ٰ

[ٰ @_1dosr]

ياخلي مكانك مايجي حوله التهميش
انا مستعد ارضيك كان الله أمهلني

يوم انك تفكر تبتعد مزح مدري طيش
الأشواق تقتلني .. و الأفكار تقتلني

احنك من النسمه واحبك ولا ادري ليش
لذلك على كثر اهتمامي .. لا تسألني

إذا جيت ودي كثر ماقدر اعيش اعيش
وإذا رحت عني .. ودي الارض تاكلني

[ٰ @_1dosr]

انت حبك يكفي الرجل عن حب البنات
مثل ما يكفي المسلمين .. فقه الحنبلي

يدمن الانسان شوفك ادمان المسكرات
يتجلى اللي يشوفك .. وعقله ينجلي

[ٰ @_1dosr]

ودّ السما من الارض لو انهبتها
تغار منها فـ السما كل نوّه

وش الذهب و المسك لولا رقبتها
ووجهٍ عليه الشعر كلّه ينوّه

الحفله ان راحت لها خربتها
اتسرّي الحلوات والليل توّه

ودي ارجع ليلةٍ قربتها
و احضن ثوانيها السريعه بقوّه

[ٰ @_1dosr]

صاحبك يعطي على شوفك بشاير
ديرة منتو بها ما هي بديره

واحدٍ حظّك معَ حظّه يْساير
شايفٍ القدر فالعشر الأخيره

جعل ابو من لامني حمر المناير
في محبة واحدٍ مالي بـ غيره .
🫵🏻

[ٰ @_1dosr]

كل يوم أحاول أملا عيوني من حلاك
أتمقل فيك كني ما شفتك من قبل

و مدري أنت تزين ولا يزيّن لي غلاك
قطعةِِ من طين و تخلي الصاحي خبل

[ٰ @_1dosr]

مع إن لبيه من غيرك تساوي هلا
أنت الهلا منك مثل الدافع المعنوي

بالله لا تختبرني في شعور الغلا
أنا اضعف لشوفتك والحب يبغى قوي

مَراره الحب ما بغى من بعدها حلا
" منك أنت بالذات تسوى عندي وتستوي "

[ٰ @_1dosr]

قام ايتعشاني الوله و ايتغدّا
تقول كنْ ماودّه ��كفّ يمناه !

انتي الدوا وا��تي بعد و الله الدّا
منك لقيت العافيه و المعاناه !؟

لا من تذكرتك ؟ جلست اتفدّا
جعله فداك اللي مانيب آتفدّاه :)

اغليك لا عادي ؟ و لا هوب جدّا
الاّ اكبر مْن الحب كلّه و معناااه

[ٰ @_1dosr]

الهلا لأخر هلا و الرحب لأخر رِحب
تنثنا لك يا المقام الموقر و النزيه

جابك الله عيضةٍ عن لياليّ الشحب
وجيت لك صلصال طينٍ وسو اللي تبيه

أنت تدري ما على الأرض منك أغلى وأحب
وأنا داري ما على الأرض غيري تهتويه

من يحبك يقعد العمر كله ما يحب
لو تجيه حمول الأيام فاللي يشتهيه .

[ٰ @_1dosr]

واحدٍ من كثر مالله مالحٍ منطوقه
ودك تسولف معه ولا تذوق العيشه

[ٰ @_1dosr]

يوم استهل الكلام العذب وأسكرنا
مدري رقدت أمس ولا عادني سارح

قال لي أحبك البارح — وسكرنا
وأصبحت وأحبك أسمعها من البارح

[ٰ @_1dosr]

وجهك لو يمرّه حزين اقفى سعيد
تستلذ العين وتجف من دمعاتها

نظرتك ترمي ولامن رمت رمّيه تصيد
كيف بسلم من عيونك ومن نظراتها

لذة الدنيا؟ ليا جابك الحظ السعيد
كيف تغريني بعد لذّتك لذاتها .

[ٰ @_1dosr]

أي والله أحبك وصايبني على حبك غلو
أشد من غلو إلتزام الدين بعد الهستره

[ٰ @_1dosr]

أنت ملجأ للسكينة عقب ربٍ رحوم
من يلوذ براحة يديك يبطي مسفهّل

[ٰ @_1dosr]

المطر ومواصلك فيهم شبه مدري قرابه
ماتجيب الا الحياة وماتجيب الا المسره

من دريت ان الدعاء تحت المطر يلقى استجابه
مادعيت الا وانا ادعي لك معي في كل مره ..

[ٰ @_1dosr]

انت ( غيثً ) ترقب عيوني متى ساعة وصوله
وانت ( نورً ) جابه الله يعطي الدمع ، ابتسامة

لك ولاء الحب كله .. في عطاه وفي قبوله
وللبشر .. حياكم الله ، مرحبا ، مع السلامة .

[ٰ @_1dosr]

في زحمة الإعجاب وهتاف الحضور
وش مطمعي بـ غيرك وأنا كلي معك ؟

أحيان تأكلك المظنة بلا شعور
‌و أنت الذي تحكم فؤادي بـ أصبعك

ما اخترتك من الناس يا وجه السرور
لـ أجل أزعزع من ثباتك و أفزعك

لوّك تشوف آثار حبك بـ الصدور
كان اقتنعت إني محااال استشبعك .

[ٰ @_1dosr]

قرب " هلال العيد " حسب المواعيد
ومع رؤيته يبقى .. القرار المصيري

كلٍ ينقص فالشهر يوم ويزيد
ويقول : ما أحدٍ جايب العلم غيري

وانا انتظر رؤية قمر فـ اول العيد
مهوب موجودٍ بـ كشف العجيري ..!

[ٰ @_1dosr]

ليلةٍ جابتك . . يا جعلها سرمديّه
لو يمرّك بها لحظة سكوت اختصرها

السوالف معك ماهي حروف ابجديه
السوالف معك غيمه يرشّرش مطرها .

[ٰ @_1dosr]

مَاني مشبهك في بَكّره وظبيٍ لعوب
والله ما يشبهك غير المطر لا أنهمر

لك وجهٍ يشابه الثلج فـ بياضه ونوب
اليا خجلتي يذكرني بـ لون الجمر

وجديلك الأفحم اللي يستفز الهبوب
له مفرقٍ أجمل من البحر وشعاع القمر

لـ حبّك أحتاج لي "عمرين وأربع قلوب"
أنا ما يرضيني أحبك بـ "قلب وعمر"

[ٰ @_1dosr]

أنا معك قدني على أفضل ما يرام
أثر الحياة الفانية معك يا هوونها 🤍..