"كنت احاول اقسم الخبزه على كل الايادي" ..
من اجمل القصائد للشاعر صالح الدهمان الظفيري يعبر بها عن حنينه للماضي :
اذكر اني يوم كنا صغار .. والدنيا قصيده
كنت اداعب ضحكة النسمه على قذلة بلادي
واذكر اني كنت اولّع .. شمع لليل وعبيده
وارسم بلون الفجر حلمً عشقته من عنادي
واذكر ان الناس وانتي والنفل وعيون عيده
واغنياتً جددت من طيبها عشق البوادي
واذكر اذكر كنت اسولف للمطر حلمي واعيده
واترك عيوني تسافر للفضا والشوق زادي
واتذكر والشتاء يرمي .. على كتوفي جليده
كنت احاول اقسم الخبزه على كل الايادي
للنخل ياما حكيتك وان تجاهلني جريده
وللامل ياما خذيتك وان تعثر بي جوادي
آه يا ذكرى محتها .. لعنة الريح العنيده
وش بقى للناس لأمي قريّتي لصوت المهادي
وش بقى من صوت جدي لا مسح وجهي بإيده
كانت عيونه تردد .. لا تأمّن سيل وادي
ما عصيت لكن الشاعر .. تعلق من وريده
صوته المخنوق اعطى للصدى شهقة منادي
"عادة اصحاب الرخاء مثل عادات البنوك" ..
ابيات للشاعر نايل بن سهو يتحدث بها عن الجوانب السلبيه للصداقة بصور شعرية فريدة :
الليالي مرةً بين ورد وبين شوك
ليتها بالعمر مرة تصير محايده
وابتسامات المقادير للوجه الضحوك
ما تخلي شبه اثر للجروح الكايده
لا تخاف وجيه الاعداء لا من حاربوك
حرب الاصحاب اسوء من الحروب البايده
للرفاقة حق ظاهر مثل حق الصكوك
ولعت من دونها روس نارً كايده
خوةً تبنى وسيسانها عطني ودوك
مالها قيمة مثل اي حاجة زايدة
ليه ادور من وراها حسن سير وسلوك
يوم اشوف ان معرفتها قهوةً صايده
ما تساورني على رفقة الطيّب شكوك
واحدً حافظ طريقه وماسك سايده
عادة اصحاب الرخاء مثل عادات البنوك
ما تخدمك لين تطلع وراك بفايده
@nailaldafiri
"بيت الكرم" ..
تغير احوال البيوت المعروفه بالكرم والعطاء والتي ياتيها الرجال الاخيار من كل حدبً وصوب الى حالة سيئة يكون امراً مؤسفاً، يصِفها الشاعر الكبير مطيع العوني ببيتين تعتبر عن قصيدة :
يا حيف يا بيت الكرم يا اسماعيل
دارت به الدنيا مثل ما أنت شايف
من عقب ماهو مدهلٍ للرجاجيل
اليوم أصبح .. مرتعٍ للهدايف
"كنك اللي رمى البركة بصّم الحجر" ..
ابيات غزليه جميله للشاعر الشاب ياسر العسكر :
يا حنين الاغاني يا ارتجاف اللحون
يا سكون الليالي يا انتعاش الفجَر
يا سخيف المحاني يا وسيع العيون
يا ضعيف المماسك يا قوي الهجَر
يا عذيب اللمايا يا بهّي السنون
يا عريب الحكايا والمفاتن غجَر
ما اهتنى لي فؤاد ولا ارجهنت جفون
والهواجيس واجد والمعنّى ضجَر
كل شيً بشوفك .. يا حبيبي يهون
يتسع صدري من ابها لحد المجَر
شمس صبحك تدور طلّتك يالفتون
والثرى واله لرجلك وظل الشجَر
من فراقك تحرك ما انخلق في سكون
كنّك اللي رمى البركة بصّم الحجَر
لا تزيد العتاب ولو بدا بي جنون
سامح اللي يحبك لو زما ثم دجَر
@y205_x
"وجهك مثل استغفر الله لا جات" ..
