اس کو بھی ہم سے محبت ہو ضروری تو نہیں
عشق ہی عشق کی قیمت ہو ضروری تو نہیں
ایک دن آپ کی برہم نگہی دیکھ چکے
روز اک تازہ قیامت ہو ضروری تو نہیں
صبا اکبر آبادی
تم جاؤ
اور دریا دریا پیاس بجھاؤ
جن آنکھوں میں ڈوبو
جس دل میں اترو
میری طلب آواز نہ دے گی
لیکن جب میری چاہت
اور مری خواہش کی لو
اتنی تیز اور اتنی
اونچی ہو جائے
جب دل رو دے
تب لوٹ آنا
فرازؔ
کئی برس سے ہے ویران مرغزار شباب
اب التفات کے بادل برس رہے ہیں کیوں؟
یہ بوندیاں، یہ پھواریں، یہ رس بھرے جھونکے
توقعات کی نعشوں کو ڈس رہے ہیں کیوں؟
قاسمی
تمہیں جب کبھی ملیں فرصتیں مرے دل سے بوجھ اتار دو
میں بہت دنوں سے اداس ہوں مجھے کوئی شام ادھار دو
کسی اور کو مرے حال سے نہ غرض ہے کوئی نہ واسطہ
میں بکھرگیا ہوں سمیٹ لو میں بگڑ گیا ہوں سنوار دو
اعتبار ساجد
کہتے ہیں کہ اب ہم سے خطا کار بہت ہیں
اک رسم وفا تھی سو وفادار بہت ہیں
لہجے کی کھنک ہو کہ نگاہوں کی صداقت
یوسف کے لیے مصر کے بازار بہت ہیں
ہر جذبۂ بے تاب کے احکام ہزاروں
ہر لمحۂ بے خواب کے اصرار بہت ہیں
پلکوں تلک آ پہنچے نہ کرنوں کی تمازت
اب تک تو اداؔ آئنہ بردار بہت ہیں
ستم ایجاد کے انداز ستم تو دیکھو
امتحاں عشق و ہوس کا یہ نیا رکھا ہے
ہر گھڑی عاشق مضطر سے وہ ملتی ہے شبیہ
نقشہ بگڑی ہوئی صورت کا بنا رکھا ہے
شکوۂ ہجر سے اے داغؔ اثر کی امید
آپ نے نام شکایت کا دعا رکھا ہے
داغ دہلوی