نديم

Bonvoy

[نديم @abr_282]

غبت ياللي تدري إني من الفرقا حزين
ماتخاف الله من الروح واللي ناشها ؟

صار حبّك مثل الايام من عمر السجين
تنحسب له من حياته .. وهو ما عاشها

[نديم @abr_282]

لو إن الطواري تنشرى بعت بأرخص سوم
أنا منزعج من صوت .. ذاكرتي الهادي

[نديم @abr_282]

وش تستفيد القلوب إللي ذبحها الحنان
و أنتي سلامك نظر .. و أنا سلامي نظر !

[نديم @abr_282]

بدايات الشعور الصادق اللي كلنا عشناه
اشوف نهايته لاحت لي الله لا يحييّها

من اول يوم وانا اخاف من كلمة فـ امان الله
تجاوزنا فـ امان الله ولّا عادنا فيها ؟

[نديم @abr_282]

هبايبّ الوقت لو مرت مرور الكرام
كفيلة انها تمر الصفو وتعكرّه

فتحت للعذر بابً كبر باب السلام
لكن رياح الجفا لا هبت تسكره

مدري حلال الجفا فالشرع ولا حرام
يا طيّب الذكر .. ذكّر صاحبي ذكره

ظروفنا من سنة ماهي على مايرام
وجيه الايام .. جحاده ومتنكره .

[نديم @abr_282]

الصاحب اللي عطاك من العمر نصّه
قل للمشاعر ترى هجره من أسبابي

في ذكرياتك ليا سولفةْ به .. خصّه
اذكر له الطيب ، وأترك منسبه غابي !

مثله مثل كل طيّب راس في قصّة
تجاهلوه الرّواه .. وقالوا أعرابي

[نديم @abr_282]

ماني بكامل ولا أقصر مع اصحابي
اشيل همي وهم اللي يخاويني

عاتبتهم لين ما ملوا من عتابي
وخلوني لحالي .. الله لايخليني ؛)

[نديم @abr_282]

زمان الغلا ماعاد وقّف على رجليه
لياليه صارت كلّها مثل عذّالي

ياحبٍ توقّعت الليالي تنسّينيه
على بالي إنّك م انت طاري على بالي

أحبّ الطريق اللي وصالك يمشّينيه
أمرّ مْتضايق / وآتعدّا وانا سالي

[نديم @abr_282]

ما طحت في غيابك لكن كل شي طاح
دمعي وصبري والطموح اللي اطمح

اكلمك وانـا على . . باب الأفـراح !
والمّح من الأفراح مدري وش المّح

قلي كلام زيـن . . يمـكن اني ارتاح
والا كلام شين يمكن اني . . اسمح !

[نديم @abr_282]

اللّٰه يغفر خطاك ويحسن اللّٰه عزاي
عن كل لبّيه بـ لساني — وتامر أمر

أعذارك الكاذبه طوّفتها من وفاي
لين أصبح العذر ماله خانه ولا ممر

بغيب لي غيبةٍ ماهي بـ فتره وجاي
لا والله الا الغيبه اللي صدق غيبة عمر

[نديم @abr_282]

وش اللي سرق من صوتك الحب يا مملوح
لمحت الغلا مفقود من قسوة النبره

اسولف معك ما كن لي فـ السبب مصلوح
وانا والله انها خانقه حلقي العبره

دخيلك لا ترجع لهفتي رجعة المكسوح
ابي صوتك يعوّد علي مثل ما اخبره

ما دورت غيرك يوم غيرك تجي وتروح
على القلب ما تلقى لها دربٍ تعبره

مع الناس قلبي شايبٍ لا جلس مسموح
لكنك لا جيته .. فزّ لك جاحدٍ كبره

معك من تهاليل الغلا ما يرد الروح
مثل ما معك هجرٍ يحده على قبره

[نديم @abr_282]

