اسأل بسام💰

كُل مايخص المال 💰| لطرح الاستفسارات العامة والقضايا المالية وتبادل الآراء والتجارب مع الحفاظ على الخصوصية

أرسل استفسارك عبر الخاص 📩.

[اسأل بسام💰 @AskbSA]

من الخاص 📩

أنا موظف حكومي وراتبي 12450 ومتزوج من 9 سنوات
عندي قسط عقاري 3950
وشخصي 1750
ومدارس عيالي 1800 بالشهر
مصاريف البيت 2300 وفواتير 650
وزوجتي تطلب مني 1200 مصروف خاص

وانا والله ما اتحمل اعطيها مصروف بهاذا الحجم المهم رفضت قالت معد ابي البيت ورجعني لأهلي
وهي الحين عند اهلها ورافعه دعوه طلاق المشكله هي مانحس وما تشوف اللي انا فيه

مدري وش اسوي الصراحه اراضيها ولا بطقاق ؟؟

[اسأل بسام💰 @AskbSA]

من الخاص 📩

فتحت محل مغسلة ملابس برأس مال 137 ألف ريال
المحل شغال من تسعة شهور والدخل اليومي يتراوح بين 650 و1100 ريال

الإيجار السنوي 38 ألف ورواتب العاملين 7200 بالشهر غير الكهرباء والمواد والصيانة والمصاريف اللي تطلع فجأة جاني شخص يعرض يشتري المشروع مني بـ 105 آلاف كاش

أبوي يقول اطلع قبل ما تخسر أكثر وأنا للحين أشوف إن المشروع يحتاج وقت

[اسأل بسام💰 @AskbSA]

من الخاص 📩

أخوي الكبير اشتغل مع أبوي في مؤسسة المقاولات من يوم كان عمره 19 سنة ترك دراسته وتفرغ للشغل وكان يمسك المشاريع والعمال والحسابات وأنا وبقية إخواني كملنا دراستنا وتوظفنا بعيد عن المؤسسة

قبل سنة توفى أبوي الله يرحمه
ولما بدأنا نحصر التركة اكتشفنا إن المؤسسة عندها معدات وسيارات ومستحقات بمبالغ كبيرة أخوي الكبير قال لنا المؤسسة هذي أنا اللي تعبت عليها طول عمري قلنا له محد ينكر تعبك لكن المؤسسة باسم أبوي وتدخل ضمن التركة قال أنا ما أبي أحرمكم من حقكم بس مو معقول أطلع مثل اللي ما اشتغل فيها يوم واحد

المشكلة إن أخوي كان يستلم راتب شهري 6500 ريال من المؤسسة وهو يقول الراتب ما كان مقابل تعبه الحقيقي وإنه ضحى بفرص كثيرة عشان شغل أبوي أختي قالت له طيب إحنا وش ذنبنا إنك اخترت تشتغل مع أبوي رد عليها وقال لو ما وقفت معه كان يمكن المؤسسة قفلت من زمان بعدها قال إنه مستعد يشتري حصصنا لكن بالسعر اللي يحدده المحاسب اللي يتعامل معه

رفضنا وطلبنا تقييم مستقل للمؤسسة
ومن يومها وهو يقول إننا نشكك فيه بعد كل السنين اللي خدم فيها أبوي أنا أشوف إن لأخوي فضل كبير وما نقدر ننكره لكن بنفس الوقت ما يصير نخلط بين تعبه وحقوق بقية الورثة خصوصًا إن المؤسسة فيها التزامات وديون ومبالغ عند العملاء ما تحصّلت للحين

الحين أخوي يهدد إنه يترك الإدارة ويخلينا نتصرف بالمؤسسة وإحنا ما عندنا خبرة بشغل المقاولات مثله أكثر شيء مضايقني إننا طول عمرنا نفتخر بنجاح أخونا واليوم صرنا مختلفين معه على نفس المشروع اللي تعب عليها كيف نقدر نعطيه حق تعبه ونحفظ حقوق الورثة بدون ما نخسر بعض