قصيده غزليه فاخره للشاعر عايض الظفيري تجعل قارئها في كل مرة يقرأها يشعر بالدهشة في تأمل الصور الشعرية الفريدة :
وجهك تفاصيل الفرح والمسرات
صبحً يحط العيد الاكبر بكمه
وجهك مثل استغفر الله لا جات
بشفاه طفل وكان يكذب على امه
ومزيّن بضحكة سهو عمرها فات
مستبشره ولكل حسنً متمه
شفتك ولا ادري من بقى حي من مات
علمي بوجهك كان غارق بدمه
خجلاء يغالبك الترف والتلّفات
ليلك يطيح وصبح وجهك يزمه
يا سيدة حسن التفاصيل بالذات
الساهيّة والشاردة والمهمه
قلبي جناح ونور وجهك سماوات
يكفخ ولكن موت رمشك يضمه
انا انقتلت وصرت ضمن الحكايات
يعني انتقلت لرمش عينك وسمه
في ذمة الموت الحمر كل من مات
هذا اذا الموت الحمر حي ذمه
"لا تغرك سكبة البشت واللبس الجديد" ..
قصيدة جميله جداً للشاعر ظاهر الملغوم الظفيري، التي يعبر بها عن المعاناة الاجتماعية وحقيقة الرجال المغايره لمظاهرها :
غن يا راسي من الضيق طاروق القصيد
والله اني مبتلي .. في حصاةً ما تزاح
لينت الايام عزمي وانا عزمي حديد
فيه شيً بحت سره وشيً ما يباح
لي سنين احس بالضيق وعظامي تبيد
راحت الدنيا بعيني صياحً في مزاح
تنقص الاحلام بالعمر وسنيني تزيد
كل يوم اكبر وصغر عزومي بالكفاح
طايبً من بعض الاصحاب واللي ما يفيد
المراجل ما تجي بالكلام وبالصياح
كان ماله حزة الضيق ميقافً شهيد
بالرخا ما ابيه ياقف على خف وجناح
بالرخا كلن يسوي ويفعل ما يريد
الرجاجيل تْبيّن .. ليا ثار السلاح
كل ابوها من تجارب وانا اللي مستفيد
الليالي علمتني .. عن اسرار النجاح
اتجاهل زلة الخبل .. وعناد العنيد
واتجنب مجلس اللاش واللي راح راح
نظرتي بالناس ما خيبتني من بعيد
لا تغرك صورة اللاش لبّاس الوشاح
لا تغرك سكبة البشت واللبس الجديد
نص راعين المشالح تفلي بالمراح
@D_aldhafiri
"قطار الدمام الرياض" ..
