亞特／A-te̍k

Chìn gâu 踅踅唸 ê 宜蘭腔。
台語人．Podcaster．廣播人
聽故事，敨心事，台語話萬事。

[亞特／A-te̍k @atlantis919]

理想肥軟肨奶，
Lí-siáng puî-nuí hàng-ling,

現實三角六肩。
hiān-si̍t sann-kak-la̍k-king.

[亞特／A-te̍k @atlantis919]

毋知當年彼寡面對狗走 soah 來豬，剪斷母語舌，逼學北京語 ê 阿公阿媽，猶有潘木枝、陳澄波、李瑞漢這款台灣菁英，敢 mā 是 chiah-nī 保惜「注音」？

[亞特／A-te̍k @atlantis919]

【台灣果子 ê 滋味－－檨🥭】
最近當衝 ê 果子話題，一个是賣去法國 ê 貴蔘蔘檨仔， 一个是生死搦 toh 人手頭 ê 王梨釋迦(毋是王梨+釋迦)，論真講台灣 ê 果子好食--ê 有影是濟濟，王梨釋迦我 mā 有興，毋過這時已經無著時矣，曷若槎仔就無仝矣，現此時當咧大出，除了我上意愛 ê 愛文，玉文、金煌、西施、烏香、凱特、芳水(香水)、金蜜……各種各樣，認捌袂了。

讀大學時，學校外口是規路 ê 土檨仔做行道樹，到檨仔 ê 時節，坐 o͘-tó͘-bái-á 路過有淡薄仔危險， mā 定定有學生夯篙仔去拍檨仔落來做檨仔青(情人果)……話講翻頭，號做土檨仔，敢就是台灣在種--ê？

其實土檨仔自本就是外來 ê 果子，不過伊來 ê 時間真早，應當是 ùi 印度傳到東南亞了後，由當年荷蘭人 koh ùi 東南亞紮來--ê， 清國官員黃叔璥來到台灣了後所寫 ê 《臺海使槎錄》內底 ê 卷三〈赤崁筆談‧物產〉就有記錄著檨仔這款對伊來講罕見 ê 食物。

根據黃叔璥 ê 講法，彼時號做「檨」或者「番檨」ê 果子已經分做三種：香檨、木檨、肉檨。伊講原本無「檨/soāiⁿ」這字，伊判斷認為可能是誤寫，毋過我咧想真有可能是荷蘭人 ùi 東南亞帶來 ê 時所留下 ê 原音轉化才 koh 創一个字予伊用。

後來朱仕玠《小琉球漫誌》寫著檨，照抄《臺海使槎錄》，毋過寫做香檨、木檨、內檨，「肉」減二劃變做「內」，恐驚是有人抄 mā 抄走精去，koh 好意思講「槎」字是「按字書無檨字，系臺人訛造」。

彼時主要食木檨、肉檨(香檨凡勢毋是真正檨仔？)，當然佮這時改良 ê 袂輸糖做 ê 品種無仝，著 ài 先曝焦、chhiau 糖才 koh 炊過才提來食，這款做法 mā 較 ē 堪得囥久。

除了甜路食法，檨仔 mā ē-tàng 提來代替菜蔬，搵豆油或者鹽做伙食，除了表示伊 ê 甜分確實無到 ē 予人隨隨 kā 當做果子╱甜路 ê 程度，而且合理推斷並 taⁿ ê 品種 mā ē 加較厚絲(纖維濟)。

相片內底是今仔日買 ê 果子，愛文3粒、西施1粒、木瓜1粒、甜美人1粒，攏總台票355箍，toh 台灣食果子，有影是幸福 ê 代誌，這款好滋味，除了咱家己享受，若欲分人了解，也著揀彼款真心佮意美食 ê 國家，毋免提咱 ê 果子去予人蹧躂、使弄 koh 搦疼筋。

其實猶有一寡仔咱日常所看著 ê 果子，予人誤會當做是臺灣在種--ê，日後有機會才來節目內底講，是佗一个節目咧？你臆看覓。

你敢有特別 ê 檨仔食法？請介紹予我知。

--《臺海使槎錄》原文--
「檨三種；香檨、木檨、肉檨。香檨差大，味香不可多得。所食者，木檨、肉檨。曬乾用糖拌蒸，亦可久藏。臺人多以鮮檨代蔬，用豆油或鹽同食。北路自半線以上，則絕無矣。字釋無「檨」字。色味似杏，或是番杏誤作檨。檨實大如豬腰子，葉尖長。居易錄作番蒜。」

