لا استوت في عيونك الثنتين قربي و ابتعادي
والظروف اقسى من الماضي على اللي يستعيده
المصافح بالقلوب أصدق من مصافح الايادي
اسمحي لي كل يوم أصافحك .. وانتي بعيدة .
كل ماجيت المداهيل في ذاك المكان
تاقف الدنيا بعيني على بيت و ممر
كل ذكرى جات منه لها فالقلب شان
سامح الله كل شي على بالي خطر
انت قصة عمر عندي وتنهيدة زمان
لا تهونها التعازي ولا تقبل عذر .
من جرّب الفقد للاحياءْ والاموات
يهون فقده ل حيّه .. عند ميته
أنا بَعَد ما فقدت ابوي ب الذات
عرفت معنى الكلام اللي عنيته
حلمت به مرة ؛ انّه حي ما مات
كنّي بعد ما بكيته ؟ ما بكيته
وتوقّفت هالحياة لبضع لحظات
آوّل ما فتّحت عيني ما لقيته.