-
كلّ حلمٍ فاتني بالأمس وصّل له سلامي
ما على الفايت حسايف والندم قصة قديمه
ادري ان الحلم لا منّي عطيته إهتمامي
صار حلمٍ للجميع وصار له معنى وقيمه
الخساير في حياتي ما تنزّل من مقامي
انخلقت بقلب طير و روح ما ترضى الهزيمة
مؤسف إني كنت اداري قلب يسعى لانهزامي
ماهقيت ان النديم بيوم يرضاها لنديمه
بترك الدنيا واهلها واسكن بغيهب ظلامي
طبت من عالم حسدها يقتل النفس الكريمه
كلّ شيٍّ صار يجرح خاطري مدري علامي
والله انْ حتى الهوى يجرحني ان ذعذع نسيمه
اغتراب الروح بان فنظرتي ..صوتي ..كلامي
حالها حال اغتراب الدار عاقبته وخيمه
العوض بالجاي يا حزنٍ تجلّى فابتسامي
الحياة دروس وآنا فدرسها -قصّة أليمة-
المحبه قبل أعرفك شي عادي و أعتيادي
و عقبك والله انها فنظر عيني عظيمه
ودي أحطك وسط عيني و أغمض لا إرادي
من كثر خوفي عليك من الصواديف الأليمه
أعشقك و أغليك و أميزك عن كل العبادي
و مستعد أعيش أنا وياك في رمله و خيمه .
يافتنة زمنّا زاد في حسنك الاعجاب
حضورك قدر من زحمة الناس يسلبني
عن المغري الفتان و المنظر الجذاب
انا لي زمن مـا مرني شي يعجبني
شكل عودك اللي ينثني يلفت الالباب
لا قـام يتمايل كنّه يقول " راقـبني "
يا مُذهلة لو غايتك أبعد من شعور إنذهال
الناس تسأل كيف قمرا تكتب إحساس البدر؟
سبحان من جمَّع مزايا الخلق في أكمل مثال
أعجوبةٍ فـ الحسن و المنطوق و أعجوبة فكر
يا نجمةٍ جارت على الصبح و تجلَّت بـ إختيال
قولي لـ نُور الشمس لا يقهر عصافير الفجر!
زال الضيا و مشراق وجهك غير قابل للزوال
ثابت مثل دهشة قصيدة كِتبت لآخر شطر
يا نجمةٍ شعشع سناها و أبلجت منها الليالِ
جودي لـ سمَّار الليالي من تعاليل السمر
لدِّي النظر يا أم العيون إللي نهايتها إحتلال
ملامحك لا شافها المخطي يبادر بـ العُذر
أنتي اليقين الراسخ إللي ما يشوبه إحتمال
و أنتي الثواب إللي تجلَّى لي بعد شدَّة صبر
من حقق الله حلمه و نالك رغم أنف المُحال
يستاهل يعيش الحياة و بداخله نشوة نصر
يا مُترفة كل الكلام إللي على البال إرتجال
ما ضاعت علومي و لكن يوم شفتك؟ أنهمر
في ذمَّتك أنتي قصيدة صافحت كفَّ الخيال؟
ولّا قصيدة صادقة خُلقت على هيئة بشر؟
منطوقك العذب المعتَّق فيه من وجهك خصال
كأن القصيد مقاسمك نصف العذوبة و السحر
وجهك غواية للهُدى مدري هداية للضلال
محتار فيك إنسان ما قد حار بين أمر و أمر
على كف القدر نمشي ولا ندري عن المكتوب
عبارة كنت أرددها .. صدق من قال معناها
تضحكنا تبكينا..تمشينا على المقلوب
على كف القدر نمشي ..دروب ما عرفناها
متى حظي يحالفني يصحح وضعي المقلوب
يعدل قسوة الأيام وغلطة ما ارتكبناها .
تعبت أخاف من بكرا وهو من حسبة اللي جاي
أنا بوجه الظروف اللي تودينا على بكرا
يا كم راحت مخاوفنا معاها ضحكتي وبكاي
ورعشة كلمةٍ تِكتب لقلبٍ ما نوى يقرا
من البارح وأنا جروحي على سكة وداعك .. ناي
ترا كل الدروب اللي معك تستاهل الذكرى
َ
-عبدالملك الخربوش