ارشيف الغنيمى

هنا نزيح الغبار عن صفحات التاريخ المنسية . ونروي لكم ما خلف الكواليس من أسرار وحقائق غائبة لم تروَ من قبل.

[ارشيف الغنيمى @ghonemy_archive]

@iirode0 التعليم الاكاديمى وليس الادبى

[ارشيف الغنيمى @ghonemy_archive]

@NewsNow4USA بسم الله ماشاء الله
بالتوفيق ومبروك
ربنا يقدم الصالح للشعبين الاخوة وجميع العرب

[ارشيف الغنيمى @ghonemy_archive]

@BakryMP يقال ان ابنه قام بتكذيب الخبر
رحمه الله حيا وميتا بعد عمر طويل ان شاء الله

[ارشيف الغنيمى @ghonemy_archive]

نابليون بونابرت
#نابليون_بونابرت #حروب_نابليونية #الاحتلال_الفرنسي #الثورة_الفرنسية #napoleon_bonaparte

[ارشيف الغنيمى @ghonemy_archive]

خط الصعيد 👳🏻‍♂️:

حكاية محمد منصور واحدة من اشهر حكايات الاجرام والدم اللي لسه الناس بتحكيها لحد النهارده الراجل ده مكنش مجرد مجرم عادي لكنه اتحول لأسطورة مرعبة في فترة الاربعينيات .

اللى بقى كابوس بيمشي على الارض في كل قرى ونجوع الصعيد اسمه لوحده كان كفاية انه يسكت ويرعب اى راجل حتى لو كان ابن ليل محمد منصور اتولد في قرية درنكة التابعة لمحافظة اسيوط وكان شاب زيه زي اي شاب في الصعيد شغال في الزراعة وعايش حياة عادية جدا لحد ما حصلت مشكلة كبيرة وخناقة على حتة ارض وتار قديم بين عيلته وعيلة تانية في البلد ولان لغة الدم كانت هي اللي بتحكم في الوقت ده محمد منصور مسك سلاحه وقتل واحد من العيلة التانية عشان ياخد بتار عيلته ومن اللحظة دي حياته اتقلبت .

ساب بيته واهله وهرب على الجبل عشان يستخبى من البوليس ومن تار العيلة التانية في الجبل محمد منصور مابقاش مجرد هربان خايف على روحه بالعكس ده بدأ يجمع حواليه كل المطاريد والمجرمين والهاربين من العدالة وعمل عصابة مسلحة قوية جدا مجهزة باحدث الاسلحة العصابة دي بقت قوة ضاربة في الصعيد وبدأوا ينزلوا من الجبل يهاجموا القرى ويسرقوا المواشي وينهبوا المحاصيل والموضوع اتطور معاهم لخطف كبار الاعيان والاغنياء ويطلبوا مبالغ فدية خيالية عشان يرجعوهم لاهاليهم واللي كان بيرفض يدفع او بيحاول يبلغ البوليس كان مصيره الموت فورا .

نيجي بقى للسر ورا تسميته باسم خط الصعيد وازاي الاسم ده لزق فيه لحد ما مات الحكاية باختصار ان محمد منصور كان اسم جده سر الختمة لانه كان محفظ قراءن فى الكتاب ومن بداية شهرتة ابتدى يتقال عليه اختصارا الختمة ولتسهيل النطق بقت الخت ولا الكلمة دى مش ولا بد بقت الخط تحريفا للاسم الاصلى ومن ساعتها والاسم انتشر زي النار في الهشيم وبقى رمز للموت والخراب .

الحكومة المصرية في الوقت ده كانت في موقف صعب جدا لان الصحافة بدأت تكتب عن عجز البوليس في القبض على الخط والناس بقت عايشة في رعب مستمر وزير الداخلية وقتها ادى اوامر صارمة بضرورة تصفية محمد منصور وعصابته باي تمن البوليس عمل كماين وحملات تفتيش بالمئات بس الخط كان دايما بيهرب لانه كان عارف دروب الجبل ومغاراته اكتر من اي حد وعنده ناس في كل قرية بتنقل له اخبار البوليس اول باول .

