جلّ من يبعث الموتى من الأجداث
في نهارٍ يشيب الطفل من هوله
تنبعث له ذكور الخلق ، والإناث
كل إنسان يتحاسب على فعوله
الحليم الرحيم الرازق الغيّاث
مرسل الغيم همّاله ، وهملوله
يرتجي عفوه اللي بالحقل حرّاث
والثري يرتجيه ، وريس الدوله
لـ التيقّظ مثل ما لـ المنام .. اضغاث
والأوادم بليّا شغل مشغوله
سرعة العمر ، والايام ، والاحداث
مُرعبه جدًا ، وماهي بـ معقوله
كنّ فيها مُحرك طايره نفّاث
تسبق اللي يسابقها على رجوله
والعبث لوّ يكسّب مال لـ العبّاث
ما كسب مرجله ، ولا كسب طوله
والحسد لا تفشّى فالبنادم .. عاث
صار كائن حياته شبْه مشلوله
مير جعل النفوس اللي ماهي بـ خباث
بالرضى ، والبرد ، والنور مغسوله
وجعلي اليا تركت اترك من الميراث
سمعةٍ طيبه ، واعمال مقبوله
بسيطة لو توقف فرد وخطوب الليالي حلف
تواجهها بْ عزم، و تنتهي، وتعيش، وتلاقي
تردَّك عثرت الهياب: مادامك تعاين خلف
مسيرك قدم والرجم المنيف يتعب الراقي
- فارس السميري.
يوم اشوف اللي يهينون النفوس بـ كل ليلة
أحمد الله كل ما انزلت العباد …. بمنزلتها
ما معي لك حيل يا قلبي ولا لك معي حيلة
صبرك اهون من مشاريرٍ ما تحمد عاقبتها
لاانت ميت من هوان ولاانت ميت من فشيلة
ما لك الا موتةٍ وحدة .. متى ما جتك متها
- عبدالله السراهيد.
من عرفني يدري اني سيدة وباموت سيدة
ومستعد اغير اصحابي ولا اغير نظامي
ومن جهلني يمكن يعذرب مزاياي الحميدة
مثل حبي لـ اعتزال العالم وقلة كلامي
- علي ال صبيح.