Shoor News / شور نیوز

فسبوکپاڼه

[Shoor News / شور نیوز @ShoorNews]

کندهار کې د ا.ا رهبر شیخ هبة الله اخونزاده د اختریزې وینا مهم ټکي:

۱: نړۍ غواړي افغانستان کې یو ځل بیا د دیموکراسۍ نظام رامنځته کړي، خو د دیموکراسۍ وخت تللی، او اوس اسلامي نظام حاکم دی.
۲: زموږ د تېرو ۵۰کلونو جګړه د ایمان او عقېدې پر بنسټ وه، دا چې اسلامي نظام حاکم دی نو جګړه هم پایته ورسېده.
۳: اسلام د انسانیت ژغورنې لار ده، خلک دې پرې ځان پوهه کړي او دیني عالمان دې له اختلافاتو تېر شي.
۴: ځینې خلک د امریکا په ملګرتیا ویاړي، خو تر ټولو لویه ظالمه همدا امریکا ده، پرون یې افغانستان کې ظلم کاوه او نن یې فلسطین کې کوي.
۵: د نشه يي توکو کښت مو د سیاسي موخو لپاره نه دی بند کړی، په اسلام کې جواز نلري نو ځکه منع اعلان شول.
۶: مسؤلین د ظلم لپاره نه؛ بلکې د شريعت او د خلکو حقونو تأمین لپاره مقرر شوي.
۷:په ټوله نړۍ کې اوسمهال یواځې افغانان د دین ساتونکي او مجاهدین دي، ښه او بریالۍ ازموینه یې ورکړه.
۸: په یو اسلامي نظام کې خیرغوښتل/سوال کول بده خبره ده، د همدې له امله مو خیرات غوښتونکي ټول کړل او معاشونه مو ورته حواله کړل.
۹: خپل خپل مسؤلیتونه باید پوره کړو، که تاسو کې اطاعت او موږ کې شفقت نه و، بدګماني وه نو دغسې نظام نه پاتې کیږي او امن له منځه ځي.
۱۰: نړۍ زموږ ملي یووالي او نظام نه شي برداشت کولی، ځکه خو سپکې سپورې او تبلیغات کوي.
۱۱: موږ ژمنه کوو چې د الله ج د دین خلاف یو قدم هم نه اخلو.
۱۲: موږ افغان مېرمنو ته عزت او حجاب ورکړ، بداخلاقي مو ختمه کړه، خو دوی (امریکا) فلسطین کې پر خلکو ټوپک نیولی او وژني یې. مګر موږ باندې تنقید کوي چې ښځې کار او تعلیم ته نه پرېښودل کیږي، یا حجاب اغوندي.
***

[Shoor News / شور نیوز @ShoorNews]

د پورونو له وجې،
هند کې د یوې کورنۍ ۷غړو ځان وژنه کړې.

د هند پنچکوله سیمه کې د یوې کورنۍ اوو غړو د پورونو له وجې د زهرو په خوړولو ځانونه مړه کړي.
د پونیت رانا په نوم یو عیني شاهد د انډیا ټودی ورځپاڼې ته وايي چې، "د شپې پرمهال له خپل ملګري سره روان و، چې یو ولاړ موټر یې ولیده، شپږ تنه پکې مړه وو او یو د زنکدن پرمهال ورته وویل چې له بانکونو زیات پوروړی دی، خپلوان یې شتمن دي خو له دوی سره یې مرسته نه کوله، نو ځکه یې پخپله او په ټولو زهر وخوړل."
هغه زیاتوي، " کله چې پولیس راغلل او دوی یې روغتون ته ورسول، وروستي تن هم ساه ورکړه."
په مړو شويو کې ۴۲کلن پربین متل، د هغه مور او پلار، مېرمن یې، دوه لورګانې او یو زوی شامل دي.
یادې پېښې په خواله رسنیو کې پراخ غبرګونونه پارولي.
***

[Shoor News / شور نیوز @ShoorNews]

مالیې وزارت:
نږدې ورځو کې به یتیمانو، کونډو او معلولینو ته د نغدې مرستو ویشلو لړۍ پېل شي.

