Top Tweets for #AdryGraphy

من كل مسببات الاحباط في المشهد الفني والثقافي في مصر، في ظاهرة تدعوا للتفاؤل بشدة، وهي الأغاني المصورة للموسيقى البديلة في مصر. في جيل مخرجين بيعملوا أغاني مصورة بتبهرني بصورتها وأفكارها، الأسبوع ده بس، أسبوع واحد، في تصوير أغنية (أجرة) أغنية (باشا) وآخرهم (نزلة السمان). ولإن تصوير الفيديوهات ديه سهل نسبيا، ومش بتعدي على الرقابة الصارمة، ومش محتاجة تصاريح تلففك حوالين نفسك، وبيتصرف عليها ذاتيا مش مذلولة لديناصورات عواجيز علشان يلاقوا فلوس لإنتاجها، عندهم مساحة حرية وإبداع أكبر وعلشان كده بيوصلوا للشباب أسرع. لكن الملفت هو ذوقهم وأصالتهم ومجاراتهم للمستوى العالمي بالرغم من ميزانيتهم وامكاناتهم محدودة جدا، وحتى لو في بعض الأحيان بيبان تأثرهم بشكلٍ مباشر ببعض الفيديوهات برة تسامحهم وتقدر مجهودهم. أتمنى الجيل ده يطلع كتاب سينما ومخرجين سينما، يعرفوا يحكوا بنفس الشطارة اللي عندهم في إنهم يطلعوا صورة حلوة ومختلفة، لإن لو ده حصل في أمل في جيل يوصل السينما المصرية لأماكن جديدة عالميا، وأتمنى مايفقدوش روحهم وصوتهم لمًا يتقابلوا بكل المعوقات المعروفة. بحيي الجيل ده ولازم ندعمهم ولازم ننحني ليهم لجساراتهم ومعافرتهم وطاقتهم اللي بتلهمنا.