dodoma. Kwa mujibu wa taarifa yao kwa umma, wanachama wa NETO wamesema wameamua kujitenga na uongozi huo na badala yake kuanzisha vuguvugu jipya la kudai ajira lijulikanalo kama "NETO Members Movement." Wamesisitiza kuwa harakati zao zitaendelea kwa nguvu zaidi, wakidai haki ya kuajiriwa kwa uwazi na kwa kuzingatia vigezo vya muda wa kuhitimu masomo. Wanachama hao wamesisitiza kuwa hawawatambui wale wanaojiita viongozi wa NETO waliokwenda kuonana na Serikali kupitia Waziri wa Nchi, Ofisi ya Rais – Menejimenti ya Utumishi wa Umma na Utawala Bora, Mhe. George Simbachawebe. Wamedai kuwa msimamo wao tangu mwanzo ulikuwa ni kutaka Serikali ikutane na walimu wote wasiokuwa na ajira nchini, badala ya kundi dogo la watu wachache waliokwenda kwa niaba yao bila ridhaa yao. Viongozi wa NETO Wadaiwa Kujipatia Vyeo Bila Uchaguzi Wanachama hao wamedai kuwa hakuna uchaguzi wowote uliowahi kufanyika wa kuwachagua viongozi wa NETO, iwe kwa njia ya mtandao au kwa mkutano wa hadhara. Kwa mujibu wa taarifa yao, wanaojiita viongozi ni watu waliowajitwika vyeo wao wenyewe bila kupata idhini ya walimu walio wengi. Aidha, wamefafanua kuwa NETO ni vuguvugu la kudai ajira (movement) na si taasisi rasmi yenye uongozi maalum. Wanaamini kuwa muundo huo utasaidia kuendeleza madai yao kwa nguvu, pasipo nafasi ya watu wachache kunyamazishwa au kurubuniwa. Wanachama wa NETO wametaka Serikali itangaze ajira mpya za walimu kati ya elfu 60 hadi laki moja, kwa kuzingatia mwaka wa kuhitimu. Wameitaka Serikali kuhakikisha ajira hizo zinatolewa kabla ya kuvunjwa kwa Bunge na kuanza kwa mchakato wa Uchaguzi Mkuu wa mwaka 2025. "Tunataka kuajiriwa, siyo kufanya mazungumzo au maridhiano. Serikali ina uwezo wa kutuajiri. Baadhi yetu tumekuwa mtaani kwa zaidi ya miaka 10 bila ajira, hivyo maridhiano ya 4Rs hayawezi kuwa suluhisho la tatizo hili. Kufanya mazungumzo bila kutoa ajira si tiba kwetu," inasema sehemu ya taarifa hiyo. Pia, walimu hao wametoa ombi la kutaka kukutana na Rais wa Jamhuri ya Muungano wa Tanzania, Mhe. Dkt. Samia Suluhu Hassan, katika mkutano wa wazi, kama ambavyo amekuwa akikutana na wananchi kwenye sherehe na matamasha mbalimbali. Walimu hao wamewataka viongozi wa NETO kutoa taarifa ya matumizi ya zaidi ya shilingi milioni 5 zilizochangwa na wanachama kwa ajili ya kusaidia watoto wenye mahitaji maalum. Wamedai kuwa fedha hizo zimetumiwa kinyume na makusudio bila uwazi wala maelezo kwa wanachama. "Tunalaani kwa kauli moja matamshi ya baadhi ya viongozi wakubwa wa Serikali wanaowashauri walimu wajiendeleze baada ya kuhitimu au vijana waliomaliza vyuo vikuu waende VETA. Tunaona kauli hizi kama dharau na matusi kwa watoto wa maskini waliopata elimu katika mazingira magumu," wamesema. Mwisho, NETO imeitaka Serikali kutatua tatizo la ajira badala ya kulihamisha, huku wakiwaomba wazazi wote nchini kuwaunga mkono katika harakati zao za kudai ajira.