ودي لو آعرّض الخاطر براد الشمال
أعوذ بالله من نفسي ، ومن سوها

اللي على وصلها حالت ضروف الليال
لسان حالي يردد .. ليتها ، لوها

رهيفة احساس سهلة طبع صعبة منال
ما تاخذ من السجايا غير محلوها

تستأذن الشمس منها قبل وقت الزوال
ضو القمر ما يبين ، الا على ضوها

اوصافها كل ليلة من جمال لـ جمال
اقول يا حلوها .. وتقول لي توها

ياضعفها كل ماجا لـ التراضي مجال
واذا خذينا الامور عناد .. يا قوها

اشوفها الدرة ، اللي تستحق الدلال
تعطيني الجرح واعطيها على جوها

[نديم @abr_282]

البارح الليل من طوله ما مر بـ سلام
كنه .. من اول محرم لين أخر صفر

من كثر ما الليل موحش و المدينه ظلام
هقيت مال الصباح اليا تفتّق سفر !

ما أقول أنا محتري لقيا و موعد غرام
أقول أنا محتري فرقا و موعد سفر

[نديم @abr_282]

يوم شفت وصوفها اللي تخبّل بالعقول
فتنةٍ ربي رسمها على غصنٍ ندي

من تفاصيل الوسامه وتأثير القبول
ودي اعطيها حياتي على راحة يدي

[نديم @abr_282]

من فارق اللي مثلها فارق النوووم
غيداً حلاها عن حلاء الغيد فارق

من دونها حالت تقاليد و سلوم
والعزوه اللي ياسمون المطارق

جدانها اللي تضرب القوم بـ القوم
يوم البيارق في نحور البيارق :)

[نديم @abr_282]

من انزح عن هواه وشف باله ذاق مر الويل
بقت له ذكريات عرضها سبة سهر عينه

سقى الله وقتي اللي تو كمل عام بالتفصيل
قبل لا اجر طاروق الحزن واجيد تلحينه

[نديم @abr_282]

البارحة ما برح قلبي يحسّ بزحام
يا ليتها ليلة آخر حزن يا ليتها

ويا ليت مافي قفص صدري حُروب وحطام
والأمنية ما تحقّق لو تمنّيتها

اخترت من ديرة الهوجاس هاجس سلام
وأنا على هقوتي لا من تهقويتها

لـ الجادِل اللي تعدّاها قصيد المَلام
يا ليتني ما تماديت .. وتحدّيتها

أحبّها صح .. بس أحبّها باحترام
حتى من النَفس صاينها ما ضرّيتها

كِتبت فيها البيوت اللي بعضها حرام
وأنا عليّ الحَرام إني ما مسّيتها

طهر من الغيث لا وطّاه بطن الغمام
وأنقى من أنقى هناديبي لا غنّيتها

آخر لقى بيننا على بِساط الغَرام
سوّيت فيها قصيدة وانسرق بيتها

رَحلت عن بيتها من قبل وقت المنام
ونِمت وخذتني مناماتي على بيتها

أحزانها تحزن الأغصان قبل الحَمام
وجروحها ترهق أعماقي لا داريتها

الحاصِل إنّ الكلام اللي عليه الكلام
وصّيتها لا تخلّيني .. وخلّيتها

[نديم @abr_282]

ان ضعت في مركبة عينك ياملح الغرام
جعلني اضيع في عينك ولا عاد ادل

مثل ما وجهك صباح من الرضى والسلام
شعرك مثل ليل من فوق المتون انسدل

انتي مثيرة حِسن و انا علي الحرام
لا شفت ما ثارني لازم .. اثير الجدل

[نديم @abr_282]

الليل ستر الفضاء والطيب ستر النظام
والصمت ستر الشعور الا على المنتبه

الناس تطربهم القمرا وصوت الحمام
وانا الوحيد اللي الثنتين ماتطربه"

[نديم @abr_282]

يامجمول مال الزين غير القصيد الزين
شوارد قصيدي فيك تِتلى ولا تَتلى

على كلّ حاجه - معكْ احقيّة التمكين
لو اشرقت عكس الشمس ماكان قالت لا

اهدّي فوادي كلّ ماشفت شوف العين
من آيات ربّي فـ البشر آيةٍ ، تُتلى

نصدّ البنادق و انت بـ عيونك الثنتين
" تعرضّتنا صاحين ،، وارديتنا قتلى "