Ahmed @alkalawyi - Twitter Profile

4 days ago

لو مش لاقي شغل، ما ينفعش تسيب يومك يفرط منك لأن أسوأ حاجة ممكن تحصل في الفترة دي إنك تصحى كل يوم متأخر، تقدم على كام وظيفة عشوائي، تفضل مستني رد، تكتئب شوية، وبعدين تنام حاسس إن الدنيا وقفت هي الدنيا ما وقفتش أنت بس في مرحلة انتقال، والمرحلة دي محتاجة منك تدير يومك كأن عندك شغل وشغلك الحالي هو إنك تلاقي فرصة، تخلق دخل، تطور نفسك، وتحافظ على روحك قسم يومك لأربع أجزاء: أولًا: تدوّر على شغل بجد مش تقدم على ١٠٠ وظيفة وأنت مش عارف قدمت فين ولا الوظيفة أصلًا مناسبة ليك ولا لأ ظبط الـCV و LinkedIn حدد الشركات والوظائف اللي مناسبة ليك قدم كل يوم على عدد معقول من الفرص، بس قدم بشكل محترم ومخصص لكل وظيفة وخلي الناس تعرف إنك متاح ابعت لزمايلك القدام، مديريك، عملائك، وأي حد في مجالك: “أنا متاح حاليًا لفرص جديدة، ولو عندكم احتياج أو تعرفوا حد محتاج خبرتي، أكون ممتن جدًا.” ما تتكسفش.. أنت مش بتشحت شغل لا مؤاخذة أنت بتعرّف السوق إن عندك قيمة و وقت متاحين ثانيًا: ما تستناش الفرصة… اخلق واحدة مش لازم رزقك الجاي ينزل عليك في صورة وظيفة ومرتب وتأمين طبي ولابتوب جديد ممكن ييجي في صورة استشارات .. تعمل تدريب او تدريس حتى لو لطلبة مدارس .. مشروع صغير مضمون.. أي عمل حر شريف يجيب دخل و يقلل الضغط من عليكم و ابدأ بحاجة بسيطة و عشان خاطري ما تستناش المشروع اللي هيغير التاريخ… و نروح تصرف باقي الفلوس اللي معاك تفتح بيها مشروع تربية كتاكيت و تنستناها تبقى فرخة و تبيض.. إحنا بس عايزين مشروع يدفع الفواتير و الاقساط الأول، وبعدها نبقى نغير التاريخ براحتنا مفيش استعجال ثالثًا: اتعلم حاجة تزود قيمتك برضه مش وقت إنك تفتح ١٧ كورس وتخلص منهم المقدمة اختار مهارة واحدة مطلوبة في مجالك او حاجة محتاج تتقنها و اتعلمها كويس و طبقها لأن السوق دلوقتي مش مهتم قوي بعدد الشهادات اللي على LinkedIn السوق مهتم يعرف: أنت تقدر تعمل إيه دلوقتي؟ وإيه المشكلة اللي تقدر تحلها؟ و هل عندك سابقة اعمال تثبت ده و لا لا؟ رابعًا: حافظ على علاقتك بربنا صلاتك في وقتها.. ورد قرآن ولو قليل… دعاء…استغفار.. صدقة ولو بسيطة. اطلب الرزق طبعًا، لكن اطلب كمان السكينة، القوة، البصيرة، وإن ربنا يبعد عنك فرصة شكلها حلو وهي شر ليك، ويقرب لك الخير حتى لو أنت مش شايفه العبادة مش بديل للسعي لكن السعي من غير قلب متوكل على ربنا بيستهلك الإنسان جدًا و تحس انك ريشة في هوا و الدنيا جاية عليك جامد عدم وجود وظيفة حاليًا لا يعني إنك فاشل.. ولا يعني إن قيمتك قلت ولا إن كل الناس سبقتك وأنت الوحيد اللي واقف أنت في مرحلة صعبة، آه لكنها مرحلة… والباب اللي مكتوب لك هيفتح في وقته…

14

909

135

564

56K