ودريت إنك لغيري وأنفجر وسط الصدر شريان
رحلت وقلت يا نبض الغلا وينك وأنا ويني
بموت من الحزن ومن الفراق ومن جفا الخلان
لكني لو بموت أهون ولا طرد المقفيني »
وش يخفِّف شعور الخيبة ومن يضحك البكَّاي؟
اذا كان الجواب اقسى من احساسي واسئلته
وانا مانيب لا ناكر ولا جاحد ولا نسَّاي
لو اتظاهر بقوَّة قلبي المُنهك وسلطنْته
لو تهون الليالي في عيونك مثل شرب الماي
علي! ماهانت اوَّل ذكريات الحبّ وآخرته
ما بكيتك لأني أعرف البكا عذر التخلي
يمكن يطيح الغلا مع دمعتي ذنب وخطية
القصايد ما ترد الغايبين ولا تسلي
ولا لها حيلة على رد الرضا والمقدرية
بس تبقى في ثنايا الذكريات وفي سجلي
مثل غصات الملوح في الديار العامرية
ما فيه حايط في غيابك ما أنهمر دمعي عليه
في صدري من مجاهد الأشواق ما الله يعلمه
كم لي وأنا فاقدك وأتفقّدك في كل الوجيه
يا همّي اللي لا أقدر أقوله ولا أحتلت أكتمه
أنا يا ربَّ توجعني بقايا ذكريات أحباب
و لا لطفٍ سوى لطفك يطمَّن راحة يديني
وقفت و هدَّني حيلي و ما لي غير بابك باب
عسى يا ربَّ تغسل صدري من إللي يبكِّيني
تعبت أسقي عطش قلبي و لا يمرَّه سوى من غاب
كثر ما تلوَّح أحلامي .. يهلَّ الدمـع من عيني
سقى الله كل ليلة عشت طعم أوناسها ويَّاك
بها أملك دنيتي لو كنت ما أملك غير هندامي
رحلت و راحت ليالك و باقيٍ ذكرك و ذكراك
عزاي إني بها عطَّرت غُربة باقي أعوامي
فقدتك فقد ما يوصف و لو حسِّيت به؟ بكَّاك
بـ وحشة نخلة الداخل و لوعة نازحٍ شامي
عزّ القصيد وزاعلتني حروفه
من يوم غاب اللي قصيدي مهاويه
غابت به الدنيا وخلّت طيوفه
عزي لمن مثلي زمانه يعاديه
عقب الملاقى، بس بالقلب أشوفه
وعقب المناجى، بس بالفكر أناجيه
كلامي وشوفي لغيره حسوفه
من غيره يخاوي غريبي وأخاويه
يا لوعة المشتاق تصفق كفوفه
لين التفت ما شاف بالدّار غاليه
كنّ العيون بكل شين محذوفه
والقلب كنّ جموع الأيام ترميه
تسابقتني من زماني سيوفه
تجرح مرادي في حياتي وتدميه
يا عونة الرحمن وين النكوفه
لين انتحى الخفّاق وش عاد يثنيه!
ما رحت أدوّر عند خلّي مروفه
ما يرحم إلاّ الله فلا شك مغليه
لو أن الفقد حسّ بحسرتي يوم دمعي سَاح
ما حصلت الوسَادة حزنها يسهّر على شاني
سَواد الليل بعيُوني زرّع خوف وقطَف مصباح
تعبّ عُمري بعد عُمرك يدُور له عُمر ثاني
تجاوزتك يا جرح الكلمة إللي قالها مجروح
تجاوزتك يا كذب الكلمة و يا صدق راعيها
مناضيح المواجع تتضح لك في شفيف البوح
تبـيِّن الوجعه إللي في صميم القلب كانيها
و أنا بين الخطأ و الصح ما قرَّرت وين أروح
أخاف و خوف الأنفس ما يوصَّلها مشاهيها
أجامل لي عبادٍ ما لها في دنيتي مصلوح
أعرف وجيهها و أصواتها و أجهل مباديها
يقولون السحابة في مثانيها البروق تلوح
و أنا أقول السحابة تحمل الماء في مثانيها
عساها تنهشم فوق الضلوع إللي تحتها فوح
تطفِّي نارها ولا تقضقض ما بقى فيها
عروشٍ خاويه ما عاد فيها للسعادة روح
سكنها الحزن و أطفى نورها و أمحل بأراضيها
سقى الله يوم كانت تكتفخ فيها حمامة دوح
ترفرف للزهور إللي منابتها مواطيها
تطير الفجر لا غازل نواظرها شعاع الضُّوح
و ترجع مع مغيب الشمس قلبي بين أياديها
تقاوم خوفها و إليا تحشرج صوتها المملوح
أهدِّي روعها و أمسح يدي على ثناديها
سمحت من السنين إللي خذتها و الخطأ مدموح
ألوم ظروفها؟ ولا أرتجي فرحة لياليها؟
ورا الصدر لك محميّةٍ نبتها مامات
ماقد مرّها صيفٍ يجفّف منابعها
مطرها على طول السنه ماهو بزخّات
لا راحت سحابه جت سحابه تتبّعها
لا زالت عليك تنازع الانفس الرغبات
مثل من يبي روحه قبل لا يودّعها
فداك القلوب اللي هواها على فترات
ماجاها الشعور اللي يليّن طبايعها
/ سامي سعد