من الخاص
أنا متزوجة من سنة، ومن شهرين كان زواج أختي، وأمي كانت تبيني أروح أقعد أنام عندها قبل الزواج بيومين عشان أكون مع أختي وكذا. فقلت لزوجي بس ما رضى، لأنه كان مأخذ إجازة ثلاثة أيام من الدوام، وأنا برضه ما كنت أبي أروح، فقلت لأمي: "زوجي مو راضي".
بعدها بيوم كلمتني على الجوال وكنت فاتحة السبيكر، فأمي راحت قالت لي: "زوجك ابن الـ*** هذا مو راضي برضه يجيبك تنامين قبل الزواج؟" وزوجي كان جنبي وسمعها وهي تسبه بأمه! أنا شفت وجه زوجي تغير، فقفلت الجوال ساعتها.
وزوجي وقتها تضايق مرة وأخذ مني الجوال، ونبّش بالشات بيني وبين أمي، لقى فيه سب كثير عليه وعلى أمه من أمي (مو مني)، وقتها تضايق لآخر درجة واتصل على أبوي وقال له: "تعال عشان فيه مشكلة بيني وبين بنتك".
أبوي جاء هو وأمي، فزوجي قال لأبوي: "يرضيك زوجتك بنت الـ*** تسبني أنا وأمي بالشكل هذا؟" (سب أمي بأمها بنفس السبة اللي هي سبته فيها بالجوال). وقتها أمي تضايقت وراحت سبت زوجي وصار تشاتم، فأبوي راح دف زوجي وكان يبي يضربه، راح زوجي سبه.
أبوي قال لي: "اجمعي قشتك وأغراضك وأنا بطلقك منه وأسجنه بالـ(قائمة)"، زوجي وقتها قال لي: "لا تروحين معهم"، وأنا جمعت قشي وجيت بطلع، راح زوجي قال لي: "طالما وصلنا لكذا عطيني ذهبي"، وأبوي وقف بوجهه، راح زوجي ضرب أبوي وأخذ مني الشبكة، وهي أصلاً مو مكتوبة بالورق (القائمة)، وقال لي: "خلي أبوك يطلقك".
ومن وقتها وهو تاركني عند أهلي، وأبوي قال لي نرفع خلع، ما رضيت لأني ما أبي أتطلق، أنا كنت مبسوطة معه، وهو قبل الموقف هذا كان كويس مرة معي، ومهندس وملتزم يصلي الفرض بفرضه، وما كان حارمني من شيء وهو ولد ناس.
حاولت أكلم أمه وهي حرمة محترمة، قالت لي إنها ما راح تتدخل لأنه قال محد يتدخل في الموضوع هذا. أبوي كلم عمه وقال نفس الكلام. فأنا رحت له دوامه وحاولت أراضيه برضه ما فيه فايدة. رحت أخذت أغراضي ورجعت البيت، قال لي: "رغم إنك طلعتِ بدون رضاي بس ما أقدر أطردك، لو بتكملين في هالزواجة أجل ببيع الشقة لأمي وأنتِ تمضين شاهدة على العقد، وبتكتبين تنازل عن نفقة السكن عند محامي عشان لو صار حمل وأبوك وزّك على الطلاق أكون مأمن نفسي منكم! وأهلك ما راح تروحين لهم غير مرة كل شهر، ومكالمتين جوال في الشهر! والشبكة مالك فيها غير الدبلة عشان تتأدبين وما تتركين البيت ثانية"، ومصمّم على كذا!
فأنا ما رضيت وقلت له: "أبي أمشي خذني وصلني لأهلي". فقلت لأبوي، حلف ما يكلمني ثانية لو وافقت على كذا!
ولي أسبوعين على هالحال ومو عارفة وش أسوي.. أرجع لبيتي وزوجي وأصلح بيني وبينه مع الوقت وأهلي يقاطعوني؟ ولا أقعد وأسمع كلام أهلي وأرفع خلع وأطلق؟ وأنا بجد ما أبي أتطلق لأن عيشتي مع أهلي تقرف، وزوجي كان حنيّن علي وقبل الموقف هذا كان يعاملني كويس، وأنا بجد مو عارفة وش أسوي.. يا ليت أحد ينصحني بدون لوم وعتاب، وشكراً.
من الخاص ✉️
السلام عليكم، أنا كل ما تهاوش زوجي معي أو صارت مشكلة بيننا، قمت وآذيت نفسي عشان أحس براحة! يعني مثلاً أضرب رأسي في أي شيء، أو أشمخ (أخربش) نفسي، أو أقعد أخنق نفسي عشان أرتاح.
الأول كنت ممكن أكتم صوتي بالمخدة وأصارخ فيها عشان أهدا، الحين لا! حتى لما درى زوجي وشافني قبل كذا مرة، قال لي: "أنتِ ممسوسة (ملبوسة) ومهبولة!".