د شهیدانو او معلولینو چارو وزارت د خپلې ایکس پاڼې له لارې خبر ورکړی، چې د ۱۴۰۴ مالي کال د لومړۍ ربعې (حمل، ثور او جوزا) نغدي مرستې به په راتلونکو ورځو کې د ټول هېواد په کچه، مستحقو یتیمانو، کونډو او معلولینو ته ووېشل شي.
په خبرپاڼه کې ویل شوي، چې مرستې به په نوبت‌وار ډول وېشل کېږي او ټول مستحقین به ترې برخمن شي.
د یاد وزارت د معلوماتو له مخې، په ټول هېواد کې ۶۸۵زره یتیمان، معلولین او کونډې ثبت دي چې له جملې یې ۳۹۵زره یتیمان، ۱۹۱زره معلولین او ۹۸زره کونډې دي.
***

[Shoor News / شور نیوز @ShoorNews]

د بیلاروس او پولېنډ سرحد یوه ځنګل کې شاوخوا ۲۰۰ افغانان بند پاتې دي

د بیلاروس او پولېنډ تر منځ په "برېسک" نومې صفري نقطه کې ۲۰۰ افغانان په خورا ناوړه حالت کې په ځنګل کې بند پاتې دي
د بند پاتې افغانانو په وینا، نه بېلاروس او نه هم پولېنډ ته پرېښودل کیږي، او د پولیسو له بد وضعیت سره مخ دي.
د دوی په وینا، خوراکي توکې ورسره ختمې شوي او اوسمهال د ژوندي پاتې کېدو لپاره واښه، د ونو پاڼې خوري او د ډنډونو اوبه څښي.
د معلوماتو له مخې، په ایسارو کسانو کې زياتره ټپیان هم دي.
دوی له سرپرست حکومت غواړي چې د مسلې حل لپاره جدي اقدام وکړي.
دا پوله له 2021 وروسته د سیاسي کشمکشونو، مهاجرتي کړکیچ او د اروپايي اتحادیې بندیزونو له کبله زیاته څارل کېږي.

[Shoor News / شور نیوز @ShoorNews]

له امریکا وروسته،
اروپايي ټولنه هم پر سوریې لګېدلي بندېزونه لېرې کوي.
د فرانسې خبري اژانس راپور له مخې، د اروپايي ټولنې ټولو ۲۷غړیو هېوادونو استازو هوکړه کړې چې پر سوریې لګېدلي بندېزونه لېرې او ډېر ژر رسمي اعلان وکړي.
پر سوریې لومړي پراخ بندېزونه د ۲۰۱۱ کال په ترڅ کې لګول شوي وو، کله چې د بشار الاسد رژیم پر ضد ولسي پاڅونونه پیل شول.
دا بندېزونه د بشري حقونو د سرغړونو، تاوتریخوالي، او د ولسي خلکو د ځپلو له امله لګېدلي وو.
***

[Shoor News / شور نیوز @ShoorNews]

د مبایل روږدو لپاره؛
امریکا کې یو نوي پېل شوي شرکت داسې مبایل جوړ کړی چې تشه ښیښه ده.
دغه آلې ته یې د میټافون نوم ایښی او بیه یې ورته ۲۰ډالر ټاکلی، خو په اصل کې مبایل نه دي او یواځې د ځیرک تلیفون بڼه لري.
دا د هغو کسانو لپاره جوړ شوی چې د موبایل پر استعمال روږدي دي، بار بار پر جیبونو ګوتې وهي او یا خالي لاسونه خوند نه ورکوي.
"میټافون" د سمارټ فون شکل او احساس په نقل کولو سره د تلیفون روږدي کیدو سره مبارزه او د تلیفون کارولو په اړه د صحي عادتونو رامینځته کولو کې مرسته کوي.
میتافون یو تکتیک تجربه وړاندې کوي، کاروونکو ته اجازه ورکوي چې د تلیفون کارولو فزیکي عادت پوره کړي.
***

[Shoor News / شور نیوز @ShoorNews]

جوبایډن په پروستات سرطان اخته شوی

بشپړ راپور په لنک کې،،
https://t.co/RqiAgq2B3l

[Shoor News / شور نیوز @ShoorNews]

جوبایډن په پروستات سرطان اخته شوی.

