سلطان بن مهراس

مسلم وربي الله.

[سلطان بن مهراس @IbnMhras]

كثر ما غاضني ليلي وبان بوجهي الارهاق
اجيه بدون ما يعزم واعيّن ضيفه وجاره

خذاني من صباح الخير بسياق وبدون سياق
على قول ابن جاري فيه خلاني على الشارة

يعاتبني على غيابي واقدم عذري المنساق
وهو لا كفكفه نور الفجر ما قدم اعذاره

سلام الله على وجه الصحيح وساعة الاشراق
سلام اسلام مثل الصبح بهدوّه وبوقاره

كرهت الخامقة والفاتح اللي يجهر الاحداق
ما احب من الفواتح غير الابيض لو بغباره

اجامل واندمج وامر لا عايف ولا مشتاق
اجدد عهد واسمع من يقول الناس بوارة

واسندها على بو حاجبٍ ما ينعقد لا ضاق
لقيته لا انجمت وتاهت اقدامي شعم ناره

صديقي لا لمح تنعومة الماطر وجوّه راق
تباطاني لو ان مامن بطا يسعدني اصراره

رماني بطرفه ساعة وصلت معانق الاعماق
جزل بصغاه واوسع لي مكان وزاد مقداره

عفانا الله من الشيطان لا يدخل مع اي نطاق
وحتى لو جمعتنا بدون اعذار كفارة

الا يابو وجود الهاك وجدك والبخت ما فاق
تنبّه لا تضحّي بنخلة لعيون جمّارة

تلام النفس لو ان البلا من وجهة السواق
هو اللي فاتح لنفسه مجال ونفسه امارة

[سلطان بن مهراس @IbnMhras]

الفكر مثل السحابة والمطر مبنى قصيدي
ترتوي منها سهول المسني وتروي هضابه

لا غشى ستر الدجى بعد النهار وجا تنيدي
سولفي لي يا بنات الفكر واروي بالنيابة

كل ما جات بقبول تزيد وحدة في رصيدي
الرصيد اللي نفع حسان يوم اقفى شبابه

كنت طرقي في طريق الغي والسجات عيدي
وسع بالي ماخذه من وسع ذا الكون ورحابه

غارقٍ في غربتي واهيم كن البيد بيدي
والدقايق تلحق الساعة وانا ما قلت جابة

لين جاني من مشى في الارض تيه وقال ميدي
يا وسيع البال وينك من دواليب الصبابة

قلت انا خمّتني اللي ما عليها من نشيدي
ما عليها غير من عهدٍ جمعنا بالغيابة

الصدف ميعاد ما جات الرسايل في بريدي
والتواصل بالمشاعر والقلوب اللي تشابه

قيّدتني من وفاها لين صرت احب قيدي
واوهبتني من يطول الدهر ما تبلا ثيابه

الهوى بابٍ من ابواب الغيا من قل جيدي
ما دخلته غير سايح وانقفل عالقلب بابه

وانفتح للمعضلات الفين باب وضاع فيدي
في كواليس الاوادم طاحت اقنعة اللبابة

يوم لنت شوي بانوا من يزعلهم شهيدي
واظهروا لي خافياتٍ كنت احسب انها دعابة

ما سمعت الا الاكيد من العرب واهملت اكيدي
واثره الداب يعوي والذيب سمه وسط نابه

بين نبّاش الصدور وكيدهم ما فاد كيدي
ازعلوني لين ثارت وازعلت ربع وقرابة

والعرب لاموني وحكم البشر ماهوب في ايدي
تنقل اطراف الكلام وزادوا القصة غرابة

يا رفيق العمر لا شح الكلام اسمع جديدي
طول رحلتنا نجابه ما نشدنا من نجابه

قلهم لا طالت الطرقة وجارت يا عضيدي
ما غوى صاحبكم اللي خابرينه يا صحابة

[سلطان بن مهراس @IbnMhras]