أنا مو عارفة هل هذا الشيء طبيعي؟ ولا وش اللي جالس يصير لي؟
مشكلة من الخاص
أنا موظفة، وأبوي طلب مني أخصص جزء من راتبي وأساعده فيه هو وأمي، وزوجي رافض هالشي تمامًا، وأنا محتارة وما أدري أسمع كلام مين فيهم. وش تنصحوني أسوي؟
واحد مصري يجي بتأشيرة زيارة، يشتغل براتب
٤ آلاف ريال، يقعد ٣ شهور ويرجع ديرته مصر وهو مطلّع ١٢ ألف ريال، يحولها مصري تطلع له حول ٢٠٠ ألف جنيه، ومتوسط الرواتب عندهم بالكثير ٧ آلاف جنيه.. وتأشيرة الزيارة أصلاً مبلغ رمزي!
من الخاص ✉️
أخوي توفّى وخلّف بنتين وورث قيمته 500 ألف، ومرته رافضة تعطيني نصيبي من الورث، وتقول لي: اتركيه وسوي فيه مشروع واصرفي على بنات أخوك!
طيب مو المفروض إن أخوانه لهم نصيبهم من الورث؟ وأنا أخته الوحيدة، ومن حقي آخذ نصيبي مثل باقي الورثة.
وش الحل معها الحين؟ وكيف أقدر آخذ حقي منها بدون ما تكبر السالفة بيننا؟
مشكلة من الخاص
زوجي مصرّ إنه يتزوج عليّ عشان إني ما أخلف، وقال لي: عندك أسبوع تقررين، يا تكملين معي يا نتطلق.
أنا يتيمة الأب والأم، وما أشتغل، وما عندي غير أخ واحد، وهو متزوج وساكن بعيد عني، ومرته صعبة بالتعامل مرّة.
أنا محتارة وما أدري وش أسوي، تنصحوني أصبر وأكمل معه، ويمكن ربي يرزقني بالحمل وأفرح بالذرية؟ ولا أطلب الطلاق وأتركه وأشوف كيف أدبّر حياتي بنفسي؟
والله إني خايفة من اللي جاي، وحاسة إني محطوطة بين خيارين كل واحد أصعب من الثاني. أبي نصيحتكم من القلب، وش تشوفون أسوي؟
من رسائل الخاص
السلام عليكم، محتاجة رايكم.
أنا عند أهلي بسبب مشاكل بيني وبين زوجي، وللأسف مشاكل كثيرة مو مشكلة وحدة. لكن أنا محتاجة أفهم شيء؛ هل من حق زوجي إنه يفتش جوالي؟ ويكون يبي يعرف أنا وأهلي وش نقول؟
هذا من ضمن الأشياء اللي تتعب نفسيتي، لأني أحس إن الموضوع يمس كرامتي، مع إني والله عمري ما كلمت أحد عليه، ولا أسوي شيء غلط، ولا أصلاً أطلع من البيت!
لكن أنا قلت له: "لو مو واثق فيني طلقني"، مع العلم يا جماعة هو عارف إني ما أسوي شيء غلط.
أنا كذا غلطانة ولا صح؟
من الخاص. 💌
السلام عليكم،
محتاجة نصيحتكم بجد، تقدم لي واحد، وهو ما شاء الله يصلي وملتزم وطيب مرّة، بس طيبته زايدة عن حدها شوي.
أول جلسة بيننا كان متوتر بشكل مو طبيعي، وما كان يعرف يتكلم كلمتين على بعض، وقعد فترة يقرأ بينه وبين نفسه من كثر التوتر، وكانت يده ترجف. بصراحة كنت بأرفضه بسبب هالشي، لكن أهلي قالوا لي يمكن لأنها أول مرة يقابلني، وإن الأفضل أعطيه فرصة وأقعد معه مرة ثانية.
وفعلًا صارت جلسة ثانية وكانت جلسة جماعية، أنا وأهلي وهو، وكان يتعامل بشكل طبيعي أكثر، بس لاحظت إنه يفرك يده طول الوقت.
المهم، قرينا الفاتحة، وكنا نتكلم بشكل عادي بعد ما قريناها، وفجأة عيونه دمعت ويده رجفت وتوتر مرّة ثانية. سألته وش فيك؟ قال لي: هذي دموع الفرحة.
أنا من وقتها دخل قلبي خوف وقلق، وللحين مو مرتاحة ومحتارة.
وفيه أشياء ثانية اكتشفتها، كان قايل لي إن أخوه متزوج، وطلع أخوه مطلق، وكان قايل إن عمره 30 سنة، وطلع أكبر من كذا. وكمان عرفت إنه انضحك عليه أكثر من مرة، ناس يجونه ويستعطفونه ويقولون له إنهم محتاجين فلوس وعندهم ظروف ومشاكل، ويعطيهم مبالغ كبيرة، وبعدين يكتشف إنهم نصابين وما يقدر يرجّع فلوسه.
والحين المفروض نروح نشتري الذهب، وأنا صراحة مو عارفة وش أسوي، ولا أدري إذا أكمل أو أوقف الموضوع من الحين.
هل توتره الزايد وطيبته بهالشكل شيء طبيعي لأنه خجول وما تعوّد على هالمواقف؟ ولا فيه أشياء المفروض أنتبه لها، خصوصًا إنه ما كان صريح معي بخصوص عمره ووضع أخوه؟
وش تنصحوني؟ أكمل وأعطيه فرصة، ولا أتراجع قبل ما نتقدم أكثر؟ الله يسعدكم أبي آراءكم بدون تجريح.