واقلبي اللي ممتلي رهبه وخوف
ياكم تكاسل فالحياه وكم نشط
على كثر ماوجهته من الظروف
من رحمتك يارب عمره ماقنط
ماعدل لي في سالفة عمري شفوف
امرها مرور من مر وفقط
منول احط النقط فوق الحروف
اليوم خليت الحروف بلا نقط
ماكل صح يجنب الناس الحسوف
الصح فالوقت الغلط يطلع غلط
غروٍ يذيرها الهبوب من السحا ومن العفاف
لاقام يطرح فوق عاتقها سواد جعودها
ادف روحي للجلافة خايف من الانجراف
و عودت اصايد ما بخاطرها و اصايد مودها
لا واهني الطير لارفرف جناحينه وطاف
على ديارٍ قرب ساكنها وبعد حدودها
البارحة هبت شمال وكان ما عندي خلاف
لين استدارت للجنوب و نطحتني نودها
واستبسل الحزن المقيم اللي ورا العوج النحاف
بالذكريات اللي من النسيان جاك يقودها
اببتسم عاد الجروح اللي بصدري ما تشاف
دام اكثر العالم تبسم و البلا ف كبودها
ابتخطا و البلا ذكرى ترجعني ، [ خلاف ]
والرجعه اللي في دروب اهل الهوى ياكودها
ونويت من عقب الكبر والغطرسة بالاعتراف
اني ضحية ضحكة شفاياها وميلة عودها
انا لو اطعن كل ساعه بالجنابي والرهاف
اهون ولا طعناتها اللي كل يوم تزودها
وخذيت السواد اللي يجي فالقمر معيار
تشين الوجيه وفعلها اللي يزينها
وترى خوة الصالح مثل خوة التجار
لاحبوك دلوك اسهل الطرق واحسنها
وترى الجاهل اللي ضاع في لفت الدوار
يشوف المخارج واضحه ما تماكنها
لاقلت الطريق يمين قال الطريق يسار
لا روّح من ايسرها ولا افلح مع أيمنها
رياجيل ندفنها وتبقى طوال أعمار
ورياجيل ماندريبها لين ندفنها
بعضهم على المنصب يجمل وياطى الحار
ليا قال كلمة للرياجيل برهنها
وبعضهم مثل حاكم تحت سلطة استعمار
على العرش لاكنه لا يأمر ولا ينهى
ولقيت الجمايل ردها مثل رد الثار
لا صارت من اللي كل فتره يبينها
يدور الزمان ويختبرنا بدون إنذار
وتبين الفوارق فالرجال ومعادنها
أحد خالقه ربي مثل كرسي الطيار
لـ حلت مواقيف الشدايد طلع منها
وأحدً خالقه ربي مثل شغلة المنظار
يدقق على حاجات ما أحدً درى عنها
وأنا عكس خلق الله مثل حالة البحار
لا طاح المطر ضيق على النفس وأحزنها
الحمدلله الذي بنعمته تتم الصالحات
( رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَي )
بفضل من الله وكرمه رزقني ( بمولوده )
أسأل الله أن يحفظها
و يجعلها من الذرية الصالحة
وأن ينبتها نباتاً حسنا
اللهم لك الحمد