مشاري المطيري

شعر وشعور وأمواج ومراسي ،، وذكرى مرها سيل وبعثها

[مشاري المطيري @Misshari25]

عانقيني ما مداهيل القصايد
واقبلي للي ينقي كل درة

بعد لاح البرق يا خضر الجرايد
ونسمة الغربي على الديرة تجره

من غوى ماني مكلف بالشرايد
يأسره سلهام عين ونسف غره

كد تجاوزنا الطريق ابلا نشايد
قبل سبق الخيل تاطى كل جره

كل من غنى على المعواد عايد
لو قطع كل الدروب وقال مره

[مشاري المطيري @Misshari25]

البارق اللي لمحته حال دونه عسام
لو جفت القاع واصفرّت رياحينها

الصبر سجن الغريب اللي جفاه المنام
من دونه القوم تشقر حد سكينها

ان طابت النفس ما تنظر بعين الملام
تشوف الأيام مختلفة موازينها

ما كل لحيه كرامتها بشحم السنام
بعض العرب ما يبين الكحل في عينها
#مشاري_المطيري

[مشاري المطيري @Misshari25]

حفيد من ياقف له المجد باليوم الكبير
سيف الجزيرة وقايدها ،، وسلطانها

#السعوديه_العظمي

[مشاري المطيري @Misshari25]

ما تركت من الليالي غير شرهات الحنين
وكل ذكرى طافها العمر في صندوقها

انهزمت وكل ضيقة على وجهي تبين
المعارك مثل هاذي ما عرف طروقها

ما جنيت إلا الغرابيل لو ماني رزين
صرت مثل الغيمة اللي تلوح بروقها

كيف راحت معك الايام من قبل السنين
جفت رياض الهوى و طاح عذب عذوقها

#مشاري

[مشاري المطيري @Misshari25]

عقب تخدعك الهقاوي ينكشف وجه الحقية
غرتك بيض السحاب وبعدها خانك مطرها

لو تحث من الركايب كيف تلقى لك طريقة
فات نص الوسم شهرة زورها على حجرها

#مشاري_المطيري

[مشاري المطيري @Misshari25]

طالت مشاويرك وحفيت الأقدام
تطرد سراب يخدع بشوفة العين

ماهو بصاحي مير صحته الايام
وشربته المرّ المصفى على الشين

ومن غرت الدنياء وتكبير الاحلام
صارت له العزلة زهور وبساتين

من غاب ما ينشد ومن جاه ماقام
قفل تفاصيله وكل ،،، العناوين

#مشاري_المطيري

[مشاري المطيري @Misshari25]

أنا الليلة على ذكرى الهوى غنيت بالألحان
هلا مدري مراحب بس باقي شي ابي اقوله

على ضو القمر سامرت فكر وطاعت القيفان
من اللي خانته دمعة فراق و لاحدٍ حوله

[محمد ابن هرشان @mas_f16]

رفيق الدروب بسدّ وجهي ولا تنضام
تراني عن ادنى ما يكدّرك متنبّه

اعرفك من ايام الطفوله ذرا و حزام
ليا ضاق صدري شفت في خوّتك طبّه

لا تشغلك صدّات العرب تالي الايام
من يصدّ عنّي ما نشدته وش السبه

تعبت اتشرّه و المشاريه لو تنسام
جلبت الظنون و صارت تْباع بالحبّه

ما يلحق غياب الكفو يا كود سبع انعام
و على ما مضى له قافل الباب بالضبّه

ما اخاف الخصيم الواضح الصامل المقدام
اخاف الجبان اللايذ إن ما خشى ربّه

تدور الدواير و الظليمه على الظلّام
تبي تحرقه و يصالي الضوّ من شبّه

نفيس الذهب من لا درى به مهوب يلام
ملامي على اللي داريٍ به و عذربّ به

[مشاري المطيري @Misshari25]

طويت البعد في كف الليال الجرهدية دام
لنا حنت ديارٍ من غلاها ما نخليها

على #نجد الهوى يبعث مراسيلة مع الأنسام
يشابه حب حاظرها بذكرى مجد ماضيها

عشقها من عشقها والظروف تحدد الاحكام
تبختر كنها عذرى جمال الكون غاشيها

[جمال الشمري @aljamal__]

ابوي ...غيّاث الدخيل الجلاوي
….شيخي،ومزبان العروق وشجنها
والرقعة اللي في عباته تساوي:
…… كل البشوت اللي تطرّز عفنها !

