‏«ابو سارّه»

Not for everyone

[‏«ابو سارّه» @aa77m]

صبرت واجد . . وحاولت ادمح الزّلات
واقول بكره . . عسى ربّ العباد يهديك

تجاوزت مرّ الجفا . . وعشت في حسرات
واغفر ذنوبك . . لـ اجل قلبي يداريك

لكن ظهر كلّ شي . . وبانت النّيّات
وكلّ شي واضح . . ولا عاد يخفيك

اشوف فيك النّقص . . في كلّ الاوقات
وما فيك شي صاحي . . لـ اجل التفت فيك

طبعك عوج . . ما تغيّره العبارات
وقلبك خليّ من الوفا . . والرّدى يمليك

خلاص قفّلت . . باب العذر والملامات
تجاوزتك . . وبعت الهوى مع طواريك

[‏«ابو سارّه» @aa77m]

غرتني الأيام . . بقبالها يوم
وأثر النكوفة عند الأيام عجلة

جتني لياليها على دف ونغوم
وأثر الليالي بالغرابيل جزلة

فرحة نهارٍ عقبها ليل وهموم
من يوم جد البعد محبوب وصله

فرقى الضحى تسهل على باقي القوم
لكن على الخلان ماهيب بسهله

ما همني بعد المسافات معلوم
لا شك بعد القرب للصب قتله

راعي الهوى من راحة البال محروم
قربه وبعده نار ما ينعرف له

عز الله إني في ظبي نجد مغروم
راعي العيون اللي مع الزين خجله

من حبهم كني من الحب مظلوم
ونفسي عليهم يا هل العرف وجله

[‏«ابو سارّه» @aa77m]

الصبح بطلّة زولك يفرق عن الغير
وجهك يغيّر سكة الصبح . . ويجمّله

ولا ضاق صدر الوقت واجتاحه التغيير
ضحكتك تشفي خاطري لين تأصله

القلب طيرٍ حام واختارك وكير
لا من طروا طاريك . . فزّ وتولّه

يا ريف روحي يا رجا كل التباشير
حبك سرى في الروح . . محدٍ وصله

حفظت عهدك مثل حفظ النواوير
وعشت العمر لك لين يدركني أجله

[‏«ابو سارّه» @aa77m]

يابو قلبٍ أطهر من ثيابك ليا صليت
ويا بو ضحكةٍ من تبتسم يبتسم كوني

ويا أبو وجهٍ يغار القمر منك لا طليت
وش العمر من دونك ودنياك من دون

معاك المشاعر طبّقت خطة التكويت
تمنّيتك أنت . . وواجد اللي تمنوني

- حمد السعيد

[‏«ابو سارّه» @aa77m]

ردّي سلام النحيل اللفيت العكش
قولي هلا مرحبا . . او قولي اي شي

اما تركتي على قلب الخطاء نقش
والا أزهرت وردة الجوري برمشي

يا بنت حنَّت مهاديف الضماء عطش
وانتي قبالي . . وكن الريح نعشي

يا كيف قلتي على رمل الضلوع امش
قبل إني أروى وقبل المزن ينشي

ما تسمعين الخطاوي مالها وقش
وظلالها من تعبها طاح مغشي

يعني . . عشان الحلا والتاج والعرش
طيّب وقلبي . . وخفقاته وعرشي؟

بالله مرّي . . مابين الجفن والرمش
سحابةٍ توقف شويّه . . وتمشي

ولا اقهري لين ارد الذود والطرش
حرام اصدر . . ولا كحلت رمشي

- مساعد الرشيدي رحمه الله

[‏«ابو سارّه» @aa77m]

عسى دربٍ خذت رجلك عليه اقفایه و معواد
يفيض من النبات و يجري الماء العذب بعروقه

مداهيله . . مراويح السحاب و غاية النشاد
وظلٍ يرسم اشكال الطيور العابره فوقه

شعوري يوم اقصر خطوتي و اطول المقعاد
شعور اللي طرق باب البخيل و ضاعت حقوقه

لا زلت احتاج وجهك . . للسهر للشعر للميعاد
وصوتك . . لأجل احرر عبرةٍ فـ الصدر مخنوقه

