أبو رينيا

#ResidentEvilRequiem: 6.5/10 ✅ أنا شخص أحب أغلب إصدارات رزدنت إيفل الأخيرة، لكن ريكويم ماهي واحدة منهم. لعبة ما استفادت لا من نجاحات السلسلة، ولا تعلمت من أخطائها. من أضعف أجزاء السلسلة اللي لعبتها، وما تدخل توب 10 ألعاب بقاء لعبتها عموما. ❗️❗️❗️ لا تقرأ المراجعة إذا ما خلصت اللعبة. بداية اللعبة كانت جيدة مع قريس، تقديم وتشويق ممتاز للأحداث القادمة، دار الرعاية تصميمها جيد وهي ذروة اللعبة عموما، لكن بعدها يبدأ كل شي بالانحدار، لدرجة تخليها بمستوى كارثي أحيانا. لهذا السبب كان صعب علي الحكم، إذا عدت اللعبة مستقبلا بالصعوبة العالية (ولو أني ما أنوي ذا الشي حاليا) فهو لأزور دار الرعاية مرة ثانية. طبعا حتى دار الرعاية ماهي المنطقة اللي بتفجر مخ اللاعب من قوة التصميم، هي جيدة جدا لكن ما ترقى للامتياز المعروف بالأجزاء الكلاسيكية، وهذا كافي جدا بالنسبة للعبة رزدنت إيفل حديثة. توزيع أهداف جيد، نظام backtracking مرضي، استكشاف لا بأس به، وفيه جانب حلو من إدارة الموارد، وأعجبتني فكرة الدم واستغلاله بصناعة أمور مختلفة، ولو أنه جانب محدود شوي لكن يضيف متعة للعبة. بعد دار الرعاية، لا مراحل قريس أعتبرها جيدة، ولا مراحل ليون. أما عن قريس فالجميل في دار الرعاية أن الواحد في منطقة واحدة متماسكة، بيشوف فيها اختصارات وفيها تنوع جيد بين المواجهات المباشرة والتخفي الخفيف، وفي هذاك الوقت التخفي ما كان ممل ولو أنه بسيط إلى حد كبير لكنه خيار يلجأ له اللاعب لتوفير الموارد، وأحيانا فيه أكثر من طريقة لتجاوز العقبة الواحدة. المناطق الأخرى خطية لحد القرف، وكل شي فيها كأنه scripted. أماكن ضيقة تمشي فيها الـ stalker بمسارات ثابتة، هي وكل الأعداء الأقوياء المشابهين لها ما بيتجاوزهم اللاعب إلا بطريقة واحدة، وهي بكل بساطة تنتظرها توخر أو تطالع بالجهة الثانية وتمشي، لأنك بالعادة عندك ممر واحد تمشي من خلاله. هل فيه أي نوع من أنواع التصميم هنا؟ حتى مرحلة النفق تصميمها منغلق وتعبان، مافي أي جهد مبذول فيها. الناس تنتقد مراحل ليون وحتى أنا أنتقدها نعم، لكنها بكل صراحة أهون من مراحل قريس اللي بعد دار الرعاية واللي حسيت فيها بملل قاتل بكل أمانة. بداية فقرة ليون في راكون كانت مملة مع مواجهة العنكبوت اللي ما أدري وش الفايدة من وجودها أصلا، لكن تقديم راكون سيتي إخراجيا كان ممتاز. التجول فيها كان حلو بصريا ومن ناحية الفايب، أما تصميميا مجرد 3 أهداف متوزعة تروح لكل واحد تاخذ غرض وترجع. في المنطقة هذي كلها فيه مكانين اثنين حسيت فيهم فكرة شوي مختلفة أو جديدة، وهي المكان اللي أكسر فيه الأرضية وأطيح الزومبيز أو أطيح نفسي، يعني 3 دقايق بس، والمنطقة اللي يقصفوني فيه أربعة زومبيز تقريبا وأنا أحاول أختبئ من طلقاتهم وأقنصهم من بعيد وأتعامل مع الضغط اللي تحت، هذي مواجهة جيدة. الباقي نفس المواجهات تتكرر، اللعبة تبي تقدم أكشن مع ليون لكن تطبيق الأكشن هذا متواضع لأكثر من سبب. رزدنت إيفل 4 سواء الأصلية أو الريميك، يوم صارت لعبة أكشن قدمت تشكيلة أعداء جيدة من البداية، إذا اللاعب عرف يتعامل معاهم تقدم اللعبة مواجهات مختلفة أو أنواع أعداء مختلفين، بالقصر عندك أنواع مختلفين، وحتى في الجزيرة اللي تُعتبر أسوأ منطقة باللعبة فيها أعداء مختلفين ومواجهات مميزة. المواجهات في ريكويم تحس اللي مصممها واحد قاعد يطالع ريزي4 من بعيد، ويحاول ينسخها ويفشل بإعادة تقديم اللي تميزت به (نتكلم عن الريميك في هذي الحالة)، ولهذا الموجود عبارة عن نسخة رخيصة، مع زومبيز أغبياء استهطافهم سهل، خصوصا مع وجود ميكانيك الـ parry اللي هو أسوأ تطبيق شفته لهذا الميكانيك من بين جميع الألعاب اللي