لكن دوام الحال من المحال وفي سنة ١٩٤٧ البوليس جاله اخبارية دقيقة جدا عن مكان مستخبى فيه فى حتة معينة في الجبل القوات اتحركت بسرعة كبيرة وحاصرت المكان من كل حتة ومحمد منصور حس ان دي النهاية فرفض يسلم نفسه وبدأ يضرب نار بعنف شديد جدا وحصلت معركة بالرصاص استمرت وقت طويل لحد ما قدر البوليس ينهي الاسطورة دي برصاصة قضت على حياة محمد منصور ووقع الخط ميت جنب سلاحه عشان ترجع الحياة طبيعية في الصعيد والناس تتنفس زى الاول وتخلص من اكبر كابوس عاشوه في تاريخهم

#خط_الصعيد #محمد_منصور #مطاريد #ذئاب_الجبل

[ارشيف الغنيمى @ghonemy_archive]

@Darwishiat للاسف مصرى الفيديو قديم على الهوا واتقال انه ممثل او بيدرس تمثيل قى الصين وعامة اخلاقه زفت سواء مسرى او يمنى او اى بلد

[ارشيف الغنيمى @ghonemy_archive]

هراسة البطاطس :

لو حتدور على شكل #القنابل اليدوية الأكثر شهرة غير القنابل اليدوية حتلاقى بدون منازع القنبلة الألمانية شتيل القنبلة دي مكنتش مجرد سلاح عادي في ايد العساكر الالمان دي كانت العلامة المسجلة لجيش هتلر في الحرب العالمية الثانية واسمها الحقيقي #Stielhandgranate .

اللي العالم كله عرفها بلقب هراسة البطاطس عشان شكلها اللي شبه أداة المطبخ بالضبط القنبلة دي كان ليها فلسفة تانية خالص غير القنابل اللي بنشوفها في الأفلام #الامريكاني لان الالمان ركزوا على فكرة #القنبلة الهجومية يعني تعتمد على موجة #الانفجار والضغط مش على الشظايا اللي بتطير في كل حتة .

وده عشان #العسكري اللي بيرميها يقدر يهجم وراها علطول من غير ما يخاف ان شظية ترد فيه التصميم بتاعها كان عبارة عن أسطوانة صاج محشية بمادة تي ان تي شديدة الانفجار وراكبة على عصاية خشب طويلة والعصاية دي كان ليها وظيفتين اول حاجة انها بتخلي العسكري يرميها لمسافة بعيدة جدا مقارنة بالقنابل التانية لأنها بتعمل زي الرافعة وثاني حاجة ان العسكري يقدر يشيلها في الحزام بتاعه بسهولة ومن غير ما تقع منه .

طريقة تشغيلها كانت محتاجة قلب #ميت لان العسكري كان بيفك غطاء من تحت العصاية الخشب ويشد حبل جواه فتيل بيعمل احتكاك واول ما يشد الحبل بيبدأ العد التنازلي اللي بياخد حوالي اربع او خمس ثواني وبعدها تنفجر وعشان كدة كانت محتاجة سرعة ودقة في التنفيذ .

الالمان من ذكائهم عملوا منها كذا نوع زي النوع الدخاني اللي بيطلع دخان عشان يغطي على حركة الجنود والنوع ده كان عليه علامة مميزة عشان الجندي ميتلخبطش بينهم وهو في عز الضرب والليل وفي المواقف الصعبة لما كان بيواجهوا #دبابات او تحصينات قوية #الجنود كانوا بيعملوا حركة صايعة جدا بيجيبوا ست رؤوس من القنابل دي ويربطوهم حوالين قنبلة واحدة بالعصاية بتاعتها ويعملوا حزمة متفجرة قوية جدا تقدر تطير جنزير دبابة او تهد حيطة كاملة .

