Top Tweets for #Woki

ማእከል - ኣብ ወኪ፡ መበል 50 ዓመት ዝኽሪ ግፍዕታት ጸላኢ ተዘኪሩ መበል 50 ዓመት ዝኽሪ ግፍዕታት መግዛእታዊ ስርዓት ኢትዮጵያ ኣብ ወኪ፡ ብ13 መጋቢት ተዘኪሩ። ኣብ’ቲ ዕለት፡ ግዳያት ካብ ዝተቐትሉሉ ክሳብ ኣስከሬኖም ዓሪፉሉ ዘሎ ቦታ ሰልፊ ህዝብን ተመሃሮን ክካየድ ከሎ፡ ኣብ ሚኒስትሪ ዞባዊ ምምሕዳር - ዋና ዳይረክተር ክፍሊ ማሕበራዊ ኣገልግሎት ገዲም ተጋዳሊት ሰማይነሽ ኪሮስ፡ ንዝኽሪ ሰማእታት ኣኽሊል ዕንባባ ኣንቢራ። ሰራዊት ስርዓት ደርግ ብ13 መጋቢት 1975 ኣብ ልዕሊ ነበርቲ ወኪ ብዘካየዶ ኣረሜናዊ ግፍዒ፡ 9 ደቂኣንስትዮ ዝርከብኦም 34 ንጹሃን ዜጋታት ብኣልማማ ብምቕታል 195 ኣባይቲ ከምዘቃጸለ፡ ሰነዳት ታሪኽ የነጽሩ። ኣብ’ቲ ናይ ዝኽሪ መደብ፡ ኣመሓዳሪ ምምሕዳር ከባቢ ወኪ ኣቶ ጊላሚካኤል ተኽለማርያም ኣብ ዘስመዖ ቃል፡ ጸላኢ ካብ 1975 ክሳብ 1991 ኣብ ወኪ ብዘካየዶ ግፍዒታት ብጠቕላላ 61 ንጹሃን ዜጋታት ከምእተቐትሉ፣ 23 ድማ ከምዝሰንከሉ ኣብሪሁ። ገዛእቲ ስርዓታት ኢትዮጵያ፡ ኣብ ልዕሊ ንጹሃት ኤርትራውያን ታሪኽ ይቕረ ዘይብሎ ግፍዕታት ከምዝፈጸሙ ዝገለጸ ኣመሓዳሪ ንኡስ ዞባ ሰረጀቓ ኣቶ ክፍለማርያም ገብረመስቀል፡ እቲ ናይ ዝኽሪ መደብ፡ ንምሕዛንን ንምስቁርቋርን ዘይኰነ፡ እቲ ብጸላእቲ ዝተፈጸመ ንኸይርሳዕን መንእሰያት ብግቡእ ንኽፈልጥዎን ዝዓለመ ምዃኑ ኣረዲኡ።