لعبتها بدون مبالغة. الـ parry window واسعة جدا، الفأس ما ينكسر أصلا (يتصلح بثانية واحدة)، يمديك حتى تسوي parry للـ lickers، قتال Mr X يعتمد عليه ومع هذا القتال سهل بسبب سعة نافذة الـ parry، أنا أول مرة أحس أن Mr X مخلوق هطف للدرجة هذي. منطقة الـ lickers أثناء اللعب بـ grace تعبانة، قد تكون من أسوأ مراحل التخفي اللي شفتها في حياتي عموما. قد جربت مرة أني أمشي في المكان بينهم وفعلا طلعوا يجلّون كثير والـ tracking عندهم تعبان، التعامل مع بعض أماكنهم بهذا الشكل أصرف من تضييع الوقت بالتخفي. يمكن لو كملت كلام ما بخلص، لهذا بوقف كلام عن موضوع اللعب، وأتطرق للقصة. القصة ما أظن فيه اختلاف على أنها سيئة، السلسلة طبعا معيارها ماهو عالي لكن هذا الجزء تحديدا قدر يتفوق بالسوء على أي شي أتذكره. وين أبدأ ووين أنتهي؟ - الشخصيات غبية، أحيانا غباؤها يفوق الوصف، وأولهم ليون. من بداية اللعبة حصل موقف استغربت منه، كانت قدام ليون امرأة وراها زومبي واضح جدا وكان ليون يقدر يحذّرها منه، لكنه انتظر الزومبي يذبحها قدامه قبل ما يسحب مسدسه حتى. - موقف ثاني غريب، في لقائه الأول مع غيديون لسبب معين ما قدر يتعامل معه؟ جندي خارق حرفيا عنده خبرة طويلة، وما يعرف ياخذ مسافات وينساق عليه بسهولة ويعتقله غيديون بكل بساطة وبدون أي مقاومة؟ - ليون يوم أطلق النار على إيميلي يوم تحولت، ترك Grace ببساطة تقترب من جثتها وتحتضنها وهي وحش حجمه كبير واحتمال أنه ما مات. لكن المضحك أن ليون كان يعتقد أنها ما ماتت أصلا، بنهاية اللعبة ذكر أنه ما أصاب أي عضو من أعضائها الحيوية (لسبب ما)، يعني Grace المفروض وقتها بخطر محدق بعد. - بعد نهاية مشهد "مقتل إيميلي المزيف"، ليون ترك Grace ترحل وحدها بدون ما يرافقها ولو لخارج المبنى على الأقل؟ شافها زعلانة وتركها خلاص؟ - عاد Grace هنا حكاية ثانية، يوم شافت غيديون أمامها (الشخص اللي المفروض وقتها من المتسببين بكل المآسي والفوضى الحاصلة)، بدل ما تهرب منه أو تنادي ليون اللي على بعد أمتار وراها تقعد تاخذ وتعطي وترافقه هو ونسخة ويسكر؟ تترك ليون عشانه على أساس قتل إيميلي وبالنهاية تروح للجماعة اللي هم متسببين بتحولها من الأساس؟ أي نوع من المنطق كان يشتغل هنا؟ طبعا هذي بعض المواقف، ويا كثر المواقف اللي تدل على أن كتّاب هذي اللعبة كانوا سكرانين، فيه هبدات صُغرى تصير وسط اللعب، مثل أن Grace حرفيا سوت عملية وزرعت أعضاء لزومبي عشان تاخذ السوار اللي عليه وهي كان يمديها تقص الربطة بسكين وتاخذه وخلاص بدون كل اللف والدوران هذا، اللعبة تبي تحدد لك أهداف لكن ما تعطيك سياق مقنع لكثير من الأشياء اللي تصير وسط اللعب وتبرر ليش أنت لازم تسوي كذا أو كذا. بالقصة متعجب أيضا أنهم خلوا شخصية مثل سبنسر عبارة عن تائب، وحنا ندري أنه أساسا مات وهو ما تغير فيه شي، لكن اللعبة تبي تروي رواية مختلفة. اللعبة قررت تتخذ مسار الفيلين التائب، ترند قبيح منتشر من فترة طويلة بين كتّاب الميديا عموما سواء ألعاب أو غيره، وما توظف بشكل زين باللعبة هذي لأنه يناقض شخصية سبنسر اللي نعرفها لين مات. وبخصوص نسخة ويسكر؟ وش فايدته باللعبة ذي؟ أليسا بإيش استغلوا وجودها في اللعبة؟ أساسا هل فيه فيلين واحد صاحي بهذا الجزء؟ بكل أمانة نص الشخصيات إذا مب كلهم مدري بإيش خدموا قصة اللعبة أو وش أضافوا لها، حتى توظيف ليون كان سيئ. الجانب التقني طبعا لا غبار عليه، أداء ممتاز ومظهر ممتاز وقابلية تخصيص حلوة لأصحاب الكروت من جميع الفئات. لكن بتكلم عن الجانب التقني بالتفصيل بعدين. أنا عطيت اللعبة 6.5/10، هذا التقييم يشمل امتياز الجانب التقني. أتمنى ناكانيشي ما عاد يسوي لعبة رزدنت إيفل، وشكرا.