تحلوت لي الجدات والغيّ واختفيت
مع إني من اهل السلم والوازع الديني !
وطيش الشباب يسرّع العمر والتوقيت
يحط القمر والشمس والجدي فـ يديني
يا بيت العنا قفى زمانك وأنا قفيت
أبا العمر يرجع مير ما عاد يمديني
عسى الدنيا تبسم لك وتصبح فرحتك روتين
وعساني كل ما اشتاق لـ لقاك القاك قدامي
من اول ما لمحتك لك شعور بداخلي للحين
يوديني البحر و يردني من البحر ضامي
احبك والذي خالق ضلوعي من سلالة طين
محبه فارقه ما تشبه الا بصمه بهامي❣️
كان الناس يدرون عن شيّ
أشيا ترا ماتدري الناس عنها
يدري بها الي يازن الشمس و الفيّ
مكفّن أسرار القلوب بكفنها
أنا بشر شتّى هموم البشر فيّ
و أن شفتني مانيب جزعان منها
ترا ماغير أضحك و أجاملكم شويّ
و آدمدم جروحٍ نبشها زمنها
مرّه زعول ادناة حاجه تبكّيه
ومرّه تقول إنه على طول راضي
أرتاح من صوبي وقل ماتخفّيه
عمر الغلا ماهوب عمر افتراضي !
قلبي لغيرك شي ماهوب ف ايديه
وأبعد عليه من السما للأراضي
الناس من بعدك هلا وأنت لبّيه
الحاضر أنت وماضي الناس ماضي
تدور الارض وْتمرّ السنين وتكثر الأحزان
وأنا للحين واقف عند حزنك، مِعلن حْدادي
ولا غرّتني الدنيا ومرّ الذاكره نسيان
وأنا اذكر يوم موتِك زين وانسى يوم ميلادي.