خالد مسعود

[خالد مسعود @6molha]

الحب بلوى مير يازين بلواك
والعمر واحد وانت لي عمر ثاني

مادام عيني تمتمت من حلاياك
اكيد بحضورك ماينطق لساني

[خالد مسعود @6molha]

يامترفه مكانك بوسط عيني
لو طاحت دموعي سكايب ماطحتي

حافظّك ياغلى الناس بيني وبيني
بين الضلوع العوج صلتي وجلتي

لو تطلبين العين قلت : ازهليني
والله لابين لك غلاك ان زعلتي

انتي وبر اخواني ووالديني
مابور فيها لو نزاعات تحتي

[خالد مسعود @6molha]

يابنت لو غيرك فرش دربي ورود
مابيه لو لجلي على الموت ياتي

انتي لحالك من ملك قلبي وزود
زودٍ على قلبي ملكتي حياتي

بيني وبينك سر ووعود وعهود
مقفي ولو تقفي وراك امنياتي

ولو حولك جيوشٍ ومن دونك قيود
اجيك لو لجلك عناي ووفاتي

احكم بك العالم مثل حكم نمرود
واسجن غلاتك مثْل سجن الزناتي

[خالد مسعود @6molha]

اظلم الصبح وغشى الليل والمسرى طويل
وضاقت الديره وضاق الفضا وارحابها

البعاد اثّر على العين والدمعه تسيل
عيني اللي ماتبي كود شوف احبابها

افترقنا بالحقيقه وواقعنا عليل
مير ظلي حالف انه يضم اطيابها

ليت من قربك حصيل وعلى شوفك حصيل
وليت ماللبعد سيره ولا يحكابها

كل يوم بدون شوفك على العاشق ثقيل
وكل ليله عقب بدرك تكشّر نابها

الليالي والمفارق لهن حدٍ صقيل
تذبح الرجال ولايحسب حسابها

الظروف اقسى من المال في يد البخيل
والعن امن اللي يبي حاجه ولاجابها

[خالد مسعود @6molha]

ياعظيمه قدرك اكبر من اشباه الرجال
واعظم من اللي ليا لد مالديت فيه

ماليه عيني ولا لي على غيرك مجال
يوم كلٍ بالمحبّه لهم عدّة وجيه

شاعرك ماهام بالشعْر يالسحر الحلال
هايمٍ بعيونك السود والوجه النزيه

مستحلّه قلبي بدون غارات احتلال
والهواوي لاعشق يعطي اللي في يديه

[خالد مسعود @6molha]

لاهبهب الغربي ودوّر واستدار
قامت تلاحيني هموم معتّقه

من كثر حبي لك تجرّعت المرار
اليا سليت يعود شوقي يفهقه

ياسيّدي مادام للشعر اعتبار
البيت في شرواك يسوى معلقه

من حبّك يحب الظفر والانتصار
ماهوب من صكّات بقعا ترهقه

يابدْر ليلي وابتسامي والنهار
لك الغلا والقابليّه والثقه

بيني وبين الغيد من عقبك ستار
كنّك من اوصاف الخيال مطوّقه

اليا بعدوني عنْك مادوّر خيار
اجيك لو دونك حبال المشنقه