شوفت لقاء لشاب من دار رعاية الايتام
شاب مؤدب ومحترم بيحكي قصته وبيقول :
أنا عشت طول عمري أعرف إني يتيم.. مليش أهل والدار بتقول لنا أنتم ملكوش أهل، بعديها اكتشفت إني ليا.. أنا كنت نفسي في حياتي إني أنا أوصل للمحضر اللي دخلت بيه الدار وانا لسه رضيع، فالمحضر مبيتاخدش غير لما نتم سن ١٨ عام..
أنا قرأت المحضر لكن لانه قديم من حوالي 18 سنة فمش باين منه أوي،
رحت للراجل بتاع المكتبة قلت له يا عمو أنا عايز أوضح المحضر ده عشان أقرأ الكلام اللي مش واضح، فاكتشفت بصمة المحضر معمول في محافظة المنيا، واكتشفت أن مامتي هي ولدتني في الشارع، وقبل ما هي تولدني كان بابايا ومامتي اتجوزوا عرفي قبلها، فمامتي افتكرت أن بابايا راح المنيا فجريت معاه..
وبعد ما ولدت في الشارع، في واحد لقاها فكمل ولادتها في المستشفى، والمستشفى طلبوا الشرطة وعملوا محضر رسمي، وقعدوا يتحايلوا على مامتي إنها تاخدني وهي رفضت، وبعد ما خدتني راحت رمتن،ي قدام باب مستشفى سوزان مبارك اللي في المنيا..
النيابة كانت طالبه جدي اللي هو أبوها المفروض عشان يستلم، فلما دخل لقاني والحكومة قالت له خده، قال لهم لأ أنا مش هاخده، أنا مش مسؤول عنه، وطبعاً الحكومة ودتني دار رعاية..
واللي قالي الكلام دا الطبيب اللي كان مسؤل عن الحاله وحضر المحضر وقابلته عن طريق اسمه اللي كان موجود في المحضر..
كبرت في دار أيتام وعشت طول عمري إن أنا ماليش أهل وكده، بعديها كفلتني بقى مامتي المذيعه أمال فهمي دي اللي هي الإعلامية ،
عارفة الطفل لما يكون محروم من حاجة وربنا عوضه بحاجة تانية؟ مش عايزة أقولك والله يا استاذة دي أمي وكل حاجة في حياتي أنا شفت منها كل خير، والست دي أنا دخلت بيتها واتعلمت يعني إيه أكون حاجة..
أنا دلوقتي بدرس إعلام وبحب مجال الإعلام زيها، وبشتغل متحدث رسمي عن مؤسسة رعاية الأيتام. وبشتغل في شركه أجنبية