رضيت بربي الله واحمده رغم زعلي ورضاي
فلا شعور السعادة غرني والا الزعل ضافي

دعيتك تطلق ايديني ولا غيرك سمع بدعاي
يا ربي لا تكلني غير وجهك واسمك الكافي

يروح صداي فبطون المسايل بين راي وراي
وجرف نز السيول اللي تولجني وانا غافي

على ما يشرح اسباب الفراق وكشرة محياي
تخرفع شرهتي دون الحكا ويزمها قافي

ظروف البارحة قدمي واهددها بزين الجاي
عسى الله ما يحاسبني وانا اقول انها خلافي

تركت اللي معاريفه علي ما تحتري رجواي
تركته من حيا مدري جهل وان قيل يالجافي

اشوف اني رحمته من توجاده على بلواي
مع ان مالي عذر عن مجلسه لو طوّل وقافي

حرفت الشك صوبي لو بشيل اخطا مهيب اخطاي
سوافي مرجفة تسفي واعارض دونه السافي

يقولون متهوّر قلت لا باكي ولا شكاي
تهزووا بي لو انخاكم وانا طيّب ومتعافي

مكافح ومتباهي بالعزوم اللي تحث خطاي
ولا رحت ارجي انصاف الحلول تحقق انصافي

ونديم العام خلالي من ايامه بيالة شاي
مجنّبني غلا والا زعل ما نعلم الخافي

لحالي لين تطرا ذكريات اللي رجا لاماي
براوة يالشعور اللي فقدت احساسه الدافي

تحرا رجعتي باللي تمنيته وصار مناي
وابشّر خاطري بانّه تحقق غاية اهدافي

اذا جيتك بصيدٍ يشبعك لو ما نفع دنياي
لا تنشدني عسى ما خلاف وانت خلافك خلافي

[سلطان بن مهراس @IbnMhras]

على دنياي معلن حرب الاستقلال واتحدا
اشد ان صملت واقول يا دار الفنا شدي

تحزمت المبادي والهدف غالي علي جدا
جعل روحي فداي ان مت ما ينقال متردي

كن احلامي حكم بايد ما عاد الامر له يدا
وانا راضي وخادم شفّه ومنصاع من جدي

يصادم راسي الغارات لا هوّن ولا هدا
ولقا عزمي يجمل موقفه غازي ومتصدي

نصيبي ماخذه من غير ما اساوم ولا اتفدا
خذوا فاعماركم ياللي تعاونتوا على ردي

تجريك السعة يالعاذل اللي ما بعد عدا
لكن نسم على عمرك ترا ما عادني ودي

تقولون الزعل ما جاب قلت الضحك ما ودا
تعزووا يا هلي واعزوا ودون حلوقكم يدي

فاذا لدّت لي عيون الفرح يوم الورق ندا
تبسمت لعيونٍ ما بعد قلنا لها لدي

طبيعي لا قد الخطّر وساع الغالي مبدا
ذكرت اللي معي متناسي اللي وقفوا ضدي

[سلطان بن مهراس @IbnMhras]

جهول الاوادم بالحكي بايع وشراي
وعقّالها ما صدّقت لين تعربها

سليم العقل ما غرته هرجة الحكاي
وسقيم العقل لقط هروجه وطار بها

ألا يا رياحٍ خالفتني على مشهاي
وحتى السفينة صابها ثقب عيّبها

ولاني نبي الله لكن قريت الآي
ومومن به يوريني اعجب عجايبها

[سلطان بن مهراس @IbnMhras]

ما دام لي حيل جاوبت المواجر بخير
عاشت عزومي عساها ما تفيد العدا

حنا لها لو لسان الشمت ماله ضمير
ماحن بنرجي عشانا من بواقي غدا

كيفٍ لك تقول يا طير السعد لا تطير
واليا نشد الارض ما جاوبه غير الصدا

تستغرب ان الصغير يشيل هم الكبير
الله فرق بين خلقه لا تقول تندا

[سلطان بن مهراس @IbnMhras]