د امریکا پخوانی ولسمشر جوبايډن د پروستات پر سرطان اخته او هډوکو ته یې خپور شوی.
د رویټرز راپور له مخې، جوبایډن او کورنۍ یې له ډاکټرانو سره د درملنې پر لارو چارو غور کوي.
راپور کې راغلي، نوموړي دوه ورځې وړاندې وړاندې وروسته له هغه معاینات وکړل چې د تشو متیازو کې سیستم کې یې د سرطان ځینې نښې څرګندې شوې.
د هغه زوی Beau Biden هم په ۲۰۱۵ کې د سرطان له امله مړ شوی و.
پروستات سرطان د نارینه‌وو یو عام سرطان دی چې د پروستات په نوم غدې کې پیدا کېږي چې د مثانې لاندې پرته ده او د سپرم د تغذیې لپاره مایع تولیدوي.
د دغه سرطان له امله ناروغ ته د تشو متیازو زیاتوالي ستونزه راولاړیږي، مني کې وینه وي،د شا، مثانې او پښو درد هم ورسره وي، او د پښو بې بې حسي رامنځته کوي.
***

[Shoor News / شور نیوز @ShoorNews]

د ایران مشهد کې دا.ا قونصل فیضان الله ناصري نن سهار د زړه سکتې له امله مړ شوی.
لوړپوړي ط.الب چارواکي احمدالله وثیق د خواشینۍ ترڅنګ د هغه مړینه تایید کړې.
فیضان الله ناصري د ا.ا اړوند (الامارة عربي) ویبپاڼې چلونکی پاتې شوی.
د ایرنا اژانس د رپوټ له مخې، ناصري له تېر کال راهیسې د مشهد سرکنسولګرۍ د سرپرست په توګه دنده ترسره کوله.
د ایران بهرنیو چارو وزارت د شمال ختیزې څانګې مشر احمد معصومي پر دې مناسبت د تسلیت پیغام خپور کړی او ویلي یې دي، چې پر مرګ یې خواشینی دی.
***

[Shoor News / شور نیوز @ShoorNews]

هېواد کې د ملاامانو او اذان کوونکو لپاره له جوماتونو څخه کورونو ته د برښنا تارونه غځول منع اعلان شول.

د افغانستان برېښنا شرکت تجارتي رئيس ښاغلي امير عبدالله جهاند په یوه ویډیويي پیغام کې ویلي چې، د جوماتونو لپاره ځانګړي شويو مېټرونو برېښنا؛ يوازې د همدې عبادت‌ځايونو د روښانتيا، اوبو او اړونده چارو لپاره کارول کېږي.
هغه زیاتوي چې، له دې مېټرونو برېښنا څخه هر ډول ګټه اخيستنه په کلکه منعه ده.
دا په داسې حال کې ده چې تېره مارچ میاشت کې د ا.ا مشر شیخ هبة الله اخونزاده له لوري هېواد کې د جوماتونو د برښنا لګښتونه معاف شول.
هغه له دولتي ادارو غوښتي وو چې په اینده کې د یادو لښګتونو د تادیې غوښتنه نه کوي خو دقیقه څارنه دې کیږي، ترڅو د مسجدونو برق په نورو ځایونو کې استعمال نه شي"
***

[Shoor News / شور نیوز @ShoorNews]

د نړۍ تر ټولو بې وزله ولسمشر مړ شو.

د یوروګوای هېواد (حوزی موجیګا) چې د نړۍ تر ټولو بې وزله ولسمشر ګڼل کېده، د سرطان له امله په ۸۹کلنۍ کې ومړ.
د راپورونو له مخه، هغه خپله ټوله شتمني پر بې وزله خلکو ویشلې وه چې د ژوند تر پایه په یوه ساده کور کې اوسېده او یو عادي موټر یې درلوده.
د یوروګوای اوسني ولسمشر (یاماندو اورسي) ویلي چې، نوموړي خپلو بچیانو ته شتمني نه؛ بلکې مینه او ویاړ پرېښوده.
یوروګوای د جنوبي امریکا یو وړوکی او پرمختللی هېواد دی چې اقتصاد یې پر کرنه، مالدارۍ او خدماتو ولاړ دی. دا هېواد له برازیل او ارجنټاین سره ګډه پوله لري او د دیموکراسي، زدکړې، او بشري حقونو له پلوه ښه نوم لري.
***

[Shoor News / شور نیوز @ShoorNews]

ویرات کوهلي هم له ټیسټ کرکټ څخه تقاعد اعلان کړ.
کوهلي د ټیسټ په ۱۴کلن لوبیز ژوند کې ټولې ۱۲۳ سیالۍ ترسره کړي او ۹زره۲۳۰ منډې لري، چې په ۶۸لوبو کې یې لوبډلمشري هم کړي.
هغه ویلي، "دا سخته پرېکړه ده، مګر ښه احساس کوم او ډېرې خاطرې مې ورسره تړل شوي.
دا په داسې حال کې ده چې یوه اونۍ وړاندې د هند کرکټ لوبډلې کپتان روهیت شرما هم د چهارشنبې په ورځ له ټیسټ کرکټ څخه د تقاعد اخیستلو اعلان وکړ.
ټاکل شوې ده چې هند د له جون میاشتې تر جولای پورې په انګلستان کې پنځه ټیسټ لوبې وکړي او اوس د ټیسټ ټیم لپاره نوي کپتان ته اړتیا لري.
***

[Shoor News / شور نیوز @ShoorNews]

هېواد کې د شطرنج لوبې تر امر ثاني وځنډول شوې.

