يوم شفت الشمس مالت لـ لون الزعفران
اتركوني لين اعوّد بـ جرح و قافيه
لاذ قدر الغالي اللي غرامه ما يهان
زابن بـ صدرً هقا به عباته ضافيه
ياوجودي بعد ما عوّدت عشري ثمان
وياوجودي من لمحت القلوب مجافيه
ودي اسال قلبً اصدق من افواه و لسان
ليه هب البرد ؟ و اذكر كفوفك دافيه
كنت قاموس المحبه و موسوعه حنان
و صرت ذنبً في عيونك و علّه خافيه
بعد جرّبت المفارق و حسيت بـ أمان
احسب ان جرحي تشالى و ناره طافيه
لين شفت ايدك تلوّح وسط ذاك المكان
اختلفت و قلت نظرات الاعين . كااافيه
لييه ترجع بعد مافاز فـ البعد الزمان ؟
والله اني قبل ترجع بخير و عافيه
- مالك الأسلمي
أنا وين أبلقى يالأجاويد فاعل خير
حريصٍ على سلم المحبين لارسلته
من اول لو اصبر عام ما بان بي تأثير
والحين حتى صبر يومين ما احتلته
أنا مثل صقارٍ تولّع . . بـ حب الطير
ولف قلبه فروخ الصورايم وهبلته
تولعت في فرخ . . . غريرٍ يتل السير
ابي نظرتٍ من لفتة الحرّ . . وسبلته
صغيرٍ بـ سنّه غير عندي ماهو بصغير
يا مغـلاه في قلبي . . . ويا كبر منزلته
أجمع له سمان الهرج خوفٍ من التقصير
والى جيت ابشرح له كلامي تهيزلته !
يجيني منه هيبة معزه سحى تقدير
اقابله عندي علم . . واروح ما قلته
- سعد بن جدلان رحمه الله
#معرض_الصقور_والصيد_السعودي_الدولي