سيف الشعر

البعض من أشعاري ..

[سيف الشعر @i27znn]

يا صاحبي كانك معي أنا معاك
ذاك الوفي اللي عرفته من سنين

ولا غلاك إن كنت ما تعرف غلاك
ما يجحد الشكّاك لا شاف اليقين

ولا تشكّك في ولاي وفي ولاك
في وقتنا هذا ترى الخافي يبين

قلبي عبر صدري تعدّاني وجاك
ويومه وصل بابك رفضتي تفتحين

الله على جرحك ويا مكبّر خطاك
بس الوكاد مسامحك دنيا ودين

#سيف_الشعر ✍🏻
#شعر

[سيف الشعر @i27znn]

يا وجودي صدق لا قالت حبيبي
كن قلبي عقب شوفه جاه شدّه

أشهد إنّه يا عرب هذا طبيبي
واحدٍ لامن طلب ماني بردّه

لا جرحني قلت خِيره، ذا نصيبي
ولا وفالي قلت هاذي منه مدّه

دام حبّه في حشاي ومرتوي بي
يِامر بقلبي على كيفه وودّه

والليالي لو تجيب اللي تجيبي
عدّ لي يا صاحبي مليون عدّه

#سيف_الشعر ✍🏻
#شعر

[سيف الشعر @i27znn]

يا صاحبي عقب البطا ويش داعيك
كان الغلا والشوق ماهو محلّه

صديت عني يوم أنا كنت شاريك
يومي عشانك ساهر الليل كلّه

صوتي تقطّع بالهوى يوم أناديك
وقلب الشجاع اليوم صعبٍ تذلّه

وبصدّ صدّت واحدٍ ما يدانيك
وخَلّك لو تشوفه يبي الموت خلّه

#سيف_الشعر ✍🏻
#شعر

[سيف الشعر @i27znn]

يا صادق شعوري ويا جرحي الأخير
يا صاحبي ما عاد في الدنيا سَعَه

واللي حصل لو كان ما ودي يصير
ودرب المفارق كلنا نمشي معه

وأنا أشهد إن الحزن ما عنده ضمير
يسطى على قلب الشجاع ويوجعه

لا تقترب لا ترتجي، حاول تصير
واحد يموت ولا يبلّل مدمعه

#سيف_الشعر ✍🏻
#شعر

[سيف الشعر @i27znn]

يا مرحبا في ضيقة الصدر واهلين
ولا أنت يا صدري عسى الله يجيرك

على الجروح وضيقة الصدر والبين
تعرف مصيرك بس تنكر مصيرك

حل الفراق وزوّد الجرح جرحين
واللي عشيرك صار ماهو عشيرك

أنا على وضح النقا والزمن شين
هذي دموعي كان ترضي ضميرك

جيتك على ساعة وداع المحبين
ما جيت أداعب خاطرك وأستشيرك

#سيف_الشعر ✍🏻
#شعر

[سيف الشعر @i27znn]

الله عطى والله يعطي عباده
الله كريم وما تخيب الهقاوي

راضي مدام العبد ما له إرادة
راضي مدام الأمر جانا سماوي

رجلي غدت لك يا مهاوي وسادة
قبل الدموع وقبل بيح الشكاوي

واللي دبل جرحي وزاده زيادة
متي وأنا واقف وعاجز أداوي

كانت عيونك لي مصدر سعادة
واليوم عينك غمضت يا مهاوي

#سيف_الشعر ✍🏻
#شعر

[سيف الشعر @i27znn]

الشعور اللي في صدري ما يوصفه الكلام
وش يفيد الورد سقيه ليا منه ذبل

قد عطيتك من محبة ولا شفت اهتمام
المحبة تجعل الرجال بالواقع خبل

ما أبي منك وعود ولا أبي منك سلام
وللمواصل لا تبقي لا دروب ولا سبل

واترك القلب الشجاع اللي تغشاه الظلام
قلبي منهو صد عنه ياخذ الصدّة دبل

#سيف_الشعر ✍🏻
#شعر

[سيف الشعر @i27znn]

يا مرحبا واهلين صبحت بالخير
يا واحداً غايب وأظنه نساني

تطول في درب الهموم المشاوير
وتقصر خطاوينا على كل داني

واللي تبيه يصير ما ظني يصير
حتى ولو إني على الدرب عاني

نفوسنا تبغى حشيمة وتقدير
والله تعالى عنك يمكن كفاني

من يوم ما شفتك وأنا فاقد الخير
ياليت ربي قبل أشوفك عماني

#سيف_الشعر ✍🏻
#شعر

[سيف الشعر @i27znn]

صديت والأعذار ماهي تكفيني
لو كان عذرك صحيح لا تعيدينه

لا صرت ضايق أبي منك تخليني
خلّي حبيبك لو إنك تحبينه

لا ترفع الصوت صوبي لا تناديني
حتى لو إنه عرفك ما تعرفينه

قد راح عمري معاك ولا تواسيني
لا ضاع عمري معاك وما تردينه

#سيف_الشعر ✍🏻
#شعر

[سيف الشعر @i27znn]

