استريحي في ضلوعي واهجري درب الملام
ما يليق بوجهك الطاهر من الدنيا كدر
إنتِ دولة من حنان وإنتِ قانون الغرام
وإنتِ غيمة من بياضٍ فوق هقوات البشر
لا يضيق الصدر والدنيا تحت رجلك تنام
والحزن لا مرّ وجهك يختفي مثل الأثر .
مرحبا ياذنبي اللي ماكنّه بالذنوب
ماني بقايل لدرب الهداية ودّني
والله إن قلبك مبدّا على كل القلوب
مثل مابديت قلبك عليهم بدّني
شدني مجدولك اللي تلاعبه الهبوب
وشيٍ ثاني ماقدر أقوله لكن شدني
ماحدً قد ضدني ف المعارك والحروب
بس مدري كيف سلهام عينك ضدّني .
يالعفاف المهذّب والحيا والحشيمة
والجمال الحقيقي والوقار المهيّب
كل عينٍ ما تشبع من عيونك كريمة
ما لـ حسنك شبيه ولا لـ زينك معيّب
ما تهون المصايب والجروح الأليمة
لين شعرك من العود المعتّق يطيّب
وكل فكرة تغنّى فيك فكرة عظيمة
لين راسي يشيب ولين قافي يشيّب .