ياليت اللي مضى لي من عمر معك . . معك ينعاد
واشوف اللحظه اللي من شريط العمر مسروقه

وثوبك يوم يطرقه الهوى . . انا على استعداد
اعرف الغصن وش خالص ثمره و يانع عذوقه

اقول اني بشوفك فـ المنام . . ان غبت كالمعتاد
وانا حتى المنام اللي بشوفك فيه . . ما اذوقه

[‏«ابو سارّه» @aa77m]

لذّة العمر قرب النفس للي تبيه
وباق الايام ماتحسب من ايامها

الغلا اللي تبيّن قيمته بالوجيه
هو وقود الحياه ومصدر إلهامها

اشهد ان لك غلا لو اكتبه واحكيه
بح صوت الحروف وجفّت أقلامها

ايه ياللي طغا بي حسنك الفارق ايه
كن الايام جايبتك . . من احلامها

في حرم حسنك يطوف الشعور النزيه
همّش الفاتنات . . وكسّر اصنامها

مالهن حظ في ليل ٍ تحضرين فيه
آية ٍكل زين . . يطيح قدّامها

كن نظراتك تقول . . آسفه ماعليه
تعتذر من حلاها لو ماحد لامها

ما لطبعك مثيل ولا لزينك شبيه
في بيوت العرب وبساحة إعلامها

دثري قلبي بوصلك قبل تعتريه
لهفة الشوق لا داعبته انسامها

ليلة ٍ عاشقك فيها يديك بيديه
اشهد انه بدون احساس لانامها

[‏«ابو سارّه» @aa77m]

الوصل طب القلوب وقوت
عقب البطا . . يشبه الجنّه

والصد بين العرب ممقوت
مثل الضما ابلاهب الكنّه

أشتاق له والعمر موقوت
وأهواه وأغليه وأحنّه

مو بس أحبه أحبه موت
ياجعلني مانحرم منّه

غلاه بأقصى الحشى مثبوت
أموت وألا . . أبتعد عنّه

ياجعلها فرصةٍ ماتفوت
في شوفه العين ممتنّه

من حد بيشه إلى تاروت
مثله مع الناس ما أظنّه

والشام والمغرب وبيروت
مافيهن اللي . . تعدنّه

وش هالجمال ويازين الصوت
أن جيت أحاليه . . وش كنّه

همسه يخلي الحضور سكوت
كل المزايين . . يفدنّه

مضمرٍ والخصر منحوت
متميزٍ من صغر سنّه

وريقه حلا والشفايا توت
يستخرجون العسل منّه

والثغر درٍ على ياقوت
لاشافها التايب أغونّه

إن غاب كني وسط تابوت
وإن عاد عقب البطا جنّه

[‏«ابو سارّه» @aa77m]

الجادل اللي علمتني ويش معنى الاحتياج
بـ اموت وانا احب طاريها واحب وصالها

على مفارقها يضيق الكون وتثور العجاج
وإليا اقبلت كن المطر وصّي على استقبالها

والله ما ابي لي مال فالدنيا ولا نجمه وتاج
يكفيني إليا شفت حرف اسمي على سلسالها

من فاز فيها . . والله انه ما يفكر فالزواج
هذي خلقها الله ما ياخذ غيرها رجالها

حتى ولو خلت تعاملها على حسب المزاج
من حقها واهم حاجه . . ما تضيق بالها

تخطي ولا عندي عليها لا اعتراض ولا احتجاج
مهوب انا اللي يجزي السيئه بعشر امثالها

ما قلت انا اللي خاطره كسره مثل كسر الزجاج
اقول . . انا ابرك لـ الحمول الكايده واشتالها