بس طبعا القنبلة دي مكنتش كاملة الاوصاف لان كان ليها عيوب زي ان الخشب بتاعها ممكن يبوظ من الرطوبة والثلج في روسيا والفتيل ساعات مبيشتغلش لو دخل فيه مية كمان حجمها كان كبير وبياخد مكان في لبس العسكري لكن في الاخر فضلت القنبلة دي هي الرمز اللي بيخوف اي حد يقابل الجيش #الألماني في خندق او بيت وعاشت في ذاكرة التاريخ كأهم قطعة في عدة الجندي الألماني في الحرب .
#الفيرماخت #الالمان #الحرب #العالمية #الثانية #باربروسا #برلين #جيش #هجوم #قنبلة #دفاع #دبابة #بانزر #روسيا #الكرملين #سوفييت

[ارشيف الغنيمى @ghonemy_archive]

@NewsNow4USA فادها بايه بقى دم اهلها اللى غرقت بيه ايديها

[ارشيف الغنيمى @ghonemy_archive]

ليليث زوجة ابليس ( اسرائليات ) .
#ليليث
#ابليس
#شيطان

[ارشيف الغنيمى @ghonemy_archive]

ما وراء الطبيعة :

تخيل كده راجل عجوز وحيد دايما لابس بدلة كحلي بتلمع من كتر الكوي وسجايره السوبر لوكس اللى بتتحرق ورا بعض عشان تحرق معاها قلبه وعمره .
الراجل ده هو دكتور رفعت اسماعيل دكتور امراض الدم الراجل ده مكنش مجرد شخصية حبر على ورق لكنه كان روح تانية ساكنة جوه الدكتور أحمد خالد توفيق وجوه كل واحد فينا .

رفعت اللى حب يهرب من عالمه العادي لعالم الأساطير والماورائيات اللي مش بتخلص رفعت اللي كسر كل قواعد البطل في الروايات العربية لا هو مفتول العضلات ولا وسيم ولا محظوظ بالعكس ده كان نحس ماشي على رجلين قوانين ميرفي كانت بتجري وراه زي ضله ومع ذلك قدر يعلمنا إن البطولة مش إنك متخافش لكن البطولة إنك تواجه وانت ركبك بتخبط في بعض وقلبك هيقف من الرعب .

رحلته بدأت من مجرد دكتور أمراض دم بيحب الشطرنج والهدوء لواحد بيطارده لعنة الفراعنة ومصاصين الدماء والمستذئبين وكل كوابيس الطفولة اللي بتستخبى تحت السرير رفعت كان المراية اللي شافت بيها أجيال كاملة نفسهم شافت فيه الضعف البشري العادي والقدرة الخارقة على السخرية من الموت ومن الحياة ومن الذات .

فلسفة رفعت كانت بسيطة وعميقة في نفس الوقت وهي إن مفيش حاجة اسمها صدفة وإن كل باب مقفول وراه حكاية وإن العقل هو سلاحنا الوحيد قدام المجهول حتى لو العقل ده ساعات بيخون .

اما لو حنتكلم عن حب عمره ماجى ماكيلوب قصتهم كانت الخيط الرومانسي الرفيع اللي بيدي طعم للألم قصة حب مستحيلة وعابرة للقارات والزمن بتأكد إن الحب الحقيقي بيفضل عايش حتى لو مفيش لقاء .

ودوره في القصص مكنش بس دور الراوي لكنه كان الشاهد والشهيد الشاهد على غرابة الكون والشهيد اللي دفع تمن معرفته من صحته وأعصابه وعمره اللي ضاع في مطاردة أشباح يمكن تكون حقيقية ويمكن تكون انعكاس لمخاوفنا الداخلية .

ومع كل عدد من السلسلة كنا بنكبر ورفعت بيكبر معانا وأمراضه بتزيد ووحدته بتتعمق لحد ما جت النهاية المحتومة نهاية رفعت إسماعيل اللي كانت بروفة حزينة لنهاية العراب نفسه .

موت رفعت في الروايات كان صدمة بس كان منطقي لراجل عاش طول عمره يتنفس دخان وذكريات وكأن الدكتور أحمد خالد توفيق كان بيمهد لرحيله هو شخصيا وكأنه بيقولنا إن الحكاية لازم تخلص عشان تبقى أسطورة .