قصيدة جميله للشاعر فالح الدهمان علق عليها قائلاً: قبل سنوات ذهبت إلى محطة سكة الحديد في الدمام لأحجز تذكره الى الشمال فأخبرني الموظف أن القطار له وجهه واحده فقط هي الرياض، بعد ذلك كنت أنتبه وأنصت لصوت القطار وهو يصيح بحرقة عندما يمر من بعيد في هدأة الليل وأنا في عزبة لي خارج المدينة على طريق الرياض، فـ الهمني هذه القصيده وأسميتها " قطار الدمام الرياض " :
واحد البعد مهما صحت لي بالرحيل
يا قطار الطريق المقفي المقبلي
انتظاري وصبري واشتياقي طويل
وانت صوتك يجي من عمري الاولي
لا تثير المفارق فالوصل مستحيل
غاية الروح يا ذا وجهةٍ تشملي
هبهب الصيف والجدي احسب انه سهيل
لاح لي في محاجر ناقتي وجملي
حولي الارض سبخا والمدى ارخبيل
نسمته لو اجر انفاسها مقتلي
لا نسيمه نسيم ولا نخيله نخيل
ولا ظلاله ظليل ولا انا به خلي
اتأمل غروب الشمس عند الاصيل
واتذكر مشارقها على منزلي
من يخبّر اذا دج الدجا بي هديل
ان روحي على اغصانها تهدلي
وان قلبي وكبدي وان عودي نحيل
وان عيني ودمعي وان حزني جلي
واني اكتب وياتي كل شعري جميل
ويتهّول جليسي منه واتهولي
إن نظرت لقصيدي شفت ماله مثيل
وان تأملت وجهي قلت ما اجملي
يا لهذا الاديب المبدع المستخيل
قالها واشهد اني عاشقٍ مبتلي
ذا هو العشق يا عمي وانا به قتيل
راعني واحمد الله واسأله وادع لي
ارهف الحب وجداني تركني عليل
علته بي مع الايام تستفحلي
كل ما نجمةٍ او بارقٍ في مخيل
او قمر او سحابه طيفها لاحِ لي
املّتني بليل وهملّتني بليل
الا ياليل يا منفاي يا معزلي
غربتي في ظلامك ليت شعري يزيل
بعض وجدي اذا غنيت او تنجلي
استدليت في عقلي وضاع الدليل
يوم رحت انشد الاوطان واستبدلي
لا تدوّر عن بلادك وربعك بديل
لو تعيش العمر في غير ما تأملي
ولا تذل لعزيز ولا تكابر ذليل
ولا تخاوي رديين الشرف تبتلي
وان حداك الزمان وصرت رجلٍ دخيل
اي دارٍ تجيها ريفها ممحلي
افقر الارض ارضٍ به تشوف البخيل
اكرم الناس فيها مدةٍ واجزلي
كل ما حاشت ايديني عليها قليل
لو اقيسه بركضي وتعبي وِعملي
يا قطار وتمر وبى دواعي رحيل
مثل ما بك ونارك نار بي تصطلي
واحد البعد واحد والمُنى يستحيل
أدركه وادري إني ضاع مستقبلي
يا مهيّج شجوني كيف كيف السبيل
لي أهل لي حبيبه لي وطن لي ولي
صيح يمكن بصوتك يلتفت لي خليل
أو على البعد مني يسمعونك هلي
بمناسبة #يوم_التأسيس نستعرض بعض ما قالوه شعراء قبيلة الظفير في بلادهم السعودية بلد الاسلام والتوحيد ، يقول عايض عبهول الظفيري :
يا وطنا عليك الله وأمان الله
عهدنا بـ اول الدنيا و تاليها
ما يمسّك خبيث الفكر والمله
لو معه قاصي الدنيا و دانيها
ريحة أرضك من القرآن مبتله
من صلاةً على رملك نصليها
ورايتك بالسماء لو هي على تله
روح مسلم ترفرف عند باريها
ويقول فالح الدهمان :
قريت وما لقيت اصدق من القرآن والسنه
وحكم الله بسيوفً على الايات مسنونه
ونفسً باعت الدنيا لوجه الله والجنه
وحكمً شرّع الاسلام دستوره وقانونه
تعلي واصعدي .. يا راية التوحيد مستنه
ما دامك في قلوب المخلصين الدين مصيونه
عيال اللي ثنى دونك بحد السيف يوم انه
على هدي النبوه والرساله سارت ظعونه
اخو نوره وشعبً افتخر به حيث انا منه
ظفيري والوطن عهدً علي اموت ما اخونه
ويقول نواف التركي :
يا وطن ضاقت بمجدك بطون الكتب
وانت راياتك الخضرا تطول السحاب
نخلتك والسيوف اللي تحتها حدب
مختصر للثواب ومختصر للعقاب
يا وطن كل ذرة من ترابك ذهب
وكل دم انّزف دونك لكفك خضاب
ما رخصناك وبيوت الشعر فالمهب
في صحاريك وقفارك طردنا السراب
نعشقك قبل عصر النفط واليا نضب
نعشقك لاخر حدودك ولاء وانتساب
نحمد الله ونشكر فضله بما وهب
عزنا ما لاحد منه وفضل وثواب
..