من حبّها . . خلتني اسوي دراسات ونتاج
تسرح وتمرح في خيالي كل يوم الحالها

بيني وبين اهل الدواء الشعبي تخالف واندماج
اعقد حبال المشكله وارجع وافل احبالها

مهوب شرط الحبه السوداء يجي فيها علاج
انا تراني ما ذبحني غير . . حبّة خالها

[‏«ابو سارّه» @aa77m]

من هجوس الشعر بنضمّ لك قصيد
دام قلبي في هواك اليوم هام

لك غلا يجري وسط دم الوريد
كل وقت وكل يوم وكل عام

وإن بدا يومي بكم يبدا سعيد
مثل عيد الفطر من عقب الصيام

لك محبه داخل فوادي تزيد
سارقه من ناضري حلو المنام

من الوله في خافقي نار وقيد
هوب نار وحرها برد وسلام

والله ان قلبي قبل حبّك حديد
وعقب حبّك هيظه نوح الحمام

يافريد الحسن والساس الجويد
ياكريمٍ من نسل ناسٍ كرام

عودك المياس من نوع الفريد
ليغطي فارعه جنح الظلام

من الوصوف النادره تملك رصيد
لو بوصف وصفها فوق الكلام

حلو شكل وزين طبع وتلع جيد
ياذهب نادر وغالي ما يسام

اتمنى كل يوم اكتب جديد
يالغلا واعيش بك معنا الغرام

لك أحاسيسي سرت وسط النشيد
ولك بدايات المحبه والختام

[‏«ابو سارّه» @aa77m]

يارب جعلني ما اذوق فرقاها اللهم امين
عيوفٍ . . لو بعيف العافيه مانيب عايفها

كثر مالله عطاها من حنان ومن قبول وزين
كثر ماهيب تكبر في عيوني من مواقفها

خذتني من محيط الحظ الأقشر والزمان الشين
على اول شبّتي لين أغدقتني من عواطفها

على ايديها عرفت ان السعادة في غرام اثنين
علاقة حبهم مافيه غير الصدق . . ينصفها

تفرقنا الظروف ونجتمع عقب البطا شفقين
على ادنى فرصةٍ تسنح نحاول ما نطوفها

ترّف قلوبنا و اول ملاقنا . . عناق ایدین
تحت شلال لليلٍ ما يضمّه غير معطفها

شوي شوي لين اضع بين ايدينها الثنتين
وأحس بنشوة والله ما اعرف كيف اوصفها

على الصدر الحنون أنام من شوقٍ ضناني لين
يصحيني صدى صوتٍ تدافق من شفايفها

توصيني تقول الوصل خله في رقبتك دين
ترى الايام ماتترك رداها وانت عارفها

وانا عاهدتها ما أبور فيها دامنا حيين
لها وجهي لو تبور الولايف في ولايفها

ترى حب يغذّيه المواصل والجناب الزين
حياة ثانية من ذاق لذتها . . يوالفها

وترى بنت الحصان النادره ماتقبل التهجين
وخيّالٍ مايملي عينها . . ماهوب عاسفها

[‏«ابو سارّه» @aa77m]

انتي بوجهي . . لاتخافين دنياك
عن كل ماضي خوّفك لا تخافين

لو الليالي والزمان . . يتحداك
لايضيق لك خاطر عسى ماتضيقين

كل الظروف اللي تشوفين . . تفداك
نامي على راحة يدي لا تبالين

لا يبين خافيك ولا يطلع اقصاك
وانا معك عمري اعيشه بعمرين

[‏«ابو سارّه» @aa77m]

ليتك علمتني قبل لا ابتلى فيك
انك سحابة صيف ما تروي ضما.