موت رفعت كان موت لجزء من طفولتنا وشبابنا لكن الصدمة الحقيقية كانت لما اللحم والدم اللي ورا الشخصية رحل لما العراب ساب القلم ومشي وسابنا يتامى في عالم مليان مسوخ ملهاش كتالوج .

رحيل أحمد خالد توفيق كان السطر الأخير الحقيقي في ملحمة ما وراء الطبيعة لأن رفعت كان هو وأحمد وجهين لعملة واحدة عملة الندرة والصدق والإبداع اللي بيحترم عقل القارئ رفعت مات وأحمد مات بس فضل صوت رفعت الأجش يرن في وداننا بجمله الخالدة وفلسفته الساخرة وفضلنا ندور في الضلمة على نور وفضلنا مؤمنين إن حتى لو النجوم انطفت الحكايات بتفضل منورة وإن الموت مش نهاية الرحلة ده مجرد بداية لأسطورة جديدة بنعيشها كل ما نفتح صفحة قديمة ونشم ريحة الورق ونسمع صوت الكحة المميزة لعجوزنا اللي عمرنا ما هننساه .

#ماوراء_الطبيعة #العراب #احمد_خالد_توفيق #رفعت_اسماعيل #ماجى #حتى_تنطفى_النجوم

[ارشيف الغنيمى @ghonemy_archive]

@NewsNow4USA يمكن معسكر جمباز او تنس طاولة 😈

[ارشيف الغنيمى @ghonemy_archive]

نبيل فاروق (رجل المستحيل😎):

لو حبيت تدخل رحلة داخل المكتبات وتدور عن المعنى والخيال وسط سطور الورق الأصفر القديم وقصص الجيب كان لازم يظهر دكتور نبيل فاروق عشان يكون هو الساحر اللي قرر يستبدل مشرط الجراح بقلم الأديب عشان يشرح خيال جيل كامل كان متعطش لرمز وبطل يشبهه ويقدر يرفع راسه بيه وسط الأمم .

حكاياته مش مجرد روايات جيب بتتسلى بيها في المواصلات لا دي كانت بوابات لعوالم تانية بتسرقنا من دوشة الواقع لسكينة الحلم وعشان كده دكتور نبيل مكانش مجرد كاتب ده كان صانع ذاكرة جيل الثمانينات والتسعينات وانا اتشرفت انى اكون واحد منهم كبرنا واحنا مخبيين رواياته وسط الكتب المدرسية عشان نسرق لحظة متعة مع أدهم صبري رجل المستحيل .

ادهم اللي اتولد على إيد الدكتور نبيل كفكرة مجنونة بتتحدى المنطق بطل مصري بمواصفات عالمية ملوش بصمة صوت ولا بصمة إيد وكأنه طيف بيعدي يخطف الحق ويرجع يختفي في الضلمة ومن البداية خالص لما اتعرفنا على أدهم لأول مرة حسينا إننا لقينا ضالتنا فى الشخص ده اللي بيجمع بين القوة البدنية الخارقة والذكاء الحاد اللي بيسبق الكمبيوتر وبين الرقي والأخلاق والوطنية اللي مابتقبلش المساومة .

عشنا معاه سنين طويلة نلف العالم من غير تأشيرة ونحارب منظمات وكيانات واجهزة مخابرات واتعلمنا من الحب والعاطفة من حكايته مع منى توفيق وكأن الدكتور نبيل كان قاصد يقولنا إن الحياة مش أبيض وإسود بس وإن الخير والشر ممكن يتواجدوا في نفس الدايرة والصراع ده فضل مكمل معانا عدد ورا عدد وسنة ورا سنة وكنا بنكبر وأدهم لسه شاب قوي مبيكبرش لحد ما وصلنا للمحطات الأخيرة .