[اسأل بسام💰 @AskbSA]

من الخاص 📩

أنا متزوج وعندي 3 بنات وراتبي 7930
زوجتي تبي تسجل البنات بمدارس أهلية بـ 41 ألف بالسنة

أنا أشوف الحكومية تكفي خصوصًا إن علينا إيجار 2700
هل أضغط على نفسي عشان تعليمهم ولا اوافق
بس دخلي ضعيف ؟؟

[اسأل بسام💰 @AskbSA]

من الخاص 📩

راتبي 11460 وعندي تمويل شخصي قسطه 2380

البنك خصم القسط مرتين هالشهر بالغلط
قدمت اعتراض وقالوا المبلغ يرجع خلال 15 يوم
طيب التزاماتي اللي تأخرت بسبب الخصم مين يتحملها؟

[اسأل بسام💰 @AskbSA]

من الخاص 📩

السلام عليكم
انا قدمت على وظيفة وسووا معي مقابله عن طريق الجوال وقبلوني وارسلوا لي العقد وكل حاجه قالوا وقعي ووقعت وعلى اساس ابدا عمل شهر 8 انقليزي بس سحبوا علي وارسل لهم محد يرد علي وش ممكن اسوي في هالحاله

[اسأل بسام💰 @AskbSA]

من الخاص 📩

راتبي 9870 ريال ومتزوج وعندي 3 أطفال

قسط شخصي 2430
وقسط سيارة 1380
وإيجار 2100 بالشهر
مقاضي البيت 1600
وفواتير وبنزين 850

وما يبقى لي إلا 1510
جاني عرض تمويل إضافي 65 ألف وقسطه 1250 وش رايكم أدخل فيه أو وضعي ما يتحمل؟؟؟

[اسأل بسام💰 @AskbSA]

من الخاص 📩

ياخوان والله ابي شوركم
انا رجل معي ماجستير MBA
بمعدل عام ٤.٩٢ من ٥
ودبلوم عالي ذكاء اصطناعي معدل ٥/٥
ودبلوم عالي ادارة مشاريع معدل ٤.٨٨ من ٥
وقدرات جامعيين ٨٨ وقدرة معرفية ٩٠
وستيب ٧٧
وخبرتي ٣ سنوات تقريبا مابين مشاريع حكوميةوخاص
وعندي شهادات احترافية مثل
PMP, RMP, PMO-CP, ACP, CPMAI, CSPP, PMI-CP, KPI's, PL-300

راتبي ١٣٢٠٠
هل ممكن احصل راتب اعلى لو لا قدر الله ماتجدد عقدي؟ وش السواه؟
وهل وضعي مضبوط ولا مقصر ولازم اتطور اكثر؟ وهل صحيح ان اغلب الناس رواتبهم ١٥ الف وفوق؟ وبالراحه

[اسأل بسام💰 @AskbSA]

من الخاص 📩

زوجتي قالت لي أمس عندي 210 آلاف بحسابي وأبي أشتري فيها شقة صغيرة قلت لها ليش ما نضيف عليها ونشتري بيت أكبر لنا وللعيال؟

قالت البيت اللي ساكنين فيه باسمك وأنا أبي يكون عندي شيء باسمي قلت لها يعني ما تحسين إن بيتنا بيتك؟

قالت لا تفهمني غلط بس أنا موظفة من 12 سنة وكل فلوسي راحت على مصاريف وأشياء ما بقي منها شيء
الحقيقة إن كلامها ضايقني بالبداية أنا راتبي 13600 وعلي تمويل عقاري وقسط سيارة ومصاريف ثلاثة أطفال

وهي راتبها 8900 وتشارك أحيانًا بمصاريف البيت لكن ما عمرها كانت ملزمة بشيء قلت لها الشقة بتحتاج تأثيث وصيانة وممكن ما تتأجر بسرعة
قالت حتى لو ما جابت دخل ممتاز يكفيني إن عندي عقار باسمي الغريب إني طول عمري أشجعها على الادخار لكن يوم قررت تستثمر مدخراتها حسيت إنها تخطط لمستقبل منفصل عني هي تقول إن امتلاكها شيء خاص ما يعني إنها ما تثق فيني وأنا للحين أحاول أفهم ليش الموضوع مأثر علي لهالدرجة

هل طبيعي الزوجة تفكر تأمن نفسها بعقار مستقل حتى لو زوجها مو مقصر معها بس الحياه الزوجيه
مشاركه مو كذا كل شخص يفكر لحاله !!

