خل الوداع وخل جرحك وذكراك
وش عاد باقي لي عشان أتشرّه
مرّت ركاب موادعك تسحب خطاك
تقطف من غصون الحياه المسرّه
لا طاب قلبٍ يعشقك عقب لقياك
اليا تعب من غيبتك من يبره
أمسى على قسوة كلامك و شكواك
وأضحى على الصده على حين غره
يبرني جرحك اليا جيت ابنساك
ويحط في صدري مشاريه شره
على كثر ما ضرني عقب فرقاك
هو الوحيد اللي بقى في مقره
ليت الوداع اللي يجيني بلياك
ما عاد يملاني من الشوق مره
لا جيت اجاهد دمعة النوح واجفاك
ثوب الوداع ازرت يديني تزره
ما فيه حلو الا حلاوة محياك
ولا الحياة اللي بلياك مُرّه
تبخل على قلبٍ بمرّك تمناك
وتصد ودموع ألوله مستمره
لي قلبٍ معيي ولي نفس تبغاك
متشَتتٍ بينك وبين المضره
على كثر ما غنت الأرض لخطاك
حتى السماء تبغى لخطوتك جره
مير أنت من يرضي مكابر خطاياك
ويحط لك عذرٍ سمين و يمره
والحين مالك بالهوى غير ماجاك
للشوق تدنيقه وللروح حره
منته مساوي شي يانجم الأفلاك
لا طحت من غبة عيون المجره .
على كل حال القلب مرهون لـ الأحساس
و شعوري سؤال و ينتظر من وصالك حل
يامعذب قوامك .. كل ماذعذع النسناس
ويامقسى شعورك يوم شفت الكلام يقل
مثل .. ماتضيع عيوني ب عودك الميّاس؟
بدونك يضيع العمر وإن ضاع كيف يدل
يعيش الكلام !.. اللي كتبته ما بين أقواس
مثل مايعيش الخوف فـ الموطن المحتل
مادام الغرام اللي نعيشه بدون قياس
وش إللي يحدك تترك الوصل يا آوفى خل
تمادى وخل العشق يطغى على الوسواس
وخل العواذل ياحبيبي … تموت بـ غل
فديتك .. ولا تزعل من عتابي ولا باس
غرامك عذاب النفس مدري سحاب يهل
عيونك !.. ليا لديت لي تحبس الأنفاس
ورمشك ليا سلهمت .. يمتد منه ظل
تطل .. وليا طلّيت ماعاد آعرف الياس
عساني فدا غرّة جبينك لاجيت .. تطل
عليك الحروف من الغلا : تعلن الأفلاس
ما ترحم عزيز من شعور المحبه ذل ؟
غلاك أثمن من العمر واكبر من الهوجاس
تبسّم .. ومن شافك تبسّم ماعاد يمل
معك مستحيل إني آحس بـ وجود الناس
وجودك يكفي خاطري عن : وجود الكل
مابقى من باقي الشوف خيطٍ من ظلام
مالمحتك في سدوله .. وسامرتك معه
أنت شيٍ كثر ماعشت بعده في سلام
ودي إن الوقت يرجع .. عشان أرجعه
اه من موت المشاريه لا عزّ الخصام
من متى والخاطر ادناة كلمة تقنعه
من يحبك .. ماتكاثر عليك الا الملام
وانت صمتك يستفزه ، وهرجك يوجعه.