المحطة اللي وجعت القلب لما حسينا إن الرحلة قربت تنتهي وإن بطلنا اللي ظنينا إنه مبيقعش ممكن يغيب عن المشهد وسواء كانت النهايات مفتوحة في بعض الأوقات أو حاسمة في أوقات تانية فكان الوداع قاسي زي فراق صاحب عزيز كنت بتشوفه كل شهر وفي نفس الوقت كان الدكتور نبيل بياخدنا لرحلات تانية في ملف المستقبل ونور الدين محمود عشان يسبق عصره ويتخيل تكنولوجيا وحروب فضائية شوفناها بتتحقق النهاردة بعيوننا وكأنه كان بيقرأ الغيب من وراء حجاب الزمن .

فلسفة الاستاذ كانت بسيطة بس عميقة وهي إن المستحيل مجرد كلمة في قاموس الضعفاء وإن الإرادة المصرية والعربية قادرة تصنع المعجزات لو آمنت بنفسها رحل الدكتور نبيل فى ٢٠٢٠ وساب دنيتنا بس ساب وراه أثر مبيتمحيش وكلمات محفورة في وجدان ملايين ومكتبة ضخمة بتشهد إن كان فيه هنا دكتور قرر يعالج أرواحنا بالأمل ويزرع فينا اليقين إننا نقدر نكون أبطال حكايتنا الخاصة حتى لو مكنش عندنا مهارات أدهم صبري بس كفاية إننا اتعلمنا منه إن الاستسلام هو الموت الحقيقي وإن النضال لأجل الحق هو سر الخلود.

#نبيل_فاروق #الاستاذ #رجل_المستحيل #ادهم_صبرى
#ملفات_المستقبل #العميل_١٠٠١ #فارس_الاندلس #حرب_الجواسيس #سيف_العدالة #زووم #مخابرات #صراعات #عدالة #كاتب_مصرى #معلم_اجيال #ساحر_الخيال #اديب_القلوب .

لو عجبتك القصة وكنت زى من عشاق المحترم د.نبيل فاروق اتمنى تدعمنى بلايك وشير للبوست .

ارشيف الغنيمى

[ارشيف الغنيمى @ghonemy_archive]

@alshrqalawst21 @NewsNow4USA ربنا يحفظ بلادنا العربية من شر امثالهم

[ارشيف الغنيمى @ghonemy_archive]

@inpic0 هيا ناقصة غجر كمان

[ارشيف الغنيمى @ghonemy_archive]

شركة النصر للسيارات :

اننا نفتح مصنع لتصنيع السيارات فى مصر فى الستينات كانت حلم لكن بالارادة والتصميم الحلم اتحقق وخلى الحديد عجينة في إيد إرادة سمراء قررت إنها مش بس تزرع القطن دي كمان هتصنع الترس والموتور فكانت شركة النصر للسيارات هي البنت البكرية لثورة التصنيع في الستينات لما قررنا إننا مش أقل من الخواجة وإن الشارع المصري محتاج عربية تفهمه وتستحمله وتكون حتة منه .

فطلع المارد من قمقمه في وادي حوف عشان يعلن ميلاد عصر جديد فيه العامل المصري بيلبس العفريتة الزرقا وبيمسح عرقه بابتسامة فخر وهو شايف أول عربية نصر 1100 و 1300 خارجة من خط الإنتاج ومن هنا بدأت الحكاية اللي سكنت كل بيت مصري لأن النصر مكنتش مجرد شركة دي كانت مشروع قومي بيجري في عروق الناس زي النيل وعشان كده لما ظهرت الـ 128 والـ 127 مكنوش مجرد أرقام لموديلات دول كانوا أفراد من العيلة المصرية الأصيلة .

العربية اللي شالت الموظف الغلبان ووصلت العيال للمدارس واستحملت مطبات الشوارع وحرارة الصيف وزحمة وسط البلد من غير ما تشتكي ولا تقول أي كانت العربية دي هي الونس في السفرية والشريك في الرزق لما اشتغلت تاكسي بلونها الأسود والأبيض المميز فكانت الشاهين بعد كده هي الرمز للصمود والعافية اللي بتناطح الزمن .