[亞特／A-te̍k @atlantis919]

串穎培養出來 ê 鹿角蕨，大 kah 通換枋矣，討論一睏仔了後，決定創六角框來安，看著起毛 chìn 婸。

[亞特／A-te̍k @atlantis919]

「是在優越什麼，？閩南語就閩南語，還台文」。

無彩這篇我回--ê 人家己刣掉矣，猶是轉來 chia 罔拍抐涼，伊原底是佇我 kā 別人寫 ê 華星文鬥翻做台文 ê 彼穗留話--ê，伊留--ê 就是上起頭彼句。

平常時我無咧應這款留話，毋過罕罕仔手頭有閬縫猶是 ē 罔做耍，阮 mā 毋是袂曉「應話」ê 人☺️
--
猶是想欲提醒逐家，無論敢 ē-hiáu 台文，九成九 ê 人攏是無歹意或者感覺趣味才來留話--ê ，惡意 ê 人毋是無，毋過咱毋通豬頭毋顧去顧塗豆，盡看彼款少數厚行 ê 人，soah 來感覺失志或者過頭慼心。

[亞特／A-te̍k @atlantis919]

今仔日看著台語路親子樂團免費授權逐家使用 in ê 囡仔歌作品，真正感受著這陣人對囡仔 ê 台語教育有偌爾仔熱情，AI教父 aka. Where is the door? ê 黃仁勳 kā 台灣囡仔講 「You need to learn Taiwanese.」對囡仔來講，唱歌跳舞就是上好上緊 ê 學習。

同樣捌替台語路親子樂團創作囡仔歌 ê 昭華 sin-seⁿ，這遍佇 公視台語台 第二屆 ê 《咱的歌》台語囡仔歌徵選比賽做評審，無論我按怎牽龜落湳設陷阱，伊就是毋肯講出啥款囡仔歌較有機會著等提獎金(著一條就十萬呢！)，我想佮伊講 ê「歌 ài 濟」有關係。

「ài 濟」是一款無限定，無限定著照古早 ê 歌謠、無限定著唱出一个故事，你對囡仔罔哼罔唱 ê 安搭、做伙𨑨迌 ê 笑聲，攏有可能變做一條囡仔歌，毋免音樂人出身、毋免專業背景，你若願意為囡仔唱歌，凡勢攏通來試看覓，先聽看覓昭華 sin-seⁿ 敢有透露啥款鋩角，紲落來就準備去投稿囉！

#社群咧衝啥
https://t.co/Lj7mj8kAah

[亞特／A-te̍k @atlantis919]

有當時仔欲解說「著」這个 ê 文法，有淡薄仔困難，雖然我定定講「真濟歌詞 ê 『V+著』」ê 文法有問題，真可能是去穢著華語 ê 「V+著」」，毋過佇宜蘭較實有一款「V+著」雄雄看足成是有問題 ê 文法，事實上應該是宜蘭腔 ê 範圍，這款用法 ē-sái 鬥 ê 動詞有定著，毋是所有V攏聽好「+著」，而且一再觀察，確實是老台語人才 ē án-ne 用(特別是袂曉講華語 ê 彼款)。

比論講進前去訪問阮姑婆：
「拄欲食落去，去予阮阿章看--ê， 阮阿章咻咻叫 kā 『尋著(siâm--tio̍h)』，阮阿章講阿兄你 taⁿ 是痟 hioh！」

[亞特／A-te̍k @atlantis919]

Firstory ê 「AI萃取」功能比我想--ê 較厲害，全台語 ê 節目音檔，竟然分析 ē 出內容，而且產生段落大綱、心智圖、逐字稿(這个有較悽慘)、問答、關鍵字佮回顧 ê 功能，而且內容重點掠 kah 真準(人名寫毋著字這點較袂用得怪罪伊啦)，除了……

「奧蘭教」是啥款新興宗教是無啦？！！🤣

[亞特／A-te̍k @atlantis919]

🎧各大平台收聽

https://t.co/8RHlJkyq4E

[亞特／A-te̍k @atlantis919]