عسى الله يعاوني على الرشد قبل الشيب
ولا اقعد رهين الطيش ومجامل الكذاب

تماديت بارهاق الفكر عند باب الغيب
ادور محل العقل واخاطب الالباب

اسكر على الشيطان بيبان واخشى العيب
وعوض كل باب انصك يفتح لي الله باب

قراراتي اكثرها ارتجلها بلا ترتيب
عرفت السبب والا على الله بدون اسباب

وش اللي يفيدك فيه جر العوا يا ذيب
تحيّن لك الفرصة ما دام القمر ما غاب

سلمنا من ام جنيب جونا عيال جنيب
يا كثر التشابه بين قرب الردي والداب

ركزت الهقاوي للاوادم نصع وتخيب
رجاجيل نحسبهم واثرهم ما غير ثياب

يغر الشكل كان المراجل تجي وتغيب
خطاي اعترف به والخطا قالبه جذاب

تعمدت قلب الطاولة والنصيب يصيب
ولا لي عيون ترف لا حميت الاعصاب

بنيت السفينة وضحكوا سايقين الجيب
وغير التهكم مدعي المعرفة وش جاب

قريت السير وانزاح عني مظن الريب
مثل سيرة اصحاب النبي ما لقيت اصحاب

فقدت الامل لكن لا شميت ريحة طيب
تصر انتدابات الامل منحي امر اركاب

يمونون ربعي والخوي والتقي منيب
وشكري على من يتخذ لي محل اعراب

خوالي مثل تبقى وعماني الترحيب
بهم مغتني عن فتنة المعجب القلاب

انا دونهم والمرجفة فالهم تتبيب
وانا اطلق شنب لا كثروا مفتّلة الاشناب

[سلطان بن مهراس @IbnMhras]

سلام يا وجه السعادة والرضا
سلام والوجه المشبب ما يضيق

ذا صدري الموقود من نار الغضا
تقدر تشوف لها من عيوني بريق

لا شانت اخلاقي تولّجت الفضا
قبل اتغيشم وانحر كتوف الطريق

مانيب محتاج استشاري ووعظا
خرمان شاهي والبيالة بادريق

خل العتاب الوقت فاروقه مضى
اما قبلت العلم والا في حريق

مالي ببيت العمر لا منّه فضى
ومالي بفرحة ما يخاشرها صديق

اشوف لي رحمة وبارقها نضا
وتشوفها عقوبة مخايلها غريق

اما بعد ما بنشغل باللي مضى
واما قبل طول الامل ما بل ريق

وذلحين يا وجه السعادة والرضا
سلام والوجه المشبب لا يضيق

[سلطان بن مهراس @IbnMhras]

يا بحر ما راعني موجك العالي
دام السفينة على الله مرساها

موكل الله طلوعي ومحوالي
مستودعه غاية النفس ومناها

ربّاه انا شره والصدق منوالي
مانيب كذاب ما خاف عقباها

شفت الدلال وضرمت وتهيا لي
فرصة عمر والعيون احتما ماها

اقبلت مستقبل ايام وليالي
الله علم ويش تحمل خفاياها

حلفت لا اجيب ما يفرح الغالي
عز الله مقام من قال يقواها

هذا أنا والبسيطة وموالي
معاويٍ وين ما راح يزهاها

اقلط صدر والشبب حظي وفالي
مبداي لي والاوادم ومبداها

الكلمة اللي ما تطري على بالي
دور لها عند غيري وتلقاها

ألهمني الله تقاي وتحيّالي
افلح مزكيك يا نفس سوّاها

كبر الامل سر حلي وترحالي
ولا معي غير ناقة وسقياها

انا عزيز ورفيقي مثل حالي
ارزاقنا رب موسى تولاها

[سلطان بن مهراس @IbnMhras]