تفدى الليالي مع المحبوب كل الليال
وكل العلاقات بأسماها وبـ اشكالها
ما بعد فرحة وصال الحب فرحة وصال
لا ردَّها طيب معدنها عن إهمالها
تمر ، وتزيّن الدنيا بزين القبال
وتستوطن قلوب خلق الله على فالها
يا ليت الأنسام لا هبّت علي من شمال
يمر ذعذاعها البارد طرف شالها
بتمرك الذكرى … بطارف لياليك
وتعلمك معنى القلوب العظيمة
لحضه ما ادري تسعدك او تبكيك
بس الاكيد ان المشاعر اليمه
فرصه محبه يوم ضاعت من ايديك
الحين تسأل وينها … دون قيمه
اصعب شعور ان تدعي الله ينسيك
من كنت تدعي ياعسى الله يديمه
وإن هود الليل .. ذكر الليل ماهود
الشوق مايعرف البايع من الشاري
لو ما أنت طيفٍ يروح شوي ويعود
ماجاملتك الضلوع ، وجرحها عاري
وإن قلت مانقّص فراقي .. ولا زود
ماهانت المقبلات إلا على الداري
لا تحسب إنك على فرقاي متعود
بكره يطيح المطر ويجيب لي طاري
وجهٍ رغم سود الصواديف نيّر
كنه يقول لطاري الجرح لاباس
وين أنت ياللي حالفٍ ماتغيّر
الجرح عاري لو تغطيه بلباس
حبل الوصل لا ماهقيته قصير
غصني فقد في ليلة الوجد نسناس
إن هبت الذكرى مع الوقت سيّر
وانس الوجع والفقد والحزن والياس
اقلط على عوج الضلوع وتخيّر
منزال ماداجه مسافر وعساس.
لك العذر ياطيف المحبّه عداك اللوم
انا اللي هجرت وصرت في دنيتي لاهي
كساني زماني بـ المشاغل وانا مهموم
مثل ما كساك الخالق بـ زينك الراهي
لكن مانسيتك لو نساني لذيذ النوم
عن الوصل والله ماني بـ داله وساهي
انا كيف ابنسى طيف حبّك وانا لليوم
تراودني الذكرى على بيالة الشاهي
من اللي يعيش ايام عمره بدون ظروف ؟
جميع الخلايق مرها الهم و انهكها
لا تقضي حياتك بين كف القلق والخوف
تقدم وخوض اللي بقى من معاركها
وجيه الليالي دربها بالعنا محفوف
مهي كل حاجه لا تمنيت تدركها
لا ضاقت عليك الارض مره وضاق الجوف
لا تطلب فرجها غير من عند مالكها
جعل لوعات الجفا والزمان اليا استدار
ما تحط وسومها في قلوب الطيبين
ودنا نطلع على الناس مطلاع النهار
لابسين من النوايا ثياب معيدين
الوصل سلمٍ لو انه للأحباب اختيار
كان ما فالدار وحشة ولا الأنفس حنين
والقلوب اللي ما تشتاق وتحب وتغار
ميتة وصدور اهلها مقابر ميتين
طالت عليك الليالي يالقوي الشديد
اللي جروحك عتاق ، و ذكرياتك شقى
لو كان قسمي من أفراح الليالي زهيد
مسامح اللي يروح و قابل اللي بقى
الله عطاني مشاعر ماعطاني حديد
تستفقد الراحلين ، أهل الطهر والنقى
اللي عليهم حنيني كل مدة يزيد
الله يبيح الفراق اللي ماعقبه لقى
من آخر اللي بـ اقوله و اختصار الكلام
خوفي من إني أَخَسرك مرحله طفتها
من شفت ما عاد في وجهك حيا واحترام
عيوبك اللي ما كنت اشوفها .. شفتها
الخاطر ان طاب من حاجه عليها السلام
لو إنها اغلى من عيوني علي .. عفتهاا
قفلت باب العاطفه والمحبه
وسلّمت للعقل الرزين الأمانه
ترا القلوب الخاليه مستتبه
من كل جرح وكل طعنة خيانه
قلبك اذا تقدر تخبيه خبه
لا تكشفه للناس ويقل شانه
ما فيه أحد حبك عشانك تحبه
من شاف عندك شي حبك عشانه
على الزعل ، والضيق حنا كبرنا
ماعاد فيه أشياء تستاهل الضيق
واذا اعتزلنا الكل محد جبـرنا
العزله أصدق من وجيه المخاليق
حتى عـلى صد الحبـايب صبرنا
الحلم لولا الصبر .. مافيه تحقيق
من كثر خيبـات الحياة اعتبـرنا
العمر لحظه … والليالي توافيق