الحربي

لاللتعصب القبلي والمذهبي والرياضي نعم للحس الوطني والغيره على الاسلام وفي عنقي بيعه لولاة امري نذرت نفسي فداهم &ياسيدي سلمان ماغيرك ملك&طاعتك طاعه للاله وللرسول

[الحربي @as197293]

اعطيتك الفرصه تقرب وبعدت
وكم فرصةً ضاعت ولا عاد عادت
مشكلتك انك بالصبر ما تزودت
ونفسك من احداث الزمن ما استفادت
انا اعتبرتك من حياتي تقاعدت
يعني على ما قيل عشرتك بادت
ما اقول بانك في عشيرك تنقدت
اقول جزنا بعد دلتك صادت
لا تامن الدنيا لا طابت وعيدت
كم عالمً قبلك فنت بعد سادت

[الحربي @as197293]

وا هنئكم يا اهل القلوب الخليه
متريحين بلا مشاعر ولا هم

ما انتم سوات اللي بقلبه سريه
في كل يوم يشوف تعدادها كم

دايم لقائدها تدق التحيه
ومزمارها يعزف سلام المعظم

وانتم حوالين الديار المريه
وتجيبكم على العشا ريحة الدم

[الحربي @as197293]

رفيقك اللي ما يجي لين تنخاه
اليا نخيت انخى من الناس غيره

اللي يطالع فيك ويحك علباه
ما به رجا لا تعترض خط سيره

خله عساها هفة مقيط ورشاه
يغيب عن عينك بشره وخيره

لابد ما يطفؤ دقيقه على ماه
ويحتاج لك في يوم ما طار طيره

[الحربي @as197293]

يا رب أنا قصرت في وصل الأرحام
لكن حنا وضعنا ما يساعد

أطارد العالم ويمشون قدام
ازريت في ناسً يبون التباعد

احجز موعد لجل سلام الإسلام
والناس ما يوفون وقت التواعد

احفيت جلد الوجه واحفيت الأقدام
يارب منك العذر منا وصاعد

[الحربي @as197293]

الحلو يا اخوي فارقني وفارقته
بعد قضيت العمر كله وانا احبه

اليوم حان الفراق وصار ذا وقته
حكم علي الزمان اروح واكبه

من بعد خمسين عام اليوم طلقته
عشرة عمر صدق ماهي معرفة هبه

عساه يخلي سبيلي مثل ما اعتقته
وعساه يرضى الفراق أربه أربه

[الحربي @as197293]

والله ما اجزا جميل عبيد
لو كان للبيت حججته

فزعاته بدون شرط وقيد
يفزع لو اني ما هرجته

غمرً يصيد المراجل صيد
وان قلت لي لازم أبهجته

حويمضيً يجيب الفيد
لو تحرج البحر ما أحرجته

عيبه يبيد الرعايا بيد
يمناه كم راس دحرجته

ما اذم حجرف ولا ابن مهيد
اعد شيءً تفرجته

[الحربي @as197293]

يا الله دخيلك من الخذلان والحاجه
لا ابديت حاجتك للي ما يقدرها

صلفات الايام تبغى صبر ومواجه
لا تنحني للظروف ولا تسايرها

اعصب لها الراس واطلب ربك وناجه
وابذل لها الجهد لين الله ييسرها

لا تنخدع بالعلوم الناس هراجه
تخدعك وانته مجربها وخابرها

[الحربي @as197293]

ياشعب غزه تراي أحساسي إحساسك
يا الله دخيلك من الاحساس بالخيبه

العرب ماهم معك لو تعصب راسك
تبشر بالإحباط والخذلان والسيبه

وأكبر مصيبه لا جاك الغدر من ناسك
هذي هي العيبه اللي تعتبر عيبه

خلك مع اللي يقوي باسهم باسك
اللي حمو من عداهم مكه وطيبه

[الحربي @as197293]

الفرصه اللي جات مره وراحت
لومك على اللي فاتته ما اغتنمها

وين انت يوم بروق الامطار لاحت
والسيل حدر والمعالم هدمها

واليوم بعد انك بواكيك ناحت
لا ترتجيها دام ما الله قسمها

اشرب قهوتك بعد دلتك فاحت
والا السمينه ما انت ذايق دسمها

[الحربي @as197293]

الصاحب اللي ثلاث ايام مزعجني
يمزح ويمدح ولاسكر تلفونه

ويقول لي كل يوم ليا فضيت اجني
دله وبراد على الكيف موزونه

ماباقي إلا على متنه يحججني
ويحطني من يديه بداخل عيونه

واثره يخطط وله حاجه ويدرجني
يمشي على سكتي ويشيل ماعونه

ومن يوم قضى لزومه مايهرجني
الناس بالمصلحه هالوقت مفتونه

[الحربي @as197293]