وكبر الحلم وكبرت معاه المسؤولية لكن دوام الحال من المحال وزي ما الدنيا لها وش حلو لها وش تاني قاسي فمع تغير الزمن وانفتاح الأبواب على مصراعيها دخل المستورد والحديث والمكيف والملون عشان يزاحم بنت البلد اللي فضلت متمسكة بقديمها وأصلها لكن السوق مبيعرفش العواطف والمنافسة مبتخافش على الذكريات .

فبدأت التروس تصدي والديون تتراكم والأنفاس تتقل وكأن المصنع العجوز بيلهث ورا زمن بيجري بسرعة الصاروخ وهو لسه ماشي بخطوة الواثق بس ببطء وبدأت حكاية الوجع لما الخسارة بقت هي العنوان الرئيسي والعمال اللي كانوا شعلة نشاط بقوا خايفين من بكرة والماكينات اللي كانت بتغني لحن الإنتاج سكتت وصوت الصمت بقى أعلى من صوت الموتور لحد ما جت لحظة الفراق الصعبة سنة 2009 بالتصفية .

عشان تتقفل صفحة من أهم صفحات تاريخنا الصناعي وينطفي الفرن اللي كان مدفي بيوت كتير وتتحول العنابر اللي كانت بتضج بالحياة لمجرد أطلال بتسكنها الأشباح والذكريات .

لكن الغريب إن رغم الموت الإكلينيكي للشركة فضلت الروح موجودة في الشارع وفضلت عربيات النصر تمشي وتعافر وكأنها بترفض تصدق إن اللي صنعها مات وفضلت الـ 128 ماشية تعاند قوانين الفيزياء والميكانيكا عشان تثبت إن اللي اتعمل بقلب وحب مبيتمسحش بجرة قلم ومهما حاولوا يحيوا المشروع تاني دلوقتي ومهما كانت المحاولات عشان يرجع النبض في العروق هتفضل القصة الأولى هي الأصدق والأجمل قصة حلم بدأ بعزيمة وانتهى بوجع بس ساب وراه أثر محفور في ذاكرة الأسفلت والقلوب بيحكي عن زمن كنا فيه بنصنع حاجتنا بإيدنا وبنركب عربية شبهنا وشبه ملامحنا وشبه تراب أرضنا الطيبة.

لو عجبتك الحكاية أتمنى تدعمنى بلايك وشير للبوست .

#شركة #النصر #للسيارات #تصنيع #مصرى #خط #انتاج #فيات #ثورة #انفتاح #ميكانيكا #ناصر #السادات #مبارك #خصخصة #بيع #فيات_128 #فيات_127 #شاهين #قردة

[ارشيف الغنيمى @ghonemy_archive]

@NewsNow4USA Heat part 2

[ارشيف الغنيمى @ghonemy_archive]

مدفع ابو جاموس :

المدفع ده واحد من اشهر القصص اللي ارتبطت بحرب الاستنزاف وحرب اكتوبر واهل السويس بالذات حافظينه صم المدفع ده بقى كان عبارة عن مدفع هاوتزر فرنساوي عيار 155 ملم واس.را.ئيل حطته في نقطة حصينة جدا اسمها نقطة عيون موسى في سيناء قصاد مدينة السويس وبورتوفيق بالظبط والمكان ده كان متختار بعناية شديدة عشان يكشف المدينة كلها ويقدر يضرب عليها نار براحته والمدفع ده مكانش مجرد سلاح عادي ده كان كابوس بيطارد المدنيين ليل نهار .

سبب تسمية المدفع ده بابو جاموس بيرجع للمصريين نفسهم اللي اطلقوا عليه الاسم ده بسبب صوته المرعب والغريب لان القذيفة بتاعته وهيا طالعة كانت بتعمل صوت جعير عالي جدا وشبه جعير الجاموسة وعشان كدة الاسم لزق فيه وبقى معروف بيه بين العساكر والمدنيين والاس.را.ئليين كانوا مخبيين المدفع ده بطريقة خبيثة جدا جوه دشمة خرسانية مسلحة تحت الارض ومكنش بيثبت في مكان واحد لا ده كان بيتحرك فى نقطتين اولا يخرج من المخبأ يضرب القذائف بتاعته على بيوت السويس وثانيا بعدها يرجع يستخبى تاني جوا الدشمة بسرعة عشان المدفعية المصرية متقدرش ترصده وتدمره وده خلى تدميره عملية صعبة جدا ومعقدة .

