ليلة البارح .. مشاكلها طويله
ودي اعلمك لكن كيف اعلّم
المظاليل الكحيلّه و الكحيلْه
من ملك ثنتينها ليه يتحلّم ؟
علم اللي وده يحط الجميله
في ولد عمه وعمه ما تولّم
لو يحطونه هل الراي ، الدليله
لا يحطونه صغار القوم ، سلم
يا ولد من يلوّي الكف البخيله
يوم عاد الجوع ياكل و يتكلم
عندك الغايه و انا عندي وسيله
لا عجزت تحلّها سلم و اسلّم
حتى لو سميتها بـ المستحيله
انا اشوف ان اسمها ضربة معلّم
من تحايل بين حيل و بين حيله
يشغل لسانه و يبلش و يتبلّم
ساعةً ما ينفض الساعد شليله
يحذف الرجال ، سيفه لا تثلّم
قال من عدى على راس الطويله
لو تذوق الموت تكفى لا تظلّم
تنقّص لنا من طلتك خلنا نعتاش
ترانا جياع عيونك السود وحيامك
يا ريحانةٍ من لينها تنسقي بغراش
يخافون لا وبل الحيا يكسر عظامك
لا كدّر صفاك الوادي اللي عشوبه ماش
تخيّر من رياض الحشى وإنصب خيامك
تظلل تحت سدرة ضلوعي وفوق فراش
هذا عرشك اللي كلنا فيه خِدامك
يغذّيك من ريح الصبا رايحٍ رشاش
على راس رامه كنك تعيش فأحلامك
ماحاست مرابيعك بصدري ظعون اللاش
مناهيلها منهلْك وخزامها خزامك
تبرّد وفل الليل عن وجهك المغباش
وخذ بخاطري مابين لينك وسلهامك
واذا ما لعمري في سواحل هدبك قياش
عسى أيام عمري كلها فدوة أيامك