ياهيه وصلتنا الرسايل ومشكور
من دون لاتحكي ترانا فهمنا

ليتك تعذر عذر وافي ومعذور
ونقول روح الحمدلله سلمنا

من سابق الايام ما ناكل السور
شيمة بدو حنا عليها فطمنا

عادتنا ما نمشي إلا على نور
وان مالقينا زاد جزنا وصمنا

واعرف ترى ما احدً على الناس مجبور
وختامها كرمكم الله وقمنا

[الحربي @as197293]

ماكل عذر يساق مقنع ومقبول
احيان تلقى عذر ماله مبرر

العذر له عده مفاهيم واوصول
اعرف مفاهيمه قبل لا تقرر

لا تسوق لي عذرً معرى ومغسول
تبغى تمرر ما انت عارف تمرر

حاول تدور لك على عذر معقول
عيد البيان وقول غلطة محرر

[الحربي @as197293]

لا صار ما بك فود يا اصابع يدي
وشهو له اسما بابو عشر اصابع

احسن لي اقطع عروقك وانا حي
ولا يوصلك من دم قلبي منابع

تجاربك ما حسنت وضعي السيء
ولاعاد ينفع فيك تحسين طابع

والعله المستعصيه طبها الكي
لو الطبيب يقول حلل وتابع

[الحربي @as197293]

اللي تخلى عنك في ساعة الضيق
وقت الرخا ما انته بحاجة وجوده

ابعد وخل ابواب وصله مغاليق
عسى حدودك ما تقرب حدوده

لا جنب سلوم العرب والمواثيق
لا تحتزم به لو جدودك جدوده

تلقى بداله من خيار المخاليق
صميدعً ما كل دربً يكوده

[الحربي @as197293]

لا صار عندك شمري لا ترحب
خل العلوم اللي لاهلها لاهلها

الدرهمه ماهي سوات التسحب
وشمر هل الترحيب ما احدً جهلها

واللي يقلدهم بوجهً مشحب
يبطي صحيح وغايته ما وصلها

اقولها ما احسب حساب المنحب
واهل الزعل ماني مداري زعلها

[الحربي @as197293]

تبي النصيحه لا تردى بعد طيب
رداك بعد الطيب هذي مصيبه

العام تحسب من رجال المواجيب
واليوم وضعك غير والله غريبه

الطيب وهبه والردى له مجاذيب
والمعدن الطيب عروقه تجيبه

ماهي بكيفك تحضر ايام وتغيب
المرجله تبغى رسوم وضريبه

[الحربي @as197293]

عديت لك وحده ووحده وثنتين
لكن فيه امور ماتنتعدا

تعمل معي معروف وتمن يا شين
مادام تبي تمن ليتك تردى

اهجد ترى فزعتك ما سددت دين
لو امتلى قلبك حسايف وصدا

يامطفي الانوار رايح على وين
كم واحدً قبلك تهور وهدا

السن فيه السن والعين بالعين
تغدر بك الايام وانت المبدا

[الحربي @as197293]

اللازم اللي صدق ما عنه معذار
يجبرك يا الرجال تربط حزامك

وليا حصل معها معزه ومقدار
خلك صتيمه لا تراخى عظامك

اقدم ولو تاطا على واهج النار
العار متقفيك والموت امامك

والناس ما تعذرك لو صار ما صار
لازم تحمل لو تعكس نظامك

[الحربي @as197293]

يا زيد والله غربلتنا المشاوير
نسعى وبعض احيان نرقد قوايا

وان قلت الوزنه نردد مقادير
كم ناس فيها الوقت سوى سوايا

نعصر لكن الزيت ما يدهن السير
دنيا العنا تبغى يدينً ملايا

فتنه وبقعاء شرها اقوى من الخير
متربعه والها حثول وزوايا

[الحربي @as197293]

ما انت والله محقق ثامن المعجزات
خل عنك علوم الفلسفه والحكي

ردها يم اهلها كان راحت وجات
ثم ترجم شعورك ضحك والا بكي

خلها عند من ياقف بعزم وثبات
يرتكي للحمول بمتن ما يشتكي

كم واحد بغى يفعل وهون ومات
وانت عاد افهم لنفسك وخلك ذكي

[الحربي @as197293]

أبديت لي حاجه على شخص مخصوص
ما أبديتها قبله على شخص غيره

ولو كنت اعرف انه عن الدرب بيحوص
ماكان في السكه تعرضت سيره

وانا اعتبر هذي نقاده ومنقوص
تنصا رجل ما تذكر الناس خيره

أخير منها لو تجلس على خوص
في لاهب من القيض ما طار طيره