من كل محافظات سوريا، من كل مكوناتها، من كل مكان متواجدين فيه، هدفنا واحد.. حماية الهوية السوريّة.
للانتساب:
https://t.co/y44WRpKtdM
#حركة_الأمة_السورية#سوريا#الهوية_السورية
الانفلات الأمني اللي عم نعيشو اليوم بسوريا هو واقع مؤلم عم يطال الكل بدون استثناء، نتيجة سنين الحرب الطويلة، وفشل الحكومة المؤقتة، بس المؤلم أكتر هو "انتقائية التعاطف" وتسييس الجرائم اللي عم تتحول فيه أي حادثة بتمس شي أقلية لقضية رأي عام وبتطلع البيانات، ودعوات الحماية، وبنفس الوقت حوادث مشابهة بالمدن الكبرى متل حلب ودمشق بتمر كأخبار عابرة ما بتاخد نفس المستوى من الضجيج رغم فداحتها.
بعض الأحداث عم تكشف قديش نحن كمجتمع سوري هش، وجرنا للخطاب الطائفي قديش سهل، وعم يتم اختزال الفوضى الأمنية بـ "مظلومية خاصة طائفية"، وهاد الشي للأسف عم يعمّق الشرخ المجتمعي وعم يمنعنا نشوف الصورة بشكل كامل: نحن كلنا سوريين شركاء بهاد الوطن وشركاء بدفع تمن غياب القانون وانتشار الفوضى.
المجرم ما عم يدور على هوية الضحية الطائفية، والتنديد بأي حدث ما لازم يكون مرتبط بهوية الضحية أو الجاني ولا ببيانات فئوية. التضامن الحقيقي بيبلش وقت نغضب لأي سوري بينخطف، ولأي سوري بيتعرض لاعتداء أو سرقة ونطالب بالمحاسبة والأمان لكل مواطن سوري، بدون تصنيف ديني أو طائفي.
الاعتداء اللي صار على كنيسة سيدة السلام بحمص اللي أكيد هو شي مرفوض بس كان لغاية السرقة مو استهداف للمسيحيين بشكل خاص، حتى هوية المعتدين مو معروفة بالأساس لليوم واللي صار سببه واحد: "الانفلات الأمني".
تغيير هاد الواقع مطلب سوري مو "مسيحي" أو "علوي" أو "درزي" والخطابات الطائفية، ومطالبات الحماية الدولية ما رح تحل هاد الواقع، الحل ببناء دولة قانون ومؤسسات تكون قادرة على حماية كل مواطنيها بدون تمييز وهاد الشي أكيد مسؤولية الحكومة المؤقتة بالدرجة الأولى ومسؤولية رجال الدين والإعلاميين من كل الطوائف بوقف الخطاب الطائفي والتحريضي بين السوريين.
#حركة_الأمة_السورية #سوريا_لكل_السوريين #سوريا
دعوة لحماية المسيحيين من شو؟
الخطف والسرقة والتجاوزات والانفلات الأمني، كلها اليوم أمر واقع عم يعاني منّه السوريين، بمختلف طوائفهم وانتماءاتهم.
السوريين كلهم بحاجة لتغيير هاد الواقع، والتغيير ما بيصير لا بالخطابات التحريضية، ولا بالهجوم على الآخر، ولا بطلب الحماية الدولية، وإنما ببناء دولة قانون ومؤسسات، قادرة على حماية جميع مواطنيها دون تمييز.
الحكومة لحد الآن ما قدّمت حلول فعلية على المستوى الأمني وبالمقابل المؤسسات الدينية بمختلف انتماءاتها ما عم تقوم بدورها الكافي للحدّ من الاحتقان الطائفي ، على العكس عم تساعد على تأويجو .
المؤسف أكتر هو أديش نحنا كسوريين هشّين، ولحظيين بمواقفنا، وأديش سهل ننجرّ وراء الخطابات الطائفية والأقرف من هيك، حجم الطائفية عند كتير من الناس، وللأسف بعضن أصدقاء.
الدفاع عن حقوق طائفتك ما لازم يكون على حساب حقوق الآخرين ورفض الطائفية ما لازم يكون مرتبط بهوية الضحية أو الجاني.
اللي صار مع المطران مرفوض ، وسببه واحد أنفلات أمني ومانو هجوم ضد المسيحيين.
كل يوم بسوريا في عشرات السنة المسلمين اللي عم ينخطفوا..
صار التملق في سوريا خلال سنين حكم البعث ثقافة رسختها السنين الطويلة، وكانت بمثابة "غريزة البقاء بالغابة" بتضمن لصاحبها الأمان والترقي الاجتماعي وما كانت بس مجرد سلوك فردي عابر.