[‏«ابو سارّه» @aa77m]

٢٩ اغسطس / اسبريسو السبت❣️

واذكر اني مانسيتك ويغريني الرجوع
ياغرام تنشد الناس . . وينه ياترى؟

والغرام انواع والقلب مدهل كل نوع
والله اعلم منهو اللي من الحدب وورى

وانت ياللي منزلك ماورا حدب الضلوع
تدري انك من وراها . . وغيرك مادرى

تمتلكني يا اطرق العود من عادك فروع
قبل تغريك المدينه . . ويطغيك الثرى

يوم عادك تكره السبت وتحب الربوع
والمواصل كان مسموح والوصل اجهرى

-ضيدان بن قضعان .

[‏«ابو سارّه» @aa77m]

صباح برد و رذاذ و هيل
ووجهك جعل فالي و فاله

بشكي على صبحه من الليل
شكوى يتيمٍ . . على خاله

وش حيلة الي يحبك حيل
حاول فـ وصلك ولا احتاله

البعد ماهو على يد بخيل
والقرب فـ يدين . . حيّاله

فرقك على غيرك التبجيل
لحالك وغيرك لحاله

لاعاض كفك عن المنديل
منازل الدمع . . ترقاله

اشتاق لك يا خيار الجيل
يا سعد بالي و غرباله

عليك كل القلوب تميل
لو كان ماهيب . . ميّاله

[‏«ابو سارّه» @aa77m]

صباح الخير يا خشفٍ مداهيل الصدر مفلاه
مرابيه الخفوق ودوحت ضلوعي بساتينه

أنا اللي طاح في محبال زينك وإننا لله
غزالٍ صيدته شهب السباع وبندقه عينه

كتبتك شعر وأنطرتك غلا وأشفعتك بها
أنا اللي يوم حبك شافك اغلى من دواوينه

أحن لجيتك مثل المهاجر لا ذكر مرباه
وأجي في غيبتك مثل الفقير إليا ذكر دينه

معي سحر الشعر وأنتي معك سحر الغنج والاه
عذاب لا اجتمع سحر الغنج والاه في حينه

أطارحك الغلا والقلب لا سال الرحيق أسقاه
وتزهر وردتك . . والقلب يسقيها شراينه

أشوفك مثل شيخٍ في نحى صدري ركز وركاه
وأشوف البيت بيتك والمفارق ديني ودينه

وأشوفك مثل خيالٍ يذود بسيفه وشلفاه
لا شفتي لك غزال داخلٍ قلبي تذكينه

يا مدعوج العيون ويا مليحٍ جل من سواه
أحد يلقاك ما يلقى السعادة تبت يدينه

تمرين المكان وتصبح قلوب العباد أفواه
وحتى الضلع ينبت في الخزامة لو تمرينه

تهادي واسكني صدر القصيد وغيبي ليلاه
تمادي وإقصري ليل الشتاء واخلي مساجينه

معك والقلب لا تجزاه بالصده ولا تجفاه
عليك الله وامانه بعد عشقه لا تخلينه

وصالك سلوة الخاطر وهجرك لعنبو طرياه
أحبك والهجر في وجهك إنك ما تطرينه

[‏«ابو سارّه» @aa77m]

مرحبا يالقلب الأبيض ویالوجه الخجول
انت وينك؟ مابقا ناس عنّا ماحكت

ودي ادري عينك اللي تخبّل بالعقول
هي بكت من بعد فرقاي ولا مابكت؟

في فوادي من فراقك مثل دبك الخيول
ياعذابي كل مالخيل فالصدر دبکت

جعل تسقي ذيك الايام في كل الفصول
يوم تزعلك الأغاني وترضيك النكت

يوم تشمخ في جمالك وانادي لك واقول
جاد حظي في وجودك والايام ضحكت

صح انا ماني فضولي ولا احب الفضول
بس قلبي يوم قفّيت عنه . . ماسكت

وش بقى قلي من الحسن كله والقبول
اشهد ان طلتك تاخذ . . ولاعاد تركت

كان باقي لي محبه . . غيابك لايطول!
صاحبك لو مسّه الحزن . . نفسه ماشكت

[‏«ابو سارّه» @aa77m]