د افغانستان بدني روزنې او سپورت ادارې مسوولین وایي، چې د شطرنج لوبه د شرعي ملاحظاتو له امله ځنډول شوې ده.
د مسوولینو په خبره، د دې لوبې په اړه یې شرعي څېړنې پیل کړې، چې په بشپړېدو سره به یې د شطرنج فدراسیون د فعالیت او نه فعالیت په اړه وروستۍ پرېکړه وشي.
شطرنج چې شاهانه لوبه بلل کیږي، د نورو هېوادونو په څېر افغانستان هم خپله لوبډله درلوده او بېلابېلو هېوادونو ته د سیالۍ لپاره یې سفرونه کول
***

[Shoor News / شور نیوز @ShoorNews]

ډونلډ ټرمپ:
هند او پاکستان پر اوربند سلا شوي دي.
د امریکا ولسمشر ډونلډ ټرمپ پر خپله ټولنیزه شبکه «تروت سوشیال» لیکلي چې، "هند او پاکستان پر اوربند سلا شوي دي"
هغه ویلي چې دغه هوکړه د امریکا د منځګړو د هڅو په نتیجه کې شوې ده.
ټرمپ له دې هوکړې خوښي څرګنده کړې او هیله یې ښودلې چې دا به د دواړو هېوادونو ترمنځ د تاوتریخوالي کمېدو ته لاره هواره کړي.
بلخوا، د هند او پاکستان بهرنیو چارو وزارتونو هم منلې چې اوربند رامنځته شوی.
***

[Shoor News / شور نیوز @ShoorNews]

کینیا کې د حاجي ظاهر قدیر محکمه بلې اوونۍ ته وځنډول شوه.

د راپورونو له مخې، د تېر جمهوري نظام پارلماني مرستیال حاجي ظاهر قدیر چې د کینیا یوې محکمې ته نن حاضر شوی و، محکمه یې بلې اوونۍ ته وځنډول شوه.
قاضیان وايي چې د قضیې اسناد لا بشپړ نه دي او له بشپړېدو سره سم به ترې پوښتنې ګروېږنې پېل شي.
د راپور په حواله، د امریکا له مخدره توکو سره د مبارزې ادارې یو مامور نیکولاس ډي‌فرانسیسکو له خوا په ثبت شوي شکایت کې ظاهر قدیر «د نشه‌يي توکو د واردولو دسیسې او درنو وسلو لرلو» په تور تر څار لاندې دی.
خو وکیل یې یاد تورونه بې بنسټه بولي او د نوموړي نیول کېدل یوه سیاسي دسیسه ګڼي.
بلخوا، نایروبي ټایمز لیکلي چې امریکايي چارواکو د رسمي دیپلوماتیک یادښت له لارې د ښاغلي قدیر د ورسپارلو غوښتنه کړې ده.
نوموړی چې د قطر هوايي شرکت الوتکه کې نایروبي ته ورغلی و، له رسېدو سره سم د اپریل په ۱۴مه نېټه ونیول شو.
***

[Shoor News / شور نیوز @ShoorNews]

د هېواد څلورو زونونو کې کرنیز کمپلېکسونه جوړیږي.

اقتصادي کمیسیون څلورو ولایتونو کې د شپږو کرنیزو نمایشي او ترویجي کمپلېکسونو جوړولو طرحه تائید کړه.
د اقتصادي معاونیت د خبرپاڼې له مخې، "دغه کرنیز کمپلېکسونه هرات، هلمند، ننګرهار او بلخ ولایتونو کې په ۴زره ۴۷۹ جریمه ځمکه کې جوړیږي او کروندګرو ته به د عصري او میکانیزه کرنې په برخه کې غوره خدمات وړاندې کوي."
بلخوا، د کرنې، اوبو لګولو او مالدارۍ وزارت مرستیال فضل باري فضلي وایي، چې د هېواد ۸۰ سلنه وګړي په کرنه بوخت دي او د کمپلېکسونو جوړول یو مثبت ګام دی.
***

