:
يوم الخيال بفكري ايحط ويشيل
عشته بنفس راضيه لا محدوده
فاحت. دلال الشوق فوح المعاميل
وقام الغرام . يحك عوده بعوده
كـن القمر قارب من الارض بالحيل
نوره ظلام الليل شتت بدوده
يشبه جبين ام الرموش المضاليل
اللي لها فالزين بصمه وجوده
فيها جموح الخيل واحلا من الخيل
يـا كثـر ماهـي بالجمال محسوده
والعشق ف المنشا.سحابه مخاييل
يلوح براقه وتـرزم . رعوده
والسمر ريحه خالط البن والهيل
وذعذع من الغربي ذعاذيع نوده
ياليل خلك ثالث ثنين ياليل
وظلامـك الدامس لاتطلق قيوده
اثر الهواء مثل ماقالو بهاذيل
عانوا مصاديره. وعانو وروده
العام اسلي خاطري بالتعاليل وفالمجتمع شخصي مسجل وجوده
واليوم متغير. عن الامس بالحيل
المجتمع مـا عـاد اداني. وفوده
ماارتاح لين امر هاك المداهيل
وذيك الفجوج وشايب عنده ذوده
منصـى وملفى للرجال المشاكيـل
عــودٍ مثل وبل ا لمخاييل جــوده
اي والله ان الضيق عن صدري يزيل
بـ جو خلا واهل العـزب ما تروده
وسحر الطبيعه مايبي له تفاصيل
قدام عينك مـا ثلاتٍ شهوده
وادي وتوه جارحٍ بطنه السيل
وظلع هبوب النود تصفق حيوده
ومعالم يرقب لها الجدي وسهيل
تعلـم الـرجال مـاضـي جـدوده
وان قامت الذكرى تجر المواويل
وقام الهواء يقسم تقاسيم عوده
مانيب للبرق المقفي من يخيل
والصدر مابيـّح بخافي سدوده
مبعد ولا استقبل ولا ارسل مراسيل
يوم اكثر الأحلام ماهي محموده
بندر الحافي