بعد مضي 8 سنوات من الرحله آن الأوان للعابر ان يتوقف في محطته الأخيره ، في هالرحله عرفنا الكثير فمن غلطنا او زلينا عليه نقدم له العذر والسموحه ، و آخر دعوانا ان الحمدلله رب العالمين .
على الهايم اللي في مرابي ضلوعي هام
سلامٍ نسانيسه مثل بارد اطرافي
عسى ياصله و تجيب رده لي الانسام
وانا لو سكت ، ممنونة احساسه الدافي
وش الوم قلبي فيه و القلب ما ينلام
على صوته الممحل نبت وزني و قافي
رغم صمته المقصود و حروفه الصيّام
معه نبض قلبي مزنةٍ وبلها ضافي
على كثر ماشالت و حطت بي الاقلام
عيونه تقدّر وصفي ، و تقدر انصافي
لو احتاج صوته حاجة الروح لـ الالهام
مجرد ماحس انه صحى مبتسم ، كافي
لو ان ابسط حقوقي عشانه تصير احلام
فداه العمر و احلامي و باقي اهدافي
معه ماسمع الناصح ، ولا اعّبر اللوام
انا قلبي اليا حب ما يعرف يجافي
احبه و انا لو اضمنه ، ما اضمن الايام
اخاف الفراق يمر طرفي و هو غافي
واخاف الليالي ماتجيب الفرح قدام
و اشوف الفرح بـ اللي تعديته خلافي
لو يطمن احساسي شعور الهدوء التام
صدى الذكريات المزعج يقول لي ، خافي