فضل المدفع ده يضرب في السويس فترك طويلة وقت حرب الاستنزاف وسبب دمار وخراب كبير وكان واحد من ادوات الحرب النفسية اللي اس.را.ئيل بتستخدمها عشان تكسر ارادة المصريين واهل القناة خاصة بس طبعا ده محصلش بالعكس زاد اصرارهم على المقاومة لحد ما جت لحظة الحسم في حرب اكتوبر ١٩٧٣ .

الجيش المصري كان حاطط نقطة عيون موسى والمدفع ده هدف اساسي لازم يتم السيطرة عليه وفعلا قواتنا عبرت القناة وقدرت تهاجم النقطة الحصينة دي بشجاعة منقطعة النظير ورغم التحصينات الرهيبة والالغام العدو مقدروش يصمدوا قدام الهجوم المصري .

نهاية مدفع ابو جاموس كانت نهاية مذلة للعدو لان الجيش المصري مسيطرش على الموقع وبس لا ده استولى على المدفع نفسه سليم من غير ما يتدمر ولما دخلوا الموقع اكتشفوا التجهيزات الهندسية المعقدة اللي كانت معمولة عشانه وازاي كان بيتحرك ودلوقتي المدفع ده لسه موجود في مكانه في نقطة عيون موسى بس مبقاش اداة قتل ودمار اتحول لمزار سياحي وشاهد تاريخي الناس بتروح تتصور جنبه وتشوف بعينها ازاي الجيش المصري قدر يقهر الاسطورة دي ويحول فخر الصناعة العسكرية الغربية والتحصينات للعدو لقطعة خردة وذكرى للنصر بتفكر الاجيال الجديدة ببطولات اهليهم مدنين وعسكريين وازاي قدروا يحموا ارضهم وعرضهم من اي معتدي مهما كانت قوته او جبروته .

#مدفع #ابو_جاموس #السويس #سيناء #عيون #موسى #عدوان #هوارتز #قذائف #مدفعية #بور_فؤاد #نقطة #حصينة #خط #برليف #هجوم #عبور #دفاع #استرداد #مزار #سياحى

[ارشيف الغنيمى @ghonemy_archive]

الواحات المصرية :

طبعا لو قولتلك تعرف يعنى ايه واحة حتقولى واحة عمر او مطعم الواحة حقولك ماشى ياسيدى بس هيا الواحة دى متاخدة منين فى مصر الطريقة والاكل والجلسة ؟

- الاجابة حتكون عن الواحات المصرية ولو حوصفلك
الواحات المصرية .
حقولك هى جنة الله في الصحرا الغربية وهي عبارة عن منخفضات خضراء وسط الرمالة وتعتبر كنز استراتيجي لمصر بفضل المياه الجوفية والزراعة والآثار وتضم خمس واحات رئيسية هي سيوة والبحرية والفرافرة والداخلة والخارجة وتتميز كل واحدة منهم بطابع خاص وتاريخ مختلف وتتبع محافظة مختلفة زى الوادي الجديد والجيزة ومطروح وححاول اكتبلك نبذة مختصرة عن كل واحة .

واحة سيوة :

واحة سيوة تبع محافظة مطروح وهي الأبعد والأكثر تميزا بين الواحات وتقع في قلب الصحراء قرب حدود ليبيا وعدد سكانها حوالي ٣٥ ألف نسمة وأهم مواردها السياحة العلاجية والتمور والزيتون وتشتهر ببحيرات الملح وعيون المياه الطبيعية وقلعة شالي ومعبد آمون وبدايتها ضاربة في عمق التاريخ القديم وتختلف عن باقي الواحات في العادات والتقاليد واللبس وشكل البيوت المصنوعة من الكرشيف وهو الطين المخلوط بالملح .

