الطير المهاجر

[الطير المهاجر @ab_33bb]

مساء الخير

الحساب هذا حتى وان كان بسم مستعار
لن يكون خلاف مبادئ وقنعاتي هو عباره عن استراحه اذا تعبت اخذ لي غفوه فيها ليس اكثر

[عيد عاتق المحمدي الحربي @qn_y8]

#عيدعاتق_الشماسي

البارحه كنت أدس الشوق بين السطور
محتاجك الليل والأفكار محتاجتك

نفضت غصن القصيد وطار سرب الطيور
وغنت على لحن سوهاجك و روباعتك

اطلال الاحباب باقي في طرفها زهور
نشدتها قالت الاطلال مشتاقتك

اجيك شاعر من القمه ضهوره ضهور
غنيت لك قبل اعرف اسمك واسم لابتك

في ذمتي لك ورى حدب المحاني قصور
اسكن ورى حدبها واعبث على راحتك

صحيح دون الطلب والحلم بابٍ وسور
بس الوكاد المشاعر كلها نادتك

على النوايف تحريتك وجبت العطور
الله يسعد مساك ويسعد اطلالتك

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

ياطير وين أحبابك اليوم قلي
وشبك على الغصن المطرف لحالك

صوتك حزن وانا الحزن جايزٍ ن لي
ياطير غرد قول لي من غدالك

ان كان تبغا فزعتي جيت كلي
لجلي غريب وحالتي مثل حالك

مثلك وحيد ومفتقد صاحبٍ ن لي
ماطابت ايامي ولا طاب فالك

لاشفت طيرك مستمر بالتغلي
يمكن لقي ياطير طيرٍ بدالك

روّح وانا ب امشي وأغادر محلي
وعوّد اذا زان الزمان وصفالك

عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

لين الشروق ايطل نوره على الناس
أبدا قصيده وانتهي من قصيده

لاهبني من يمة الشرق نسناس
اشتاق وديار الولايف بعيده

مدري هجوس الليل من فرط الاحساس
والا من اسباب الشفوف العنيده

محبوبتي عقدك قصيده من الماس
فيها خيال ومفردتها جديده

اخفي عليك احساس وأبين احساس
اللي مضى كثر الحكي مايعيده

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

علمتني كيف اشكر النسيان واحب الحياه
شكراً على كل الجهود وكل ماعلمتني

#بيت

[عيد عاتق المحمدي الحربي @qn_y8]

#عيدعاتق_الشماسي

يقولون وشبك منتحي والطريق هناك
وأنا أسوق رجلي للمفارق وادربها

لذاك المكان اللي طريقه يخالف ذاك
امر الاماكن كلها وأتجنبها

يغني حمام الراك وانا بجنب الراك
أراجع ملفات الهقاوي وارتبها

فقدت الحنين وصابني تهته وإرباك
م غير اتمشكل مع شفوفي واعاتبها

ياطيرٍ ن تغرد من تذكّر ومن بكاك
من الوقت والا العين تبكي حبايبها

فداك الطيور العابره والقصيد فداك
على ويش نفسك بالمواجع تعذبها

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

قال انت تقصد غنوتي قلت لِله
أنا أقصد اللي لا كتبها كتبها

اللي قصيده يدخل القلب كله
في غنوته تلقا المشاعر طلبها

يوم ارتقا فوق النجوم المطله
لدت له عيون النجوم وسحبها

يشبه خياله مزنةٍ ن مستهله
وفرايده من خزنته مانهبها

خواطره ماشوفها مسفهله
فيها الم يخفي ملامح عتبها

مدري معاناته طبوع وجبله
والا من غياب الولايف سببها

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

كان جو اللي تعزه ماصفا لك
اعرف ان النفس ماهي مستريحه

لو. حكالك عن شعوره ماحكالك
تفترض وتضنها ماهي صحيحه

كيف حالك يانديمي كيف حالك
الزمن دوّار مير الله يبيحه

والله ان الموج ينسف يمّ جالك
والسوالف والخواطر والقريحه

انت قاعد في مداهيلي لحالك
مستحل كل المكان ومستبيحه

✍🏼عيدعاتق الحربي

[الطير المهاجر @ab_33bb]

