يا ابني افهم وشغّل مخك 🧠..
أنت أخدت زياد كمال إعارة من إنبي بـ30 مليون جنيه، بقولك إعارة مش بيع، غير الامتيازات وغير إن نادي إنبي كان هو اللي له الحق في بيع اللاعب في أي وقت ولأي نادي تاني، مقابل نسبة للزمالك!!
يعني تخيل تاخد لاعب إعارة بـ30 مليون جنيه، عشان كمان تسوّقه لنادي إنبي لو حب يبيعه!
نادي إنبي كان عايز في علي محمود 50 مليون جنيه، وبالمناسبة ده رقم كان قريب من الـBenchmark اللي السوق كله شغال بيه، ودفعته أندية أقل من الأهلي في لاعبين. ده البنك الأهلي اشترى أحمد أمين أوفا، مهاجم إنبي، برقم قريب من ده!
طيب الأهلي عمل إيه في صفقة علي محمود؟
ضم اللاعب مقابل 30 مليون جنيه، وده الرقم اللي استهدفه الأهلي، ورقم قريب من أرقام أغلب تعاقدات الأهلي قبل بداية الموسم، وربط باقي المبلغ، الـ20 مليون جنيه، كحوافز.
وتعامل إن الـ20 مليون الإضافية دول يكونوا حوافز بنظام Win-Win Situation.
أنا مش هدفعها إلا في حالة إن الأهلي حقق بطولات ونجاحات، هي أصلًا أرقامها ومداخيلها كبيرة جدًا مقارنة بالحوافز
يعني تحقيق الدوري والكأس والسوبر ودوري الأبطال ولعب كأس العالم للأندية، دي بطولات عوائدها المالية تتخطى المليار و150 مليون جنيه، ده بخلاف الرعايات الإضافية اللي ناتجة عن تحقيق البطولات دي.
فأنا والله لو علي محمود واللاعبين في قائمة الأهلي هيساعدوا في تحقيق الأرقام دي، فالـ20 مليون جنيه الإضافية لنادي اللاعب ده مش رقم مقابل عوائد البطولات دي
وبالمناسبة، الأهلي معملش كده مع علي محمود بس
لأ، ده في أغلب الصفقات المحلية، زي ما أنت ثبّت رقم للاعبين كرواتب لكل فئة، وخليت باقي عقد اللاعب حوافز مرتبطة بالبطولات، كمان مع الأندية تمسكت بأرقام كحد أقصى، مع تحويل أي مبالغ إضافية لحوافز مرتبطة بتحقيق البطولات، وبالتالي عوائد مادية أكبر بكتير من اللي هيتدفع وقتها.
وأنا بشوف إن دي سياسة أفضل بكتير جدًا من إنك كنت تدفع مبالغ كبيرة في مصطفى العش أو عمرو الجزار أو غيرهم، والنادي اللي باع لك اللاعب ياخد قيمة الصفقة اللي حددها كاملة، واللاعب ياخد عقده برقم كبير، بدون ما تربط ده بتحقيق أهدافك كفريق من ضم اللاعب!
أنت دلوقتي بتربط الاستفادة المادية الكاملة للنادي واللاعب باستفادتك أنت، اللي بتحققها كبطولات وفلوس
فروح يا ابني شوف القيد اللي موقوف، وفهموك إنه هيترفع في يناير، ولا شوف قصة الغرامات اللي بتتدفع للعيبة وأندية ومدربين بملايين الدولارات وبفوايدها، ولا ملايين الجنيهات في مخالفات إدارية، وبعدها ترجع تقول: «أصل أنا نادي مفيش فيه فلوس»
خلّي قلبك على ناديك، بدل ما قلبك على مصلحة الأهلي 🤣
أحمد أسامة:
كنت أتمنى صلاح يسجل هاتريك أمام مالاوي عشان اخلص من الصداع، لأن بقى فيه نوع من أنواع تصنيف الرأي، وكمان وضع صاحب الرأى تحت ضغط ، واتهامات مختلفة تمامًا خارج إطار كرة القدم بشكل مبالغ فيه جدًا.
من حلقتى اليوم على اليوتيوب