اليوم وبعد تغير السلطة، فجأة عم نرجع نشوف هي الظاهرة، فنفس الوجوه اللي أتقنت فن التلون بالسابق، عم ترجع تهندس شكلها ومفرداتها لتناسب المرحلة الجديدة، كمحاولة لحجز مقعد بالصفوف الأولى.
رموز القوة والهيبة بالشارع بقيت نفسها بس أدواتها تغيرت، فمبارح كان اللي بيركب "مرسيدس شبح" سودا بيعطي طابع المسؤول المهم، شخص الكل بيحسبلو حساب وبيسمع كلمتو، خصوصاً إذا كان مع مرافق عم يناديه "سيدي" أو صورة للأسد أو شعار لحزب البعث على بلور السيارة. اليوم عم يتكرر نفس السيناريو تماماً بس بلون مختلف، "التاهو" بلشت تلعب دور "الشبح"، ولقب "سيدي" صار "شيخي"، وبدل صورة الأسد انحطت عبارة "لا إله إلا الله" أو شعارات دينية. بهالطريقة البسيطة، بيقدر الشخص يصنع لحالو هيبة مصطنعة ومكانة اجتماعية جديدة بتعطي رهبة لأي حدا بيفكر يتصادم معو.
كامل المقال:
https://t.co/kxaKvQ7xqj
في سؤال جدلي انطرح كتير: سوريا دولة بلا أمة أم أمة بلا دولة ؟
كتب بهاد الموضوع المحاضر بجامعة ادنبره توماس بيريه وهو محاضر في الدراسات الإسلامية والشرق أوسطية دراسة كاملة باللغة الفرنسية وتمت ترجمة الدراسة في معهد العالم للدراسات.
الدراسة بتعتبر أنو التنوع الطائفي والديني مو سبب رئيسي لعدم الاستقرار بسوريا والمشرق وذكر مثال ليبيا اللي فيها انسجام طائفي وديني كامل ومع هيك الوضع بليبيا مشابه للوضع في سوريا، وتركيا رغم انها قدرت تخفض التواجد المسيحي للحد الأدنى ببداية القرن العشرين بس تركيا فيها تنوع طائفي سني - علوي وحتى انو نسبة العلوية في تركيا أكبر من النسبة الموجودة في سوريا بالنسبة لعدد السكان ومع هيك البلد مستقر، وقدر يعمل نهضة اقتصادية كبيرة وما تأثر بتقارب النسب الطائفية.
منستنتج إنو التنوع الطائفي مو هو العامل الأساسي بالإخفاق والفشل ببناء الدولة في سوريا.
كامل المقال:
https://t.co/NndobbLjWG
أي انتقاد لعضو بمجلس الشعب عم يواجه فوراً استنفار وهجوم من أنصار السلطة. هاد الشي سببو الجهل السياسي اللي خلّفتو عقود من حكم البعث، واللي خلت كتير من السوريين ما يفرقوا بين السلطات التشريعية والتنفيذية والقضائية، ويعتبروا إنو عضو مجلس الشعب هو جزء من الحكومة، وإنو أي نقد إلو هو هجوم على الدولة كلها.
الحقيقة إنو دور مجلس الشعب الأساسي هو مراقبة الحكومة ومحاسبتها، مو يكون امتداد إلها، والمفروض يضم أعضاء مختلفين بيعبروا عن تنوّع السوريين. بس اليوم ما منقدر نلوم المطبّلين الجدد كتير على هاد الخلط؛ لأنو الكل بيعرف إنو المجلس الحالي شكلي وما بيمثل فئات الشعب وتوجهاتو، وأغلبيتو الساحقة من تيار سياسي وفكري واحد، فما رح نشوف فيه اختلافات حقيقية بالآراء متلو متل "مجلس التصفيق" اللي قبلو.
لبين ما يصير عنا بيوم من الأيام مجلس شعب حقيقي بيمثل كل السوريين، لازم نتعلم نمارس السياسة برقي ونتقبل النقد بدون شخصنة ومهاترات، لأنو مو منطقي أبداً تكون عم تأيّد ملاحقة المحتوى الهابط وبنفس الوقت عم تسبّ وتشتم بأعراض الناس لمجرد إنهم انتقدوا.
#حركة_الأمة_السورية #سوريا #سوريا_لكل_السوريين
عبد الله الغنوم وصل مجلس الشعب بسبب قوة برنامجه الانتخابي اللي بيشوف أولية سوريا اليوم لبس المرأة ومحاربة قعدتها بالقهاوي وضرورة تسلح الشعب والاستعداد للجهاد.
صاحب مقولة: "أمة لن تفارق سلاحها بعد اليوم" هو اليوم نائب دعا لشي بيتعارض مع دعوات حصر السلاح بإيد الدولة قبل أكتر من سنة يعني قبل ما يصل للمجلس.
