bacchuss 10452 km2❤️🌹❤️

يسقط… ماذا؟ (*) - تعرف ما الفرق بين اليوم والبارحة؟ - كانت أيام عز وخير وبركة - no -لكان شو؟ - إنت قول، عاملي حالك محلل استراتيجي… متل #جوني_غيتار: يبعتلو ما بيجيب خبرية مزبوطة! - أنا غير شي… بلا مقارنات أرجوك! - طيب جاوبني هلق: ما الفرق بين اليوم والبارحة؟ - بالماضي… كان في السوفيات… - كمان no - كان غير شكل الزيتون؟ - yiii عليك! - teb كعيت 🤷‍♂️ - من زمان يا أبو الحبايب… -إيه… - كان الشعار الطاغي هوي… - ولك أنطقها بقا! -… #يسقط_الاستعمار - هممم… - أَيْ نعم. تذكر معي: جونسون، نيكسون، بوش الاب، بوش الابن، اصحا تفكر اوباما أشطف زوم! - ما ننسى ريغن… - ننساه؟ ده كلام! هيدا أبو الاستعمار النيوليبرالي الحديث، ومهندس الحروب بالوكالة. تدمير الدول عبر الاقتصاد، دعم المليشيات المسلحة، وفرض الإملاءات العسكرية والنيوليبرالية على العالم الثالث. - والله كانت أيام مباركة. رزقالله ع هيديك الايام. - ما هيك؟ اشتقنا لكيسنجر وجولاته المكوكية… ولك كان استعمار organic عالقليلة! - طيب وهلقتنيّي؟ بعده الاستعمار موجود، وعلى ألعن. لا؟ - مش بالزبط!. هلق تطلّع هيدا البهيم، كيف داير العالم وحده… كيف بيحط هالضيوف ع كرسي التعذيب بالمكتب البيضاوي، قدام كاميرات المعمورة، وبينزل فيهم السفق … - لا، وبيطلعوا بالآخر، مبسوطين، بعد البهدلة. - إيه، بيعتبروا دوش المي الباردة #انجاز_تاريخي يا حرام! واسترجي قول انو مش انجاز تاريخي. - شو بيصير؟ - والله ليبعتلك #أحمد_رامي الجندرمة متل ما عمل مع الصحافي المطارد #حسن_عليق! - أحمد رامي؟ تاع «حيّرت قلبي معاك»؟ - لا تاع «يا مسهّرني»! وليه المدعي العام التمييزي الجديد! - آه، تاع البرنس يزيد. إي قول الحاج، كيف بدي اعرف؟ - برجع لسؤالي: ما الفرق بين اليوم والبارحة؟ - مش شايف فرق. ما اشبه اليوم بالبارحة. بعدنا مطرحنا. هيدا كلو امتداد للاستعمار! - لاااا… ما تغلط. فرقت منيح اليوم! - وين فرقت؟ مع الثورة الإسلامية صرنا نقول #يسقط_الاستكبار! هيدا كل شي… - شوووو! انت كمان؟ - أنا شو؟ - تشيّعت؟ - مش هيك القصة… أنا ماوي… - طيب تطلّعلي منيح يا ماوي إنتَ، بالرئيس اللي داعس الكوكب… - إلا إيران! - صحيح هو داعس الكوكب، وايران داعسته. بس مش هيدا الموضوع.. تفرّج منيح عليه وع ضيوفه. - شو بهم؟ ما أحلاهم. ضحكتهم رطل! - وشر البلية - لأنْ - ما يضحك! - هلق شو بدك؟ خلص يعني؟ بَحْ استعمار؟ ما بق فينا نقول: يسقط الاستعمار؟ - مبلى، فينا. بس إذا بدنا نكون دقيقين، اليوم صار شعار المرحلة… - خلصني، بدي روح نام! - صار شعار المرحلة #يسقط_الاستحمار! ———— (*) تحية الى زياد في ذكراه الاولى.