الله اكبر كيف يجرحن العيون
كيف ما يبرى صويب العين ابد

احسب ان الرمش لا سلهم حنون 
اثـر رمش العين ما ياوي لاحد

يوم روّح لي نظر عينه بهون 
فز له قلبي وصفّق وارتعد

لفّني مثل السحايب والمزون 
في عيوني برق . . وبقلبي رعد

نقض جروحي وجدد بي طعون 
قلت يكفي قالت عيونه بعد

وانعطف هاك الشعر فوق المتون 
وانثنى عوده . . وقفى وابتعد

شاغلتني نظرة العين الفتون 
حيّرتني . . بالتوعد والوعد

هي تمون العين ولاّ ما تمون 
لي خذت قلبي وقفّت يا ولد

[‏«ابو سارّه» @aa77m]

حبيبتي لا تشتكين من الظروف
ولا تشيلي من هموم الوقت هم

انا لك الدرع الحصين من الصدوف
وانا ابن عمك حتى لو ماني ابن عم

لا يلحقك من لوعة الأيام خوف
ما دام باقي لي على الدنيا نسم

فلّي حجاجك وإضحكي خليني أشوف
جمالك الطاغي . . ووجهك يبتسم

وتجاوزي الآهات خليها تطوف
مافيه داعي للجروح وللألم

الله خلقك وميزك بأربع حروف
وخذتي من إسمك لين قلب و لين إسم

وصفاتك اللي يابعد كل الوصوف
ما فيها معنى للكآبه و الندم

خلّي الحسايف ما على الدنيا حسوف
أنتي أصدق وأنتي أجمل وأنتي أهم

[‏«ابو سارّه» @aa77m]

البارحه جيت المكان اللي ماجيته من زمان
واستقبلتني ذكرياتٍ . . ما تغير لونها

جابت لي اللي ماعهدته غير في نفس المكان
وجابت مراويحٍ تغسل مزونها بمزونها

واطياف من قامت تثنى مثل عود الخيزران
في ظل دوح يلعب العصفور بين غصونها

ليت الخيال اللي يوقف بي على بر الامان
ماهوب يوعدني ورى الهقوه ويقصر دونها

وقفت ادور للي اسقتني من انهار الحنان
ماشفت غير الظلمه اللي مثل كحل عيونها

عز الله اني بعد فرقاها . . فقدت الاتزان
وهي افقدت عوني عسى ربي يكون بعونها

لكن بعد ما انقطع حبل الوصل واللي كان كان
مات الغرام وعاشت بدوني وعشت بدونها

[‏«ابو سارّه» @aa77m]

يهلّ الوبل ودموع الحزين اللي بلاه الهم
ماتشبه كود ماطرها الشديد بليل توديعه

وليفٍ جعلني فدوة غلاه وفتنة المبسم
وعودٍ منه عوق اهل الهوا واكبر مواقيعه

عرفت ان الهوى بلوى على العاشق ولايرحم
صويبٍ ضدّه الحظ اللئيم رشاف ما يريعه

ياكم من مرةٍ قد ذاق مرّه غير ماستسلم
يزيده صبر غير الصبر ماحصل منافيعه

والى منّه بغى يروا الى منّه ورد للجم
شفوقٍ للوصل يحداه وقتٍ غصبٍ يطيعه

جعل يسقى علينا يوم عاد ارواحنا بلسم
زمان اول لقانا قبل تصدمنا مواجيعه

تحت ظل شجرتنا اللي بها اول ملتقانا ثم
يداعبنا هوى الغربي ويطرقنا ذعاذيعه

مكان ينفّس الصدر المشقى من هموم وغم
يسج المشتحن لاجاه عن كثرة مداميعه

يوم انك تسأل؟ انت تحبني جدا وبي مهتم
ماكنك تدري ان حبّك على قلبي مرابيعه

وودعتك وذا دربٍ لابده واسلم وتسلم
على حُب الشرف واللي نقاه اكبر مطاميعه