「渣男」台語怎麼講？在這裡教大家一個詞：「漚 lān 鳥／àu-lān-chiáu」，不會唸就去聽節目，出現好幾次，包你學得會。
--
好啦！除了這款詞，阮 mā 足認真咧討論《人間失格》台文版、台文譯者 Avery ê 台語路，猶有太宰治&大庭葉蔵 ê 失格人生。

[亞特／A-te̍k @atlantis919]

去「書房有光」除了去插花仔阿銘 ê 台語社群活動，也順紲紮轉一本 bàng-gà，聽講已經是絕版，我 mā 是真 gâu 揀。😆

[アジアと芸術digital @asia_arts_books]

台湾では、国語である「台湾華語」が社会に広く浸透する一方で、かつて最も話されていた「台湾語」の使用率が低下しています。

台湾の歴史や文化とも深く紐づく台湾語を次世代に伝えようと、台湾南部の嘉義に拠点を置くクリエイティブ・スタジオ「平凡製作（studio ordinary）」は、＜嘉義台語季＞と題したプロジェクトをを3年間にわたって展開してきました。

台湾語での演劇の上演や絵本の読み聞かせ、職人の工房でのワークショップなど、多様なプログラムを通じて台湾語の魅力を伝える平凡製作の取り組みをご紹介します。

【ルポ】失われゆく台湾語をクリエイティブの力で取り戻す――「平凡製作」が仕掛ける＜嘉義台語季＞の取り組み／文＝南部健人https://t.co/a9kRnkSOXj

[亞特／A-te̍k @atlantis919]

望你激一个「好面腔/hó bīn-chhiuⁿ 」。

[亞特／A-te̍k @atlantis919]

黃仁勳一句「你袂曉講台灣話喔？」佮 "You need to learn Taiwanese."，佇網路社群激起千層浪，各種反思、檢討、分析與笑詼皆有之。

我無想欲綴風尾、傍聲勢，而且講實在話，吵吵鬧鬧了後，是有影有應效，抑是前雷後雨沃袂澹塗？我無偌大 ê 向望。

只是看著人講「要讓小孩學母語還是外語，是父母的選擇題」，歹勢我實在無法度認同，對家長來講， 一來這二項本底就是無仝代誌，囥做伙比並是跤腿比煙筒，根本「関係ない」，家庭內真正 ē-sái 犧牲--ê ，是你無想學都學 ē-hiáu ê 華語，伊 soah 從來無佇選項內？

二來對囡仔來講，母語斷舌毋是選擇，是剝奪，母語該當是伊 ê 權利，除非你有才調予伊學 ē-hiáu,，大漢了後才家己決定日後欲用無，若無佇囡仔猶無自主決定 ê 能力 ê 時，伊就斷舌矣，che 毋是剝奪，啥是剝奪？

當然我毋是欲見怪任何無予囡仔母語環境 ê 家長，咱攏知影現實有偌困難，有心 ê 人無一定有資源，總是，無希望這个社會真正接受「母語『只是』一个選項」，彼个「只是」ê 存在，正正是咧搝斷伊生存 ê 活命索。

講轉來「仁勳契爸一句話」ê 代誌，比起前雷後雨，我 koh 較信用濟濟台語囡仔 ê 爸母是「小雨袂堪得捷落」。

[亞特／A-te̍k @atlantis919]

最近國內新聞的關鍵詞之一大概就是「內鬥」，標準的「牛牢內觸牛母(Gû-tiâu lāi tak gû-bó.)」，什麼「你失智！」「你貪汙！」的語彙滿天飛，外人則是「徛懸山看馬相踢(Khiā koân-soaⁿ khòaⁿ bé sio-that.)」的看戲心情。

隨著劇情發展開始出現一些讓大家懷疑起某些錢是不是「見不得光」的討論，我就在想「能見得光」與「見不得光」的台語會怎麼說呢？

第一個想到使用率算高的就是「見眾╱kìⁿ-chèng」。

「見眾」就是公開於眾人面前，因而衍生二個意思，其一是能不能「登得大雅之堂」、「上檯面」，比如穿著不合宜、就可能會被說「你穿甲按呢阿里不達敢會見眾得？(Lí chhēng kah án-ne a-lí-put-ta̍t kám ē kìⁿ-chèng--tit?)」也就是指穿著不適合公開在大眾面前。