[اسأل بسام💰 @AskbSA]

من الخاص 📩

أنا وزوجتي نجمع من رواتبنا 4200 ريال كل شهر
بعد 3 سنوات صار معنا 151 ألف ونفكر نشتري أرض
لقينا أرض بـ 295 ألف وصاحبها يقبل دفعات خلال سنتين

نشتريها بالتقسيط أو نكمل تجميع لين نقدر ندفع كاش؟ شرايكم

[اسأل بسام💰 @AskbSA]

من الخاص 📩

انا توني متخرجه ولقيت وظيفه براتب 10 الاف حرفيا نص الشهر ومايبقى معي شي قلت خل يروح على شي يسوى على الاقل رحت طلعت لكزس قسطها ثلاثه والحين مايبقى معي الا سبعه ويجي نص الشهر ولسه بنفس المشكله ماني عارفه احتاج حل وندمت على السياره وعلى قرضها لو اني ماخذه ارخص او اني ابيعها على انه ماكملت خمس شهور معي السياره

[اسأل بسام💰 @AskbSA]

من الخاص 📩

السلام عليكم، أرغب باستشارتك مالياً. أنا طبيب مقيم، ادخرت ١٧٠ ألف ريال

ومتبقٍ على عقدي ٣ سنوات ونصف. مقبل على الزواج بتكلفة متوقعة ١٢٠ ألف

وأفكر بشراء شقة بـ٢٥٠–٣٥٠ ألف بدلاً من إيجار سنوي ٢٧–٣٤ ألف علماً بان مصروفي الشهري حاليا ٢٥٠٠ ريال فقط

هل تنصحوني بالزواج والإيجار مؤقتاً أم الجمع بين الزواج والتملك؟خصوصاً أن دخلي بعد انتهاء العقد غير مضمون؟

[اسأل بسام💰 @AskbSA]

من الخاص 📩

السلام عليكم
ممكن تنزل استفسار لعل افهم ايش صاير معي

انا معي بكالوريوس علوم حاسب
ودرست لغة في كندا سنة
ومعي شهادة احترافية مثل Security+
وعندي تدريب سنة في IT و cybersecurity analyst ،
كنت اشارك كثير بمؤتمرات زي بلاك هات وغيره ومسابقات بالسايبر

هل اكمل ماستر ؟ وهل بمجالي او ابعد عنه لان خايفه كثير ومتشتته

لي ٤ سنين تقريبا ابحث عن وظيفة بشكل مكثف بالرياض مالقيت الموضوع مرهق نفسيًا اني مابديت مساري المهني ، ابحث تقديمات و حضوري و كله مؤتمرات ابد ماحصلت نهائيًا او يجي رد لي . الله يرزق الجميع يارب

[اسأل بسام💰 @AskbSA]

من الخاص 📩

يعطيك العافية نزل استفساري
انا امراة اعمل عمل حر دخلي الشهري منه مابين 20 الى 25 الف وبالسنة 3 مواسم اطلع فيها مجمعة حول 150 الف ماشاءالله
ووضعي طيب الحمدلله
في مصاريف جانبيه للعمل لكن ماتتعدى 15٪ من الدخل
وانا اصرف
على عيالي وادفع ايجار وكهرباء وراتب شغالة وسواق ومدرسة ولدي احتياجات خاصة ماقبلوه التاهيل مصروفاتي الشهرية 10 الاف تقريبا
جمعت مبلغ 400 الف على مدار 4 سنوات وابغى اشتري ارض
وابغى قرض عقاري 200 الف + الدعم الغير مسترد
هل في طريقة اخذه
عندي دخل مستمر له اكثر من 5 سنوات ثابت بكشف الحساب البنكي
عندي شهادة عمل حر
والارض باسمي ان شاء الله
عمري 33
فيدوني جزاكم الله خير