#الطيرالمهاجر

عندي كلام الله يجيرك اه ياكثر الكلام
وشلون اغادر حالة الكتمان واغني واقول

ماعاديطربني على الاغصان ترنيم الحمام
واناالشجن والناي وزهور القوافي والحقول

[عيد عاتق المحمدي الحربي @qn_y8]

#عيدعاتق_الشماسي

السجه اللي كل ساع تخطفنا
وحنا بوسط الناس عن هرجة الناس
نلبس قناع اهل الفرح وتعرفنا
تلعب على الاحساس وتفر الاحساس
مدري عليها ياهجوسي ولفنا
والا البلا من باس ونقول لاباس
ياما على شان الخواطر عَزَفنا
عزفٍ ن يتل القلب ويميّل الراس
على زمان احبابنا ماختلفنا
الشاي والبراد والجمر والكاس
نفس الحنين ونفس سابق شغفنا
احساسنا لازال يحضن وينباس

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

يالقراح العذب يالعد الرهاوي
صاحبك مفرط عسا ربي يعينه
قلت لك عنده طموحات وهقاوي
خاطره حساس وافكاره هجينه
كل ماغنا تجرحه الغناوي
الحن مجنون والنغمه حزينه
ذيبي اللي من ورى ضلعين عاوي
يسمعونه من ورى سور المدينه
من على المسرح على البث الهواوي
وين ذاك الليل والمفقود وينه
وين ذاك الضحك واطراف الحكاوي
اه ياذاك الشعور وياسنينه
الحنين ان زاد مايرحم وياوي
انشد اللي ماتذوق النوم عينه

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

يوم صافحني هوا الغربي وسلم
قمت برد السلام ورحت فيها
زخني وازريت اعبر واتكلم
يوم طوقني علومي لك عليها
كني انعس من براده واتحلم
انتهي من سرد قصه وابتديها
ضحكتي متحفزه وانا أتألم
احضن الاحلام واقبل يديها
كل ماغاب الشفق والليل ظلّم
ياهلا باللي تجيني قبل اجيها
لبسها ماهو حرير ولا مقلم
تستحل كل المشاعر وتغزيها
كل يوم اقرأ راويه واتعلم
اكتب الابيات والناس تحديها
سلم الله من ذهاب القلب سلم
كان وده بالشفوف ولا لقيها

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

جيتك وفي عيني عتاب ودمعتين
اقرا عيوني مابقي عندي كلام

جيتك وله جيتك ولع جيتك حنين
شفتك هناك وجيت بَارُد السلام

فيني قصيد وفي يديني وردتين
وغنوه على لحن التوجد والغرام

وصوره مثاليه من ارشيف السنين
بروزها روحي لها عشرين عام

مدري مكانك وين والا رحت وين
ومدري لقيتك ليه في وسط الزحام

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

مابي مرض نفسي ولكني اشوح
عن العرب متفرقين وجماعات
في مبعدٍ يسجع حمامه على الدوح
دونه جبال ودون دربه مسافات
فيه استريح من المخاليق وابوح
وارسم على رمله خطوط وممرات
اقلّب افكاري واسولف مع الروح
مالي ومال موزعين الروايات
عندي سجل وعندي ارشيف مفتوح
وعندي كلام وفي لساني حكايات
ماني من اسباب المواليف مجروح
ماعاد في نفسي طلايب وشرهات
حرٍ ن طليق وفيني احساس وطموح
وخيالي اوسع من حدود المجرات
يوم اتوجد تصغي الورق وتنوح
ومن الغزل يمكن تذوب الجمادات
اعزف ويرجع لي صدا الصوت مبحوح
واقول ياصوت المغني سلامات
خابرك مبدع لاتسلطنت وتروح
فوق السحاب وتحت سقف السماوات
وانا وراك اكفخ من الجسم واروح
امارس التحليق واخرج من الذات
في جال روضٍ ن يسعد النفس ويفوح
منه العبير اللي يسوق المسرات