حفظ الله بلادنا وادام الله الامن والامان علينا وعلى سائر بلاد المسلمين.
"عذر الوداع" ..
من اجمل قصائد صالح الدهمان التي نُشرت في مجلة المختلف، بتعليق "صالح الظفيري" يكتب وكأنه يغني : تأتينا قصائده دائماً مشبعة بالطفولة والحنين والصدق الأبيض، يقول صالح الدهمان :
طويت اخر مشاوير الهوى .. في دفتر الفرقى
طويت اللي طويت من الغلا وابحرت للضيقه
ينز فْـ محجري دمعً يبي يرقى ولا يرقى
تحده عزةً تاقف على الجفنين وتعيقه
فهقت اقسى مشاويري وناحت بالخفى ورقى
يلج نوّاحها قلبً تماوج به معاليقه
رميت فـ هاجس اوراقي عتب هالعشرة الطرقى
اظن ان القصيد ارخى على قلبي طواريقه
ونبت في صحصح سنين القصايد سدرةً برقى
غصن ابيض غصن اسود ولا بل الندى ريقه
انا بي من طواريق المحبة شاعرً يشقى
مثل طيرً عشق طلعه وبارت به مسابيقه
على الله يالطعون اللي غدت من غلّها حرقى
ابي اطرق في مداهليك طريقً كنت ما اطيقه
حبيبي ما دريت ان فـ وداعك يصعب المرقى
اجل وش لون لا صار اللقى يا هون تحقيقه
انا فلّيت لك عذر الوداع ويا عسى بـ القى
ورا ليل السهر صبحً تباريني توافيقه
تعبت اسقي ظمى قلبي واعلّه مير ما يسقى
الا يا كثر ما كانت تطارد به مخاليقه
ظمى حتى القصيد اللي هواه بْنيّةً عنقاء
يسج بعطرها ليل الغرام الغض وتفيقه
حبيبي ما بقى الا عتاب الهاجس الانقى
حلفت ادفن به الليله سنا اجمل مواثيقه
بعد لا تنشد عيوني وش اللي فـ حزنها يبقى
عزاها حلمها الوردي توارى قبل تصديقه
طويت اطول مشاويري حدر هاك السماء الزرقاء
وقلت ارحل مع الفرقى غريب فـ عالم الضيقه
"ما طحت يوم العدو يعثرني" ..
قصيدة جميله للشاعر نواف التركي، يعبّر فيها عن مدى اخلاصه لغيره ومدى خذلانهم له :
علمت ضحكات الزمان تهجرني وقربت لدموع الليال المناديل
اخطيت لكن .. ما أبيك تعذرني طعم العفو علقم قلوب الرجاجيل
ما طحت يوم العدو يعثرني انا انعثرت بهقوة البن والهيل
والله ما قدر الزمان وقدرني اللي غرسها بين حدبً مناحيل
جبرت كسره لين سلم وكسرني لكن بسيطة والليالي مقابيل
ما الله على بعض الأوادم جبرني لكن هقاوي والهقاوي غرابيل
قلبً لو ابطي بالغياب انتظرني وقلبً يقطّع في حبال المواصيل
احيان حاجات الزمان تعسرني واحيان اكمّل نقص وازوّد الكيل
واعز لي قومً .. مناه تحقرني وارد دون وجيههم غارة الخيل
واللي حضرت لضيقته ما حضرني ماني وراه مدور القال والقيل
كانه لقى له زلة .. وما سترني فـ انا استره عن قرقعات الفناجيل
والله لو ان الصبر انا ما صبرني لكن تروح بعون ربي تساهيل
عذرت وقتي يوم ضاق وزفرني ما ظل به حيلً ولا ظل بي حيل
غنيت يوم .. القصيد اعتبرني حاديه عن رمضا الحنين المواويل
واليوم كني حبه اللي نثرني للريح وأفواه المقادير والليل
مدري من اللي يوم اغيب افتكرني الفقد صار اغلبه كذبة وتمثيل
لكني أعرف .. واحدً ما ذكرني وانا احسب ان لاطحت بحمولي يشيل
كنه لساعة موت قلبه ذخرني اختار وقت تميل الايام ويميل
لا يحسب انه يوم يقفي كسرني خسرت الاثمن منه ماقلت يا ويل
قلبي ويا كثر .. الزمان اختبرني قبله وطفّيت السهر والقناديل
مبطي وانا اكرب ضيقتي واختصرني واليوم فاض بما حوى صدري الكيل
@nawafalturky
"يا كن النوايب في حجاجه لقت حِله" ..