[مشاري المطيري @Misshari25]

كنك مطر 🌧️ في ليلة #العيد حولت
جددت عهد الوصل عقب القطاعة

#كل_عام_وانت_بخير
#عيد_الفطر_المبارك

[مشاري المطيري @Misshari25]

تبعثرك الليال وتجمعك ذكرى بلا ميعاد
وتأخذك لمرابع مبطية ماجيت لحماها

وش اللي ردني من عقب ما صدرت يالميراد
ترا لا خابت الهقوة دروب البعد ترفاها

#مشاري_المطيري

[مشاري المطيري @Misshari25]

من قبل يا عد الروى واليوم يا عد الحنين
راحو هلك والذكريات تهب لك من كل صوب

كم من وليف واعده ولفه على جالك سنين
تفرقو من عقب عيا العود يعطيه اللعوب

#مشاري_المطيري

[مشاري المطيري @Misshari25]

تبعدك الديّر ويقرّبك شي بوسط الجوف
يابو طرفٍ لمع برق الحيا من نظرة عيونه

تيمم لك قصيدة من بعد سره بدا مكشوف
على حلمه يقرب هقوته ما تبعد ضنونه

شجاع ضاربٍ شلفاه في قلب العنا والخوف
بغى له حاجةٍ و سلوم ربعه حولت دونه

#مشاري_المطيري

[مشاري المطيري @Misshari25]

اقبلي مثل المهار اللي تداحم للحرابة
في نهارٍ يفرق الفرسان عن قلب الرعاعة

ما عقبك إلا حنينٍ اضلم الوقت وغدابة
تاه فكر العاقل اللي لايع الايام لاعة

#مشاري_المطيري

[جمال الشمري @aljamal__]

وان عذربك يا بجاد خبل ٍ مريبيش
____خلّه على .. شبه الجزيرة ... يناظر !
لاهل السيوف المرهفات المراهيش
____حمّاية الناموس ….. بدو وحواضر
وإن ضيّعه تاريخ « حمْر الطرابيش »
____ دلّه على تاريخ « حمْر النواظر » !

[مشاري المطيري @Misshari25]

@Alrayapoet يضمّ الارض من غر السحابة ماطرٍ همال
يساقي هالعروق اللي من اللهفة تمايله

عقب طول البطا عود وقوسه فوقنا يختال
يرحب بالشتاء يا شبة العيدان والدلة

#شاعر_الراية
#للشعر_بقية

[مشاري المطيري @Misshari25]

طاري للشوق ميعاد ،، يا عذب اللماء
مثل شوق الارض لا ضمها رش السحاب

حافظٍ لمشاهدك ورد واشعار وغلا
وما يشيب عن وصالك ولو شاب الغراب

#مشاري

[DR.AHMED ALMUTAIRI.. @Ahmed123Ah]

من سار في الارض جابراً للخواطر ، أدركته رعاية الله في جوف المخاطر .

[بندر الدويش @bdweesh]

يافلسطين من سته وسبعين عام
ماوقف لك نزيف ولا غفت فيك عين

جرحك اكبر من الي يلحقْونك ملام
وانتي اكبر من اللي عنك متغافلين

يافلسطين جعل النار برد وسلام
اصبري والله اللي يجزي الصابرين

بيجي يوم نجلي عن نظرك الظلام
ندري انه قريب وندري انه يقين

#فلسطين_تقاوم
#فلسطين_قضيتنا