وجاينا اليوم بعد ما قوي صوتو أكتر وصار عضو بمجلس الشعب ليعلمنا الأخلاق ويدعو لحملة لملاحقة اللي سماه "البثوث الهابط". طيب يا ترى التحريض على حمل السلاح والعنف يعتبر بث غني ومفيد؟ ولّا دعوة المرا السورية لتجنب القعدة بالمقاهي والاختلاط بث محترم؟
محرض على العنف، ذكوري، عدو للنساء، مو هو اللي بيقيم محتوى البث إذا كان هابط أو لأ، ببلد الأولية فيه اليوم للأمن والحفاظ على السلم الأهلي وتحسن الوضع الاقتصادي مو تقييد حرية المواطنين.
البث الأخطر اليوم على المجتمع السوري واللي بيشكل تهديد للسلم الأهلي هو البث التحريضي الطائفي، وهو اللي بيتسوجب التعامل معو، مو رقّاصة ولا تافه على التيك توك.
#حركة_الأمة_السورية #سوريا #سوريا_لكل_السوريين
تخيّل إنك تكون ماشي بوحدة من سهول البادية السورية، وتشوف من بعيد غزال عم يركض بخفة بين التلال، هاد الكائن كان دائماً أيقونة للجمال والرشاقة بالشعر السوري ورمز حاضر بالحكايات الشعبية، بس هاد الكائن اللي ألهم الشعراء لقرون اليوم عم يواجه معركة وجود وتحديات كبيرة وببعض المناطق هو بالفعل صار مهدد بالانقراض.
انقراض الغزال ما بيعني اختفاء حيوان جميل من الطبيعة بس لأنو كل نوع من الغزلان إلو دور ضمن التوازن البيئي، وضياعو بيعني بتر حلقة مهمة من المنظومة الطبيعية المتوازنة.
الغزال السوري ما عم يغادر جباله وباديته طوعاً، إنما عم ينجبر على الاختفاء تحت ضغط الرصاص وتدمير البيئة. إنقاذ اللي تبقى من هي الثروة الطبيعية اليوم هو اختبار حقيقي لوعينا ومسؤوليتنا تجاه هي الأرض؛ فإما نصون هاد الإرث الحي للأجيال القادمة، أو نكون جيل عم يشهد نهاية حكاية الغزال بسوريا.
كامل المقال مع المصادر:
https://t.co/5vXRrB2Lzq
عم تنتشر صور وفيديوهات بتوثّق انتهاكات واضحة لعمق البادية السورية من سياح من الخليج العربي عم يمارسوا صيد جائر وعشوائي لمجرّد التسلية، وعم يستهدفوا طيور وحيوانات برية نادرة ومهددة بالانقراض، وهاد الشي مستحيل يقدروا يعملوه ببلادهن.
المفارقة إنو بأغلب دول الخليج (متل السعودية، الإمارات، وعُمان) الصيد فيها مشروط بتراخيص رسمية ومحصور بأوقات ومناطق محددة، وممنوع استخدام أدوات معينة أو لمس الأنواع النادرة، وأي مخالفة بتكلّف عقوبات وغرامات قاسية. عنا بسوريا، رغم وجود القانون رقم 14 لعام 2023 اللي بيحط ضوابط مشابهة، بس التطبيق على الأرض غايب، والكل عم يصطاد ويوثق صيده عيني عينك على السوشال ميديا بلا أدنى مساس أو محاسبة.
الخطورة مو بمجرد قتل طير أو غزال، فالبادية محطة عبور واستراحة أساسية لمواسم هجرة الطيور، واستنزافها بهالشكل عم يضرب السلسلة الغذائية بالكامل. تصفية المفترسات الطبيعية والطيور الجارحة وحتى الضباع بيفتح الباب لانتشار القوارض والآفات وتخريب التربة والغطاء النباتي، وصولاً لانهيار التوازن البيئي اللي عم تدفع تمنه أرضنا وشعبنا.
باديتنا بتضم محميات رعوية وطبيعية انشغلت عليها سنين، ومحدا عارف اليوم شو عم ينتهك منها بالضبط بهالفوضى. المطلوب اليوم تحرّك فوري وحاسم يطبّق القانون بجدية ويوقف هالاستباحة المفتوحة قبل ما نخسر إرثنا البيئي ونقضي على اللي تبقى.
#حركة_الأمة_السورية #سوريا #البادية_السورية #سوريا_للسوريين
@Alawiyeon@syrianing شو دخل العلم بالعلويين ما فهمت أساسا وقت تم تصميمو واحد من هي النجوم بترمز للعلوية، عندك خبر؟
يعني إذا رفعتو انا وعملت جريمة بصير العلم هو المجرم؟
@Alawiyeon@KinanMerhi https://t.co/UKhvhy6Zpi
هدول كلهن سنة كمان؟
الثورة ثورة سورية ضد نظام ديكتاتوري وامثالك هنن أكبر ضرر للعلويين وقت بتحشرهن مع الديكتاتور الهارب