عندي رغبة في اني اروح اجيب كام كيلو تين واعمل مربى تين بيتي، هل أنا باحب مربي التين؟ هل أنا كنت بعمل ده في اي وقت سابق؟ هل صنع مربى تين مربوطة بأي ذكرى من بيتنا؟ الاجابة قطعا لا. بس ده العقل لما يبقى عايز يهرب من كل الحاجات اللي وراه هيقولك بقولك ما تيجي نعمل مربى تين
العيلة كفكرة فكرة رائعة لحد ما نسيب بعض او نموت او نكبر او كل واحد يروح في حتة ساعتها مبفهمش الحكمة من الفكرة الرائعة دي لو هتجيب كل الالم و الحزن والخوف ده
من سنين كتير لما الدنيا بتبهوأ اوي مني بسكت عشان الكلام لما بيطلع بنهار منه، بس أنا داخلة في سنة مش عارفة اتكلم الكلام العادي خالص مع حد او ابدأ حوار عادي من كتر البهوقة وحالة الهلع المستمر اللي عايشة فيها، بقالي اسبوع عايزة اكلم حد عامل عملية اقوله حمد الله على السلامة، مني لله
لقيتني مصورة صورة حلوة لكتاب نوارة نجم ده، كتاب عبارة عن قعدة المصاطب المحببة للقلب من غير اي تزويق ولا تجميل،مفيش اصنام هنا نعظم فيهم كله هيطلع مسرح، و تعالى بالمرة اما احكيلك كيف نشأت التروما من الاول خالص. حاجة شبه بلال فضل كده
مكنتش اعرف ان احنا ممكن نحتاج نعمل علاج طبيعي في التمانية والعشرين من العمر من غير ما يكون في إصابات ملاعب او شيء من هذا القبيل. حاسة اني فتحت ليڤل جديد في اللعبة(الحياة)