الواحات البحرية :

الواحات البحرية تبع محافظة الجيزة وهي أقرب واحة للقاهرة بمسافة حوالي ٣٦٠ كيلو متر ومركزها مدينة الباويطي وعدد سكانها حوالى ٤٠ ألف نسمة وتشتهر بوجود مناجم الحديد وده أهم مواردها مع كمان زراعة النخيل والمشمش وتعتبر بداية الطريق للصحراء السوداء وتمتلك عيون مياه كبريتية سخنة وبدايتها برضه قديمة جدا وفيها آثار فرعونية ورومانية منها وادي الموميات الذهبية وتتميز بأنها واحة وسط تلال وجبال سوداء بتديها شكل مميز ومختلف عن باقي الواحات المنبسطة

واحة الفرافرة :

واحة الفرافرة تبع محافظة الوادي الجديد وتعتبر أصغر الواحات من حيث عدد السكان اللي ممكن يكون حوالي ١٠ آلاف نسمة أو أقل وهي الأكثر عزلة وهدوء وموردها الأساسي الزراعة والسياحة لقربها من الصحراء البيضاء اللي فيها صخور طباشيرية تحففففة ونشأتها مرتبطة بالقبائل اللي استقرت فيها حول عيون المياه وتتميز بالبساطة الشديدة في المعيشة والبيوت الطينية التقليدية وهي حلقة وصل بين الواحات البحرية والداخلة وتعتبر مكان مثالي بامتياز للهدوء بعيدا عن دوشة التكنولوجيا والمدن .

واحة الداخلة :

واحة الداخلة برضه تبع محافظة الوادي الجديد ومركزها مدينة موط وهي من أغنى الواحات بالمياه والزراعة وعدد سكانها يعدي ٨٠ ألف نسمة وتتميز بوجود قرية القصر الإسلامية اللي لسه محتفظة ببيوتها الأثرية ونشأتها كالعادة بترجع لعصور ما قبل التاريخ وفيها آثار فرعونية وإسلامية ومواردها الأساسية هي زراعة القمح والفاكهة وتجفيف البلح وفيها حركة تجار نشيطة ومختلفة عن غيرها بجمال طبيعتها وتنوع الآثار فيها بين الفرعوني والروماني والإسلامي بشكل واضح جدا وملموس لكل زوارها .

واحة الخارجة :

واحة الخارجة هي عاصمة محافظة الوادي الجديد نفسها بقا واكتر الواحات تطورا ومدنية وفيها كل الخدمات الحكومية والجامعات ومطار كمان وعدد سكانها يوصل ٩٠ ألف نسمة أو أكثر وبتضم آثار مهمة جدا زى معبد هيبس ومقابر البجوات القبطية وكانت طريق قوافل تجارية اما عن الموارد فبتعتمد على الخدمات والزراعة واستخراج الفوسفات وتتميز عن باقي الواحات بإنها مدينة متكاملة فيها شوارع واسعة ومباني حديثة وحياة عصرية بجانب المناطق الأثرية والزراعية القديمة الموجودة في أطرافها .

في النهاية الواحات الخمس دي بتشكل خط الدفاع الأول لمصر في الغرب ومستقبل التنمية العمرانية والزراعية ورغم اختلافهم في العادات والتبعية الإدارية إلا إنهم بيشتركوا في طيبة وكرم أهلهم واعتمادهم على المياه الجوفية والنخيل وهم بيمثلوا فرصة ذهبية للخروج من الوادي الضيق لرحابة الصحراء واستغلال مواردها في السياحة والزراعة والتعدين .

#الواحات #سيوة #الفرافرة #الداخلة #الخارجة #البحرية #تراث #اقاليم #تاريخ #بدو #صحراء #نخيل #جمال #مصر .
لو المعلومة عجبتك اتمنى تدعمنى بلايك وشير