نامت عيون الناس وأنا أتأمل
في صورتك ما غيبت عن عيوني

ولا الصبر اي والله الصبر كمل
صوتي تقطع بس ما تسمعوني

عقلي يقول لقلبي أوقف تحمّل
وقلبي يقول الظاهر إنهم نسوني

عيت ظروف الوقت فيني تجمّل
وعطيتهم كل الوفا ما عطوني

#سيف_الشعر ✍🏻
#شعر

[سيف الشعر @i27znn]

من الفجر حتى يجي وقت الإشراق
أسري ولا أبي غير وصلك وقربك

وليا نشدت أشتاق؟ إي والله أشتاق
إنو الفراق ولا تشكك ……..بحبك

أفتش بصدري بس أبي منك ميثاق
اللي تشوفه بين قلبي ……..وقلبك

وإذا زعلت وخاطرك مننا ….ضاق
حاول تذكر قلبي اللي ……..يحبك

#سيف_الشعر ✍🏻
#شعر

[سيف الشعر @i27znn]

ليه رحت وليه تفتح لي نوافذ للكآبة
تدّعي حبي وتطعن خافقي وتزيد حره

قلبك اللي كان مصدر للأمان وللرحابة
تحسبني شفت خيره والله إلا شفت شره

ما أبي منك تعود بس أبي منك إجابة
لسؤال اللي سألته قبل أحبك ألف مرة

#سيف_الشعر ✍🏻
#شعر

[سيف الشعر @i27znn]

ما ينفع المغبون كثر التصاريح
لا راح صوته صدق محدٍ درى به

أثر البلا ماهو بيوم إنك تطيح
يمكن توقف بس جتك الكآبة

اللي تخلي الرجل يِون ويصيح
ويقطع مواصيل الأهل والقرابة

أحيان في الدنيا ما تحتاج توضيح
ما كل ما تسأل بتلقى…… إجابة

خلك مثل طبعي ليا ضقت ما أبيح
أسكت وأعدّ الصمت حكمة ومهابة

#سيف_الشعر ✍🏻
#شعر

[سيف الشعر @i27znn]

ياليل حاول لا تعجّل طواريك
خل الحزن بالقلب زابن وخافي

ياما تجرّعت المراره من يديك
وإنت تمشّيني على الشوك حافي

ماني بقايل عود الله يخليك
حتى ولو حزني تعدّى الفيافي

بصدّ عنك واتقهوى واخليك
وأرمي معاناتك وحزني خلافي

#سيف_الشعر ✍🏻
#شعر

[سيف الشعر @i27znn]

انتهى ليل المفارق بين دمعي وحنيني
واشرقت شمس الصباح لا جديد ولا رسالة

من يرد دموع عيني من يعوضني سنيني
من يقول الحب ما يحتاج له عهد وكفاله

جعل يسقى يوم قال انك ترا مني وفيني
اشهد اني بالمحبه صدق قدّمت استقاله

لا طريق ولا خيار ولا وسيله في يديني
غير لا شفته أقفّي وابتعد وأقطع وصاله

#سيف_الشعر ✍🏻
#شعر

[سيف الشعر @i27znn]

سلامي يا عشيري جاي لك من واحدٍ مقتول
طعنته والجروح القاتلة جات من صوبك

تلفّت وارتجف، صحا من سكرته مخذول
لقى يمناك من دمه تغيّر لونها وثوبك

تركته ينزف وروحت، طعنته تتركه معقول؟
توصل صاحبك للموت لا والله محبوبك

ذنوبك واجد وخلك رفع يده وقف ويقول
عسى ربي تعالى يرحمك ويغفر ذنوبك

#سيف_الشعر ✍🏻
#شعر

[سيف الشعر @i27znn]

العيد بكرا والقلوب الحزينه
يالله عساك تبعد الضيق عنها

والصاحب اللي حال بيني وبينه
بعض الجروح اللي تزايد طعنها

يا قلب قل لي بس وينك ووينه
اللي دموعك ما يحسب ثمنها

تحبني كلمة تزيد الغبينه
لا قالها الجاني تزايد غبنها

عيني عساها للرضى والسكينه
ولا انت يا خلي ترى طحت منها

#سيف_الشعر ✍🏻
#شعر

[سيف الشعر @i27znn]

يا صاحبي من حقك إنك ما تعذرني
لكن علي الحرام إنك عليّ غالي

ما هو من طبعك تخليني وتكسرني
وما هو من طبعك تطاوع شور عذالي

مدامك بخير راضي حيل تهجرني
اهجر عساك بخير يا قاطع وصالي

لكن بوصيك طمني وبشرني
لو هي رسالة تجي منك بجوالي

آمالي الفانية تكسرني وتجبرني
يا شين دمع الرجل يا قاطع آمالي

#سيف_الشعر ✍🏻
#شعر

[سيف الشعر @i27znn]

يا صاحبي مشكور يا طيب الفال
تبعد وترجع والفراق يعرفني

ماني بقايل فيك ما هو بينقال
ولا ني بقايل كانك تشوف شفني

صدري من الفرقة ترى شال الأثقال
وانشهد إن البعد والشوق يفني

قلبي كريم وجاي في صدر رجال
وأنا بحذفك قبل منت تحذفني

#سيف_الشعر ✍🏻
#شعر