من القصايد الجميله للشاعر عايض عبهول الظفيري، يعبّر فيها عن مشاعره تجاه الملك عبدالله بن عبدالعزيز رحمه الله :
تجيك المشاعر يا ابيض القلب ما تحتال
تجي لك غلا .. وقلوبنا فيك محتله
ملكنا مَلكنا بالمحبة .. وطيب الفال
عدل لين نمنا في في امانه تحت ظله
وبنت الدهر لو ما تمنت تجيب عيال
يجيها من الله حاسمً مثل عبدالله
كذا تعرف انت شلون دعوة فقير الحال
الى مد كفه للسماء تقل ياصل له
يعقّد حجاجه لا تعصت على الحلّال
يا كن النوايب في حجاجه لقت حِله
هو الشمس واضح لا ظهر للضلال ظْلال
وهو علة اللي خلق بنفوسهم عله
رحيم وعرفنا قيمة الدمع يومه سال
شجاع وعرفنا قيمة السيف لا سله
نحب الزعيم الملهم المُلهَم الفعال
وجابه فضل ربي على الدين والمله
بعيد فـ سماه يعلّم الغيث والهمال
قريب لدعاء الاوطان لا جاء يجي كله
يا تاج الزعامة ما على الراس غير عقال
زعاماتنا بنفوسنا .. طبع وِجْبلّه
لأنّا نحبه .. ما عبدناه في تمثال
وصرنا على حبه نسمّى "عبيد الله"
"يا ثقل نفسي" ..
من اجمل القصايد للشاعر الكبير عايض الظفيري، قصيدة مليئة بالمشاعر الصادقه :
يا ثقل نفسي على نفسي ويا صبره
ثنيتها لين صارت غصب تثنيني
أعيش مانيب لا راضي ولا مكره
احلام واوهام تغريني وتغويني
هالليل دربً سهرته واخره بكره
بكره خذا الامس مني وش بيعطيني
يقدر يرجع ظلامي مثل ما يخبره
قبل صلاة العشا وامي تناديني
يا وليدي الليل ليّل غابت الصفره
تعال وامرح وخيك بينك وبيني
ايام كنت اسأل امي ليلنا شكبره
انام واسمع وليدي يابعد عيني
هالكون ماهز في راسي ولا شعره
ماهزني غير صوت امي تصحيني
كنت احسب الوقت لايظلم ولا يكره
كنت احسب اني ابي اكبر بس بسنيني
طفلً كبير يتشيطن حزة السهره
والصبح ما كان ذاك الوقت يعنيني
ما كان هالصبح يغريني وابي انتظره
الا على شان لعبي مع حبيبيني
ماكنت احسب الزمن قاسي على كثره
كنت احسب انه الى احلامي يوديني
هاللحين يا خيبتي عشره على عشره
هاللحين يا نفس لوميني ولوميني
عشته وشفته يا صعبه ويا قشره
مافيه شيٍّ قدر حتى يسليني
وش اخر الصبر يا نفسً نفذ صبره
ثنيتها والزمن لابد يثنيني
@Ayedh_Aldhafiri
"بعض العرب صار خيطً في ذنب ابره" ..