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

غنا وفي صوته من الحزن سيمه
الله يسامح نبرته يوم غنا

غنا لحن عكس الحون القديمه
عزفه شجن يخطف خفوق المعنا

كنه على جرد المعاليق ديمه
تمطر على الاحساس منا ومنا

في نغمته سحر الصباح ونسيمه
ومن رنته غصن الغرام ايتثنا

لو بحته فيها تفاصيل اليمه
مرت حياته كلها ماتهنا

النجم وحروف القوافي نديمه
ماصارت أحلامه على ماتمنا

لكن في صوته مشاعر عظيمه
صوته يغير حالتي لاتغنا

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

البارحه وانا ورى ضلمة الليل
الليل فيها لابس الثوب الاسود

غير النجوم هناك مثل القناديل
واحلامي اللي من مسافتهن ابعد

وأفكاري اللي غارقه ف التفاصيل
الممكنه واللي من العقده اعقد

ياجارة الوادي ولفت الغرابيل
صارت حياتي مع غرابيلي اسعد

انتي حياتك بين سجع ومواويل
والا حياتك طين وضروفك اقرد

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

ياتويتر مابقي فيك نزل ولا حياه
مابقي غير الركايب وساعات الرحيل
منقطع عنك الهوا والسنابل والمياه
كنت مركاز القصايد وكسر المستحيل
ياه من يوم الموادع ومن فرقاك ياه
كان ذعذاعك خيالي ونبعك سلسبيل

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

تخاطف هجوس الشاعر المبدع الانسان
طواري عنيفه ماتراجع ولا تهدا

تسوق الحنين اللي يخالف على الوجدان
بعدها تجود الذاكره والزمن يبدا

سنين الفرح والدمع والضحك والاحزان
صحيح الحياه العابره مالها مبدا

ياوجه المساء دوبك على حادي القيفان
طلبتك طلب خله على وجهته يحدا

وياليل الوصل والود والهجر والحرمان
سوالفك مايبلى ورقها ولا تصدا

عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

سرى الخاطر اللي من هوجسه عليه خلاف
بعد مانثر وجده مع الريح وحروفه

خذته الطواري والمشاعر على مهياف
تمر الخيال وترسم الطيف وتشوفه

ورى حلمي اللي من ورى الصدر ماينشاف
حكاوي زمان ولحن راقي ومعزوفه

يالليل السهر مدري وش اللي عليه اخاف
على الناي والا عازف الناي وضروفه

حنيني وشوقي والقصايد عليّ أحلاف
ياكيف اتوقا والمعاليق مكشوفه

[عيد عاتق المحمدي الحربي @qn_y8]

#عيدعاتق_الشماسي

خذ اللي تبي من نهري المنسكب وارحل
عليك السلام ورحمة الله على ايامك

ياليت الضروف اللي تبذ الخفا تخجل
من احلامي اللي ماتعارض مع احلامك

مع البعد واسراب الطيور الصباح اجمل
لو ان البحر والنار خلفك وقدامك

عن الصعب دوّر للمشاعر كلام اسهل
قبل لايدور الوقت ويبدد اوهامك

لاصار العذر كذبه يصير الوداع افضل
ورقك انحرق مير اقتنع واكسر اقلامك

✍🏼عيدعاتق الحربي

[عيد عاتق المحمدي الحربي @qn_y8]

#عيدعاتق_الشماسي

ان كان مطلوبك مع الليل موال
هات الحن وانا عليّ القصيده
لاهب ذعذاع الهوى والغصن مال
اشره على اللي مايجيب الفريده
اما نسرّيها على مال يامال
والا على ذيك السنين السعيده
اوجاعنا نضحك عليها ونحتال
بالفلسفه والمفردات الجديده
باقي حنين احبابنا العام مازال
باقي مكانه والقصايد تعيده
ياللي تعاتبنا وتنشد عن الحال
ضروفنا عيّت على مانريده

✍🏼عيدعاتق الحربي