يا أوفى ويا أحب من بادر ومن واصل
وأعز من شيمتي وأطيب من ظنوني
وجودك يداوي جروحي ويستاصل
الضيقه اللي تحجب النور من دوني
أحاول انه ما يفصل بيننا فاصل
حتى لو ان ينفصل راسي عن متوني
أشر على ما تبي واللي تبي حاصل
حتى لو تطلب عيوني من عيوني
يا طيب حظي كان أنا حلم دنياك
ياللي تقول اني أمانك وخوفك
تحبني أدري حكى لي محياك
رعشة يدينك وأرتباكة حروفك
ياللي الوفا هو بعض أصغر مزاياك
حملي ثقيل و وافياتٍ كتوفك
وشلون ما أحبك وهذي سواياك
وشلون ما أهديك عمري بكفوفك