لين راحت وراح .. القلب وياها
قلب سلطان مير الحب سلطاني
حطته كنّه الخاتم بيمناها
مثل خاتم نبي اللّٰه سليماني
وكل طعنه من الغالين حياها
قد ذبحني غلاه العام واحياني
كنت من حبها أكتبها ولا أقراها
مير ذالحين . . تكتبني وتقراني
وأحس إني أرجي شي ما ودّك بطاريه
وأبي القرب وأنت لنيّة الصدّه مبيّت
على راحتك وإن رحت ماني بقايل ليه
تبيها تهيّا فرصة البُعد وتهيّت
وأنا بذكرك لا مرّ عيد وفقدتك فيه
مثل من ذكر بالعيد له غاليٍ ميّت
مع إن كل فرض لا أذن المذّن أصليه
معي ضيقة اللي ما يصليه في وقته
من أول أضحّك واحدٍ عند قبر اخيه
وذا الحين لا واجهني الطرب ضايقته
لا شفت الجماد اسمع وش يقول وأحاكيه
والإنسان ما أفهم وش كلامه لا ناطقته
أعيش الحزن مع كل من يفتقد غاليه
لو أشوف غصنٍ جف ساقيه عانقته