[اسأل بسام💰 @AskbSA]

من الخاص 📩

السلام عليكم
راتبي ١٥٢٥٠ عندي قرض عقاري بناء ذاتي قسطه ٥٤٥٠ ﷼ وعندي قرضين شخصيه ٣٥٩٠﷼
مجموع الاقساط ٩٤٠٠﷼

ولا خلصت البناء بسبب قلة السيولة متبقي لي دفعه بعد انتهاء من اللياسه

نصايحكم هل اخذ قرض تكميلي واكمل اللياسه واذا نزلت الدفعه سددت القرض او انتظر واوقف البيت عظم واقفله

حاليا يتبقى لي من الراتب ٥٨٠٠

رايكم الله يجزاكم خير

[اسأل بسام💰 @AskbSA]

من الخاص 📩

خدمتي بالتأمينات 22 سنة وعمري 49
الشركة عرضت علي إنهاء العقد مقابل 187 ألف
راتبي الحالي 14300 وعندي التزامات شهرية 6900

والصدق ابي المبلغ بخلص بعض الامور اللي علي
وبنت بتتزوج وبعطيها بس خايف ع السنوات القادمه
كيف اصرف ويروح المبلغ وابلش بعدين وما ادري اذا اقدر انوطف بعدين ولا لا لأن العمر كبير !

[اسأل بسام💰 @AskbSA]

من الخاص 📩

السلام عليكم ، انا موظفه راتبي تقريباً ٨ الاف غير متزوجه مصاريفي فقط الشخصيه
وحالياً جمعت مبلغ تقريبا ١٢٥ الف بس محتاره مدري وش اسوي هل فيه توصيات لمشاريع او شي كيف اقسمه راتبي لان لي سنتين بس اتخبط ماني عارفه كيف ارتب اموري الماليه عطوني توصياتكم اقتراحاتكم

فكرة افتح متاجر بس كل البضايع تحتاج اروح لمناطق ثانيه اشيك واجيب وادخل مع العمال وتفاهم لان اذا شافوا اني لحالي يستغلون الوضع وانا ماعندي رجل يتولى المهمه

[اسأل بسام💰 @AskbSA]

من الخاص 📩

عمري 32 مهندس اعمل في شركة قطاع خاص

استنزاف دوام ٨ ساعات ويوم واحد اجازة فقط وللاسف الراتب لا يتجاوز ٩ الاف رغم ان لي في الشركة ٨ سنين للاسف حاولت اقدم على الشركات الكبرى لكن ابد مالقيت اي فرصه قدمت على العسكرية برتبة عريف في وزارة الدفاع كل الشروط مناسبة ويقبلون الى عمر ٣٥

وما ادري اذا جاتني اقبل او استمر في المحاولة

[اسأل بسام💰 @AskbSA]

من الخاص 📩

السلام عليكم انا عاطله ينزل مصروفي من الوالد شهريا ١١٠٠ انا قبل كنت متوظفه وطلعا قرض من تمام وجوالي فاتوره لان مابقالي من القرض الا سته دفع

وفاتوره جوالي ٤٧٧ وباقيلي ١٧٠٠ للقرض كيف اوازن بينهم واقفل
بعدها ابي ادخر لي مبلغ الا عنده طريقه كيف اسوي ادخار يقولي

[اسأل بسام💰 @AskbSA]

من الخاص 📩

السلام عليكم
انا بنت وجتني وظيفه بقطاع خاص برا منطقتي تبعد خمس ساعات والراتب 6500 هل يسوى الغربه ؟ والمواصلات خاصه اني تقريبًا بزور اهلي كل ويكند او مرتين كل شهر محتاره بين اني حديثة تخرج ما شاء الله وجتني وظيفه وبين اني يمكن ما اقدر اتحمل الغربة والعناء وهل الراتب يسوى ؟