يدور الزمان ويختبرنا بدون انذار
وتبين الفوارق فالرجال ومعادنها
احد خالقه ربي مثل كرسي الطيّار
لا حلّت مواقيف الشدايد طلع منها
احد خالقه ربي مثل شغلة المنظار
يدقق على حاجات ما أحدً درى عنها
وانا عكس خلق الله مثل حالة البحّار
لا طاح المطر ضيّق على النفس واحزنها
رياجيل ندفنها .. وتبقى طوال اعمار
رياجيل ماندري بها لين ندفنها
بعضهم على المنصب يجمّل وياطا الحار
ليا قال كلمة للرياجيل برهنها
بعضهم مثل حاكم تحت سلطة استعمار
على العرش لكنه .. لا يآمر ولا ينها
لقيت الجمايل ردها مثل رد الثار
لا صارت من اللي كل فتره يبيّنها
خذيت السواد اللي يجي فالقمر معيار
تشين الوجيه وفعلها اللي يزيّنها
ترا خوة الصالح مثل خوة التجّار
لاحبوك .. دلوك اسهل الطرق واحسنها
وترا الجاهل اللي ضاع في لفة الدوّار
يشوف المخارج واضحه .. ما تماكنها
لاقلت: الطريق يمين قال: الطريق يسار
لا روّح من ايسرها ، ولا افلح مع أيمنها
أساير زماني مثل دكتور وسط شهار
أسولف لـ عاقلها .. وأجامل مجننها
لاشفت الطيور اللي لا مخلب ولا منقار
شكرت الغصون اللي من الخوف تمّنها
لاشفت الشعوب اللي بعضها يعبد النار
ذكرت الضعوف .. اللي تودد لـ هاينها
تقول العرب: صدّق عيونك قبل تحتار
واقول: الحقيقه وجهها غير باطنها
أصدّق كلام اللي يقول: النجوم كبار
وأكذّب كلام عيوني اللي تعاينها
ما كل ارتفاع يدل دايم على مقدار
تعلآ النسور وجيفة الارض موطنها
بدا ابليس فالجنه وعاش النبي فالغار
تعد البدايه .. والنهايه تمعّنها
لا طاح الجمل لا عاد تنشد عن اللي صار
لا خافت قلوب الناس ماتنفع ألسنها
قبل تمدح اللوحه تعذرّ من المسمار
على الوقفه اللي ما لقت من يثمنها
البارحه لا اسمر عبر فيها ولا اسمر ما عبر
البرق يبرق والمطر ودّان والدنيا بخير
لو نفتل خيوطك خذتك الريح يالبشت الوبر
والله ما تجمعك الايادي لا قليل ولا كثير
حنا اول حدود الكسور اللي ما يلحقها جبر
وأول من يماري به المنذور لا جاه النذير
نوصل وينشاف التواضع في نفوس اهل الكبر
اللي قبل نوصل يشوفون السما حبة شعير
نرفا الخمال ونحسن الظن ونوصّي بالصبر
الا لا وكّدنا الردى توكيد قلنا ما يصير
كم قبلك صغيرٍ يبي يكبر خذيناه وكبر
لكن نسى نفسه وقلنا ياصغير ارجع صغير
تقدر تسوّي كل شي وماش علم ولا خبر
الا الرقم الاول مااحد يقدر يخليه الاخير
الناس مليانه جهل والارض مليانه عبر
والمعتبر ماهوب في حاجة وصاه ولا شوير
أسهل عليك انّك تحرى لك جوابٍ من قبر
ولا تحرّى نبتة المعروف في نجس الضمير