قصيدة جميله من الشاعر الكبير فالح الدهمان، يتحدث بها عن واقع المجتمع المخيّب للآمال :
عليك يا من عليك الحل والدبره
مفتاح صبرً عسى ماينقفل بابه
هارب يدق الهروب بخاطرى نجره
على وحى نار خوفً دوم شبّابه
أشوف جو المدينه .. حايمً نسره
كل المداخل تضيق براس مخلابه
فى برزخ اللا أمان أعطتنى الفطره
كفري بكل الحدود وكل بوّابه
دخلت لكن بجرحً .. خطّنى حبره
على دروب المواجع رسم وكتابه
مشيت كنى بوادً موحشً سدره
أدوّر ركاب قومً ضاعت ركابه
فيه المنازل قبور أعراب مندثره
تبوح فى ضو طيّبً ماتت أعرابه
زبنت بيت البيوت اللى سما ذكره
يا ليتني ما زبنت البيت واصحابه
نخيت بالدم ابن العم والعشره
والديره اللى قبر جده من ترابه
شح القريب وقصر دون العطا شبره
ياحيف يا عزوةً .. مثلى تعزوا به
عظّمت له شان مير الله كشف ستره
لو ما ثغى قلت هذا سيد الغابه
من اي تيس تجيب عيالها عطره
واللحيه اللى عليهم ويش تبغى به
ذى حكمة الله فى خلقه وذى عبره
للي ضرب هقوةً فى غير مضرابه
يارب يسّر .. تراها حالةً عسره
والا ان عجّل بيوم الدين وحسابه
بعض العرب صار خيطً فى ذنب ابره
يمشى ورا من يخيط العيب بثيابه
ويا وسع شقً يجى باكر على دبره
للناظر اللى جهل ماكان يخفى به
يجود راع الرغيف .. ويرمي الكسره
للناس والناس ماتدرى وش اسبابه
نملً سعى .. فى بقايا زاد مندثره
يجمع فتات الفتات من أجل يحيا به
قذره مجارى حياةً .. ناسها قذره
فيها غدت قيمة الانسان بذبابه
العالم اللى أعيشه .. بيئته خطره
ذا بيت دابً سكن فى داخله دابه
ما به أمانً .. ومثلى ويش ينتظره
فى كل وجهً أشوف الموت وانيابه
أبا ازبن الله واحبابه وعلى فكره
ما عاد أأمّن بغير الله واحبابه
@faldahman
المواويل الحزينه من ضميري تسيل
تختفي في دفتري وبين الورق والسطور
يا حبيبي لو أغني لك من المستحيل
ترحم أحوالي وترجع لي يا بدر البدور
الكرم طبعي .. وطبعك يا حبيبي بخيل
لا تصد ، ولا ترّد ، ولا تروف وتجور
بعدك القاسي كسر نفسي ونفسي تميل
للرضا يا سيدي والوصل شلال نور .
محمد مهاوش رحمه الله
"يا ناديه كان ما تدرين بمهلي" ..
أبيات غزلية وجميله جداً للشاعر وعازف الربابه الكبير مهلي حشاش الظفيري، يقول فيها :
ياناديه كان .. ما تدرين بـ مهلي
من سبتك من يشوفه قال عزّاله
َ
امشي وقلبي سوات القدس محتلي
عليك قلبي جريح وحالتي حاله
َ
معقول يا سيّد الخفرات يـا خلي
مستعمر القلب ما يدري عن احواله
َ
اخذت قلبي تكرّم واخذني كلي
يانور عيني سهوم الهجر قتاله
يا مشغل البال .. في نومي تخيّلي
دايم نديم الشقى ما غبت عن باله
يا اعز الاحباب .. قلّي يالغضي قلّي
متى عميلك بحبل الوصل تسعى له
انا تعلقت فيك .. ولـ انت حاصلي
ولو يقدر القلب ينسى حبك اشوى له
@albarq_11