نفسي المستغنية حتى ايش لو اذنبتي
عايني فوق وتمني والله اللي خابر

ارفعي كف الطهارة يكفي انك تبتي
يستحي ربي يخلي كسري بلا جابر

يا صباحات الصلف ما هبت وانتي هبتي
ما معك حيلة بدرب المحتسب والصابر

معتصم باللي كتابه زاد عن مكتبتي
واطلع بوجهٍ يجملني وروح مثابر

شاكر وحامد وابشّر بالسؤال اجوبتي
مال منطوق التردد والتخاذل دابر

غير تكسير الهمم يالفضفضة وش جبتي
واجتماع اللي يلومون الزمان الغابر

ايه يا بسمة تحت شمس الحقايق ذبتي
اجبروها بالمجامل لين شاه الصابر

الكلام الباهت اللي ما يفك رقبتي
يوم يسفه قايله لا ينتفخ ويكابر

ما تشل الكلمة اللي ما تحس بكبتي
جات كنها كلمة ابشر بالعوض من عابر

[سلطان بن مهراس @IbnMhras]

عمار يا ذكريات العام وبشوره
سلوة عيونٍ تداري خنقة العبرة

حتى المكان اللي احتل الحشا نوره
باقي هبوبه تشل الصوت والنبرة

[سلطان بن مهراس @IbnMhras]

والله مابي من الدنيا وانا ممّل
الا عزومٍ عزاويها ورا الهقوة

متجمّل ان جيت واليا غبت متجمّل
ينقون غيري وقسمي خيرة النقوة

[سلطان بن مهراس @IbnMhras]

الله ربي وربك يا كثير الملام
حبال وصلك حيايًا في يدي تلتوي

اما تجيب الكلام اللي عليه الكلام
والا فمنك وورا يا جعل منتب قوي

يا سعد عيني مع اللي لا نصيته وقام
حتى الوعر من بطانيجه معه يستوي

كنّه يسوق البشاير لا بدا بالسلام
بس ابتسامه يزيد الدافع المعنوي

[سلطان بن مهراس @IbnMhras]

يا عدو الغايبين وعشير الحاضرين
السلامة والبقا بالتراحيب فتكت

لا تغرّك نظرة الجهل من عين الفطين
ليتها تمشي وبمزارق الجهل سلكت

العذر من ربي اوفى من العذر السمين
لا تمثنا صدري الرمي ما قلت اوشكت

النفوس المومنة لا طغى الفاسد تبين
مثل حجة مطلق القوم بالحق انحكت

[عبدالله بن محمد المعاوي @ab_almaawi]

يجوني قل الصدق وقل الصدق يا رجال
وانا لو اقول الصدق صدق زعلوا مني

سلطان بن مهراس ✍️
@BinMhras

[سلطان بن مهراس @IbnMhras]

اطربيني يا هجوسي بمقطوعة
واتركي مكروفة الهرج ومضاغه

انزلي مثل الدوا لا صفا نوعه
ضمن تكوين التراكيب سوّاغة

شاعرٍ مع سجته ممتحن كوعه
وان بغا الراحة عطا كفه دماغه

لا اللسان اطرم ولا النفس ممنوعة
ولا الفواد اعمى ولا العين زوّاغة

همي ادرا سمعةٍ دوم مرفوعة
يوم كلٍّ همته ركزة شماغه

[سلطان بن مهراس @IbnMhras]

عساها من الاوهام والهم ماجورة
رسايل تعبر طرقتي كل ما سجت

[سلطان بن مهراس @IbnMhras]

الاربعة نادوك واعطيت واجزلت
وانا رغم تقصيري ارفع كفوفي

شيّلتني حملي وانا قد ما شلت
عافيتك اوسع لي ليا بان خوفي

هديتني دعوة وانا توسلت
دليتني كلمة تواسي شفوفي

ان جبتها عز الله اني تجملت
وان عفتها عيت تجرا حروفي

ان قلت كن ما كان غير الذي قلت
الناس ما بشرح عليهم ظروفي

[سلطان بن مهراس @IbnMhras]

يا جعل ماهوبه يا قلب العنا ويش انت شاري
غير النصيحة تعترض لك وتدري انها صحيحة

ليش المكابر وانت شفقٍ لها والجرح عاري
زيح الستار اللي بيعميك انا طالبك زيحه

يا لج صدري لجة البحر من تحت الصواري
رعد وبروقٍ تفضح الليل وتهيض القريحة