بقى في خاطري من غيبتك ضحكه ولذّ عناق
متى تنفض غبار المقبره عنك وتأتيني ؟
وقفت أبكي على أطلال الّليالي عقب طول فراق
ولا خلّيت قبرك وأنت لك مدّه مخلّيني
أنا ما أجزع من أقداري وقلبي يوم حنّ وضاق
إلى هالحين ينسى بأن ما أنت بباقي سنيني .
في رفوف القلب ما غيرك لحالك
قاسمه بينك وبين أبوي وأمّي
اجرح
اذبح
سوّ فيني ما بدا لك
دام عينك قبل لا تجرح تسمّي
كل عيد أمنّي النفس بقبالك
والعياد تروح وأنت أُنسي وغمّي
خوفي أعيّد على غالي عيالك
وأنت أبعد من منى نفسي لضمّي .
خدينة الإحساس : ليل التباريح
مر وسأل عيني عن آخر جديدك
ما خلفك إلا وجد ناسٍ مجاريح
ولا قدمك إلا صبحٍ يزفّ جيدك❣️
أنتي غريبه ما يكفيك تلميح
ولا فكت أبواب الطواريق قيدك
وأنا القديم اللي ما يحتاج توضيح
أبطى الزمن ما جاب له صبح عيدك .
— مشاري محمد .