[Shoor News / شور نیوز @ShoorNews]

د سوریې ولسمشر احمد الشرع په لومړي ځل، فرانسې ته په یوه رسمي سفر ورسېده.
د فرانسې خبري اژانس راپور له مخې، نوموړی به د دغه هېواد له ولسمشر ایمانویل ماکرون سره د سوریې پر بیارغونې او اقتصادي همکاریو لیدنه ترسره کړي..
فرانسه له هغو هېوادونو څخه ده چې د سوریې د جګړې پر مهال یې د اپوزیسیون ملاتړ وکړ او د سوریې سفارت یې په پاریس کې د بشار الاسد مخالفو سیاسي استازو ته وسپاره.
***

[Shoor News / شور نیوز @ShoorNews]

ننګرهار کې په ۴۵۰ جريبه ځمکه د دولتي ادارو کمپلکس جوړيږي.
ننګرهار کې په ۴۵۰ جريبه ځمکه د دولتي ادارو د کمپلکس جوړېدو په موخه د ګډو ادارو تخنيکي ټيم په څلورو ځايونو کې لومړنۍ سروې تر سره کړه، چې د ولایت مقام له هدايت وروسته به مناسب ځای وټاکل شي.
د ننګرهار رسنیز دفتر لیکلي چې، د اداري کمپلکس جوړېدو طرحه د ۱۳۹۲ کال د ماسټر پلان برخه ده، چې په تطبيق سره به يې ټول سکتوري رياستونه، مستقل آمريتونه، قونسلګرۍ، بانکونه او نورې ادارې په يوې واحده ساحه کې فعاليت پيل کړي.
د معلوماتو له مخې، دغه سروې د ولایت مقام، کانال، جلال اباد ښاروالۍ، ښار جوړونې او کرنې رياستونو تخنيکي ټيم په ګډه تر سره کړې.
***

[Shoor News / شور نیوز @ShoorNews]

د پاپ فرانسیس موټر غزې ماشومانو ته د ګرځنده کلینک په توګه سپارل کیږي.

واتیکان د پاپ فرانسیس د وصیت له مخې، د هغه موټر د غزې ماشومانو ته د ګرځنده کلینک په توګه سپاري.
دغه موټر چې (پوپ مبایل) نومیږي، اوس مهال د Caritas Jerusalem او Caritas Sweden لخوا د طبي تجهیزاتو لکه واکسینونه، د تشخیص وسایل، اکسیجن، او درملو یخچال سره سمبالېږي، ترڅو د جګړې له امله زیانمنو ماشومانو ته روغتیایي خدمتونه وړاندې کړي.
د راپورونو له مخې، کله چې اسرایلي ځواکونه غزې ته د بشري مرستو اجازه ورکړي، دغه موټر به هم یادې سیمې ته داخل او پر فعالیت به پېل وکړي.
د نړۍ د کاتولیکانو مذهبي مشر پاپ فرانسیس دوه اونۍ وړاندې د ۸۸ کلونو په عمر ومړ.
پاپ د سینه بغل له امله له کمزورۍ کړېده چې له همدې امله نږدې یوه میاشت په روغتون کې بستر و
***

[Shoor News / شور نیوز @ShoorNews]

د چین دونګ فینګ اډي موټرز شرکت استازي د صنعت او سوداګرۍ وزارت له معین مولوي احمدالله زاهد سره د لیدنې پرمهال افغانستان کې د موټرو د تولید برخه کې د ۵۰میلیونه ډالرو پانګونې ته لېوالتیا ښودلې.
د صنعت او سوداګرۍ وزارت وايي، چې یاد شرکت پلان لري، په څلورو پړاوونو کې د درې نیمو
کلونو په ترڅ کې دغه پانګونه ترسره او په کال کې د ۲۰۰۰ موټرو د تولید ظرفیت رامنځته کړي.
د یاد شرکت استازي ویلي، چې د دې پانګونې له لارې به له ۵۰۰ تر ۷۰۰ کسانو ته د کار زمینه برابره شي او موټر به د قسطونو په بڼه هم پلورل کېږي.
د خبرپاڼې له مخې، دغه شرکت غواړي افغانستان کې بسونه، امبولانسونه، تېز رفتاره او باروړنکي موټرونه تولید کړي او آن په قسطونو یې افغانانو ته ورکړي.
مولوي زاهد د دغې پانګونې هر کلی کړی او افغانستان یې د خوندي او ګټورې پانګونې لپاره مناسب ځای بللی دی