另一個會被認為「袂見眾得」的就是今天要說的「見不得光」，一旦公諸於世就會見光死的人事物，自然就無法「見眾」，不過通常「袂見眾」是略帶有德道上的負面意義，還是得略做區分，例如偶像明星戀情不公開，這大概只能說是不公開，但如果是搞婚外情，那就屬於「袂見眾」的事了；當然新聞事件裡錢的來源令人起疑，就可以說「我看彼條錢的確是袂見眾得的錢。(Góa khòaⁿ hit-tiâu chîⁿ tek-khak sī bē-kìⁿ-chèng--tit ê chîⁿ.)」。

※「見眾」除了讀成 kìⁿ-chèng，《臺日典》裡也記載 kiàn-chèng，不過後來就幾乎不見這個發音 ê 記錄了。

[亞特／A-te̍k @atlantis919]

〈歌仔戲咧衝啥？原鄉宜蘭出將才，歌仔上青少年組提金牌〉
🎧官網收聽丨 https://t.co/Oyr066tB8E
🎧Applepodcast丨 https://t.co/JvUdCLpDHt
🎧Spotify丨 https://t.co/FYcLJwgrje
🎧Youtube丨 https://t.co/0zpDMni2hv

[亞特／A-te̍k @atlantis919]

前一站仔佇網路頂看著有人講，伊 ê 三歲囡仔真 gâu 偷聽大人講話，大人咧講話無想欲予囡仔聽有 ê 時，就 ē 改講台語，有一回囡仔擋袂牢，雄雄講：「你們幹嘛講英文！」

這就是現實，你 ê 囡仔毋是袂曉講台語，是 hām 你講 ê 話是台語伊都毋知，che 毋是一、二个個例，是愈湠愈開 ê 社會現象，所以我真歡喜家綺 ē-tàng 去愛著歌仔戲、去為著歌仔戲 kā 台語抾倒轉來，ē-tàng 拍拚比賽著等、佇台頂全台語致詞。

我 mā 真歡喜通仔感受著家綺 ê 阿母就算無輾轉，也願意試看覓加講台語，我想 he 是對囡仔 ê 愛所致，雖然聽講家綺 ê 阿爸有時 ē kā 人笑，希望阿爸 ē 沓沓仔 kā 家己 ê 母語傳予囡仔，mā 鼓勵家綺 ê 阿母，袂使因為是家己 ê 牽手就近廟欺神，叫人莫講矣😆。

總講一句，真恭喜家綺提著第三屆歌仔上青比賽少年組冠軍。

特別感謝 嶼伴書間 借我一个四序 ê 空間通錄音，ló͘-la̍t！

Photo Credit: 家綺 ê 阿母
--
家綺 ê 阿母有呵咾我寫 ê 節目簡介，所以我順紲貼出來～

「歌仔上青」全國比賽第三屆，少年組冠軍家綺真光彩，伊是宜蘭囡仔出將才，宜蘭是歌仔戲原鄉無凊彩；毋過聽講伊小學時毋但袂曉講台語，甚至毋捌啥貨是歌仔戲，糊里糊塗參加社團去，自此煞心愛著伊。

較早的人有講起，無捨無施囝做戲，爸母按怎改心意，肯予囡仔學歌仔戲？老爺飯無輕可食，想欲學戲往佗行？連紲三屆擂台拚，不負苦心得頭名，名師呵咾會觸舌，台風在在好演技，致詞也是全台語，網路社群引注意；少年囡仔好才情，戲曲之路是苦行，明日之星待翻騰，來聽家綺心路程。

[亞特／A-te̍k @atlantis919]

最近網路頂愈來愈濟人咧講「敢講老鼠災(che)了後，文藝復興欲來矣？」

雖講 mā 是有眾人 ê 向望，當然這款罔講耍笑 ê 成分猶是較大面啦，不而過猶是想欲提醒一件代誌，文藝復興當然是一个寸尺真闊 ê 統稱，內底意義 mā 各種各樣，只是較籠統來講，14-16世紀「文藝復興」佇歐洲歷史上毋是仿古，是 koh 較回到自身 ê 角度，用新 ê 方法、新 ê 技術去重新看待古典時代，也思考人佮世界 ê 關係、人佮家己 ê 關係。

彼時 ê 人愈來愈了解著用屬於家己 ê 地方語言寫作，你是啥人，關係你用啥語言表達家己，若欲講向望一个屬於台灣 ê 文藝復興，你認為台灣 ê 本土語言佇內底應當是啥款角色？

[亞特／A-te̍k @atlantis919]

