احسن ظنونك عسى بالامر خيره
وبين قالات العرب خلك محايد
والرجل ماكل موضوعاً يثيره
وكل منقوله ترا بيها زوايد
والبعيد ان اعتمد يمك كبيره
ما سرى الا خابرك راعي عوايد
والقريب اذا تجاهلك بصغيره
يمكن انه ذاخرك وقت الشدايد
ان شفت لك شخصين مبطين رفقا
مايعني ان الوقت معهم ماحمي
لكن رفاقتهم على وضح النقا
ماحد سمع من بينهم صوت الرمي
منزل زعلهم سيل يجرف مالقا
عذراً نقياً ماه يروي من ظمي
ماينشدون الماضيه واللي بقا
وعيونهم عن زلة الثاني عمي
ماهي اماني والزمن مايطيعي
يبي صبر مثل صبر جندي الجيش
لو زان لك ماكل عاماً ربيعي
ينبيك عن صعوبته خافق الريش
طيراً على اكتاف الطريق السريعي
رغم الخطوره تجبره حبة العيش
القهوه اللي فارقه طعم وشكل
في راس ذايقها تداوي علنين
بسواتها على اي احد مايتكل
ودايم يراقبها بكل الحالتين
يبطي عليها لايمل ولايكل
ولو انه لحاله يفوح دلتين
فنجالها عنده اهم من الاكل
وبجوها كنه زعيم لدولتين
عشق الاماكن مثل عشق الغنادير
كم قلب يوم فراقهن راح موجوع
ورجلا" يحب ديار ويشوفها غير
وضلعه اذا يطرونها تقل منزوع
ماعاد له نيه لقطع المشاوير
ومكانه اللي يعشقه صار ممنوع