مصطفى پسرلى

[مصطفى پسرلى @MPasarlai]

څوک مو د حُسن روڼ فکرونه په حجاب پټوي
څوک مو د مينې تخيل نغمه، رباب پټوي

نوم د جنت اخلي خو درومي د دوزخ په لاره
په منبر وعظ کوي په بډه کښې محراب پتوي

مصطفی پسرلی
28/05/2026

[مصطفى پسرلى @MPasarlai]

پښې مو تڼاکې، او په وينو مو شو رنګ ګامونه
د منزل لاره د وطن هر انقلاب پټوي

ګُلونه وسول د ډک سیند پر غاړه وټوکيدل
باران په سوال غواړو او نور رانه دریاب پټوي

زه پسرلی یم په چمن کښې به ګُلونه سپړم
د خزان باد مو تل د غېږ ځینې ګلاب پټوي

مصطفی پسرلی
28/05/2026

[مصطفى پسرلى @MPasarlai]

د بل جنګ کښې دې مدام يم سوځولی
تا ليدلې خپله ګټه په پردو کښې

ورته ګوري چې غلام پسې روان دي
توپير نشته دلته مړو او ژوندو کښې

هیڅ ګیله له بل چا مه کړه پسرليه
پښتو نه ښکاري د نن په پښتنو کښې

مصطفی پسرلی

11/April/2026

[مصطفى پسرلى @MPasarlai]

بې له وېره انځور نشته ائينو کښې
ځکه وینو خپلواکي په ځنځېرو کښې

هر سړي ته د بې دینه په شان ښکارو
د دوئ دين دی صرف په ږېره او تسبو کښې

چې خپل واک ته ورسېږي سوله غواړي
بې له واکه خوښوي ژوند په جګړو کښې

مصطفی پسرلی

11/April/2026

[مصطفى پسرلى @MPasarlai]

چا وکړلې مزې او چا سرونه کړل قربان
په بيه د دنيا چا جنتونه کړل قربان

زما د بربادۍ دوښمنه واوره، تا ته وايم
تا واک ته رسېدلو ته نسلونه کړل قربان

د زړه ماڼۍ مې ړنګه له ارمانه ساه ختلې
وطنه چې يې ستا هسک ارزښتونه کړل قربان

مصطفی پسرلی
14/11/2025

[مصطفى پسرلى @MPasarlai]

د بل د در غلام یې اوس پر ما شولې واکمن
په زور د جهالت دې مکتبونه کړل قربان

د دې دور د حورو حریص هيڅ صرفه ونکړه
خپل عېش، عشرت لپاره یې خوبونه کړل قربان

وحشت دی پسرلیه بل څه نشته په وطن کښې
د وخت دې بې شعورو تاریخونه کړل قربان

مصطفی پسرلی
14/11/2025

[مصطفى پسرلى @MPasarlai]

د روان جبر نه خلاصون پکار دی
پند له تاریخ او د پرون پکار دی

لمر څړک وهلی دی رنآ به راشي
لږ انتظار د سباوون پکار دی

هسې نه بیا به پښيمان یې مُلا
اوس هم فرصت لرې بدلون پکار دی

مصطفی پسرلی
22/10/2025

[مصطفى پسرلى @MPasarlai]

څو به بندیان یُو په تیارو د جهل
د استعمار پر ضد پاڅون پکار دی

کرکه نفرت راځې له مينځه یُوسو
د آدم خان دُرخو مضمون پکار دی

د پرمختګ لار خو یوه لاره ده
د متعلم مکتب ته تلون پکار دی

مصطفی پسرلی
22/10/2025

[مصطفى پسرلى @MPasarlai]

د دې جبر نه خلاصون راته پکار دی
هسک تاريخ لکه پرون راته پکار دی

ويده نه شې د رڼا نخښې ښکاره شوې
ورک تورتم شه، سباوون راته پکار دی

مُلا ډېر به ننواتی ما ته راشې
وخت راغلی لږ بدلون راته پکار دی

مصطفی پسرلی
20/07/2025

[مصطفى پسرلى @MPasarlai]

مونږ له دې حصاره وځوو، ځان وباسوو
د يووالي يو پاڅون راته پکار دی

چې دا کرکې او تيارې د منځه یوسي
جوړ د مینې یو ژوندون راته پکار دی

پسرلیه پرمختګ بې زده کړي نه شي
د تعليم په لاره يون راته پکار دی

مصطفی پسرلی
20/07/2025

[مصطفى پسرلى @MPasarlai]

غزل

اوښکې مې وينې شوې په غم او ماتمونو کښې يار
وخت د مستيو مې تېرېږي په غمونو کښې يار

تر څو به غلي يو، د زړه حال به ويلی نه شو
مونږ د جهاد په نوم زنګېږو په دارونو کښې يار

مصطفی پسرلی
16/06/2025

[مصطفى پسرلى @MPasarlai]

زما په زخم زخم زړه دا مالګي مه راشينده
مدرسې جوړې شوې زمونږه مکتبونو کښې يار

ورکه ده لاره، ورک منزل، واک د مُلا ورسيد
ژوند د جنت په اميد کړو په دوزخونو کښې يار

د پسرلي د بیا راتلو هیله به شي ترسره
تیارې به ورکې شي روښانه مشالونو کښې يار

مصطفی پسرلی
16/06/2025

[مصطفى پسرلى @MPasarlai]

له پيړيو په جنګونو کښې سوځېږو
د منصور په څير په دار باندې زړېږو

د ازل کرښې یې مه بوله ناپوهه
ګرم پخپله یُو پرَدي ډول ته نڅېږو

بې تعليمه مو یو نسل را لوئېږي
بیا یوه پېړۍ په شا بېرته ستنېږو

مصطفی پسرلی
08/06/2025

[مصطفى پسرلى @MPasarlai]

په پردي ممبر ميينه شيخه واوره
د مُلا د لاسه ملا باندې ماتېږو

په زخمې زړه کښې مې وس د خندا نشته
د وطن پر موجوده حالت ځورېږو

پسرليه پښتنو کړې شملې هېرې
د تاریځ د پاڼو ګوره چې غورزېږو

مصطفی پسرلی
08/06/2025

[مصطفى پسرلى @MPasarlai]

دا درديدلی څاروان چرته درومي؟
دا بې منزله کاروان چرته درومي؟

زما په وران وطن کښې شپې نه کوي
د هسکو غرونو بازان چرته درومي؟

مصطفی پسرلی
06/12/2024