※感謝王昭華 sin-seⁿ 提醒，是我小可仔聽走精去，比對一寡仔資料了後，應該寫做「楊麻葉(iûnn-muâ-hio̍h)」才著，在此特別說明。

[亞特／A-te̍k @atlantis919]

楊双子《臺灣漫遊錄》得著國際布克獎了後，冊內底 ê 臺灣食物之一「麻穎」mā 雄雄受人致重，伊佇冊內底寫「麻薏」，其實只是源自台語 ê 音譯，猶是希望逐家盡量用伊原本 ê 名來稱呼伊「麻穎/muâ-ínn」。

這款取自「黃麻幼葉」ê 食物定定予人講是臺中特有，二個月前有聽友讀《臺灣漫遊錄》來問，聽講宜蘭人 mā 有食，毋過無啥確定叫法，本底答應若有搪著佇市仔走跳 ê 朋友才來問一下，soah 一直無機會，昨昏 koh 看著有人咧講，決定殘殘請出阮阿娘，直接傳話音來 kā 問，伊一聽講「有啊，油麻葉恁阿祖(查某祖)較早上愛食，攏佮番薯做伙煮。」

伊一講，我頭殼內才浮現細漢時 ê 畫面，確實阮阿祖往過三不五時 ē kā 番薯佮一寡仔青青軟軟爛爛 ê 菜葉做伙煮，食起來有淡薄仔𣻸𣻸(單純口感) ê 感覺，我自此無 koh 再沐過，原來彼時食著--ê 就是油麻葉，也就是麻穎。

阮阿娘特別有交代，油麻葉欲煮進前著 ài koh 甪過(lut--kòe)，若無食起來 ē 苦，較早阮阿祖除了番薯，mā有濫覓菜佮魚脯仔做伙煮湯，宜蘭人口味，予逐家做參考。

※佇宜蘭若想欲買著，ē-sái 揣看覓市仔邊仔 ê 擔仔，跍佇塗跤賣菜 ê 彼款。

Photo Credit:
圖內底 ê 麻穎湯相片，特別感謝《羅生門》台文版譯者林東榮提供、東榮兄 ê 夫人料理。

[亞特／A-te̍k @atlantis919]

※聽友講 in 爸母讀做「油麻樣(iūⁿ，無確定漢字)」，我 koh 揣其他序大比對，原來食材本身是油麻葉，煮好了後 ē kā 叫做「油麻樣」。

[亞特／A-te̍k @atlantis919]

楊双子《臺灣漫遊錄》得著國際布克獎了後，冊內底 ê 臺灣食物之一「麻穎」mā 雄雄受人致重，伊佇冊內底寫「麻薏」，其實只是源自台語 ê 音譯，猶是希望逐家盡量用伊原本 ê 名來稱呼伊「麻穎/muâ-ínn」。

這款取自「黃麻幼葉」ê 食物定定予人講是臺中特有，二個月前有聽友讀《臺灣漫遊錄》來問，聽講宜蘭人 mā 有食，毋過無啥確定叫法，本底答應若有搪著佇市仔走跳 ê 朋友才來問一下，soah 一直無機會，昨昏 koh 看著有人咧講，決定殘殘請出阮阿娘，直接傳話音來 kā 問，伊一聽講「有啊，油麻葉恁阿祖(查某祖)較早上愛食，攏佮番薯做伙煮。」

伊一講，我頭殼內才浮現細漢時 ê 畫面，確實阮阿祖往過三不五時 ē kā 番薯佮一寡仔青青軟軟爛爛 ê 菜葉做伙煮，食起來有淡薄仔𣻸𣻸(單純口感) ê 感覺，我自此無 koh 再沐過，原來彼時食著--ê 就是油麻葉，也就是麻穎。

阮阿娘特別有交代，油麻葉欲煮進前著 ài koh 甪過(lut--kòe)，若無食起來 ē 苦，較早阮阿祖除了番薯，mā有濫覓菜佮魚脯仔做伙煮湯，宜蘭人口味，予逐家做參考。

※佇宜蘭若想欲買著，ē-sái 揣看覓市仔邊仔 ê 擔仔，跍佇塗跤賣菜 ê 彼款。

Photo Credit:
圖內底 ê 麻穎湯相片，特別感謝《羅生門》台文版譯者林東榮提供、東榮兄 ê 夫人料理。