أجي مثل المطر ما بعده إلا ذعذة نسناس
يطهّر وجه الأرض اللي تعاني من رواسبها
تقدّيت بكلامي ما تقدّيت بكلام الناس
خسارات الدروب أهم عندي من مكاسبها
أنا ماني بناقص معرفة ولا بليد إحساس
عشان أحط نفسي في مكانٍ ما يناسبها
الطيب يا راعي المشاريه .. ما فاد
بعض الوصل والودّ والجود تبذير
من لا يقدّرني على روس الأشهاد
لا ينتظر منّي حشيمه وتقدير
اللي قطع لي درب بقطع له بلاد
واللي بدا الجفوه عليه المعاذير
علِّ ما باس ياللي تشتكي حب غالي
منوته شوف خلٍ ما يدور بديله
واجد الناس لكن ما لغيــره مجالِ
لاذكـــر ما مضى له والليالي الجميلة
يا وسيع المعرفة ما جرى لك جرالي
إسأل اللي مجرب له سنينٍ طويلة
لاتحط التوجد والعنى راس مالي
ذي سواة الهوى دايم حموله ثقيله
أحلام قلبي كبيره من كبر شاني
والصعب لاهل الصعب تتسهل دروبه
مدري على وين بمشي لكن إيماني
أصدق من إيمان مذنب مسته توبه
عندي يقين بعدل ربي و ميزاني
من عاش يتبع ضميره فاز بحروبه
ما طيح الله هالدعوات بلساني
الا وهي ليّ مقسومه و مكتوبه
ماني بحيّ الله تحده على أقصاه
حتى لو إني عن مقامي تواضعت
أنا السماء مالي على قاعك أشباه
شريت نفسي بالمعزة ولا بعت
من طاح من عين الرضا حقه وجاه
أنا عن اللي ما يناسبني .. ترفعت
أنا أشوفك بقلبي والنظر للناس
غرامك عاجزٍ لا اشوفه بعيني
ليا مني لقيتك ضاعوا الجلاس
وليا مني فقدتك عاد أنا ويني ؟
ورغم كل المشاغل سيرتك الأساس
ليا صار الحكي ما بيني وبيني
لك الله ما خذلتك وأترك الوسواس
أحبك وأنت ِ فيني وكل ما فيني