؏

﴿ رَبِّ اغْفِرْ لِي وَلِوَالِدَيَّ ﴾

[؏ @ixq]

سامح الله من خَذا مني هدوّي وارتياحي
لين حدّني على بعض الامور .. اللي ماابيها

مرحله مدري متى تعتقني ، وتطلق سراحي
ما قدرت آعيشها ولا أنتقل لـ اللي يليها

لو تساعدني خطاوي رجلي .. بحزة مراحي
من يساعدني على روحٍ يدب الشوق فيها

[؏ @ixq]

انا موطنك الاصلي لو كتب لك عنه الترحال
وقبلك راحلين ومن بغى يرحل بعد يمديه

ياجعلك ما تذكرني ولكن لا لحقك الحال
تذكرني وانا وياك تحت الله وبين ايديه .

[؏ @ixq]

أقوي عزومي كن ماعاد عندي فيه
وانا والله اني مونسٍ البـلا و أكنـاه .

[؏ @ixq]

ارتحت من حبك ورجوى وصالك
وارتحت من كثرة محاتات فرقاك

وارتحت من كثر انتظار اتصالك
ومن حفظ جدول يومك وقت ممساك

جداً طبيعي يوم جابوا مجالك
ابشرك قلبي بدا صدق ينساك

اسلم وسلم جمل الله حالك
قلبي خلص والحب والشوق يفداك

ما أقول ما حاولت أدور بدالك
حاولت بس شلون في غيرك القاك ؟

[؏ @ixq]

كثر ما أشتبهت الأحلام في عيني رؤىَ و اضغاث
كثر ما أشتقت أعلّمك بظروفي و آخذ بشورك

[؏ @ixq]

مانيب مجبور اخاطب على قد العقول
والله إن بعض القناعات عندي مهملة

الكلام تشوفه الناس حل من الحلول
مثل ما اشوف التجاهل يحل المشكلة

[؏ @ixq]

طفل الوله شاب راسه ، وانهـدم حيله
شف من متى مانعه ، لا يطري عيونك

تسمح لي اعيش بك في بالي الليله ؟
بعض الليالي ، قهر تنعاش من دونك

[؏ @ixq]

عطيته سنين وقلب وابيات ما تنعاف
ورجّع لي ابياتي . . ولا رجّع الباقي

[؏ @ixq]

عداك الملام وشرهة الولف يانزّاح
عن دياري اللي مانت باول خسايرها

تبعت السراب الين سلّمك للمرواح
ولدّيت وعيونك تزوّر عبايرها

مشاعر غلاك امسح بها دمعة التمساح
وخذها وعطها واحد مايقدرها

قنعت وتركتك للزمن والزمن فضاح
على مهله اسرار المخاليق يظهرها

بقى لك معي ذكرىً ليا غمّض المرتاح
تمشط بقايا كبدي ب روس اظافرها

[؏ @ixq]

لا صار الغياب مجريّ الناعسات السود
تصير الضلوع الناحله مسرح اجرامي

لو إن لـ الحزن و مجاهد الذاكره مردود
بعد كل غصة شوق الأقيك قدامي

من المؤسف انك لا انت غايب ولا موجود
و من المخذل انك تحسب غيابك إلزامي

لا زادت مشاريهي على دورك المفقود
يوقف بدالك قلبي " بـ مهنة محامي "

[؏ @ixq]

لا اقفيت مالك علينا غير تذكر بخير
ولا ندقق من اللي طاب واللي جحد
ㅤ
وكانك تفكر وش اللي فالنهايه يصير ؟
من النهايه .. ترانا ما نفكر فـ احد .

[؏ @ixq]

لبست لك ثوب من القسى ما لاق لك
وأنا أعرفك أقسى إنفعالاتك ( بكاك ) .

[؏ @ixq]

عفى الله عن كلامٍ في حنايا الصدر ماينقال
تركته لـ الزمن لو هو ثقيل و جمرته حيّه

وعفى الله عن همومٍ ما تخلي مستريح البال
يعيش أيام عمره في صفا ذهن و صفا نيّه

وعفى الله عن هواجيسٍ توقف بي على الاطلال
تعيـد الذكـريـات اللي مـع الأيـام منسيّـه

[؏ @ixq]

على كثر الشعور اللي ذبح صدري عجزت أبوح
ياليت الشعر يستلّ الشعور اللي ذبح صدري

أنا روحٍ غدت في غيهب الدنيا تدور روح
وأنا دوحٍ تشفق للرِشاش و نايح الكدري

أدوّر بين كوم الذكريات الأولات مزوح
عساي ألقى بها ما ينتعش منها ورق سدري

و أجي و أروح في دربي ولا أدري ليه أجي و أروح
مثل ما ارسم حروفك في ضباب الجام دون ادري

بعيدي وأنت كنت الأوضح لعيني و الأكثر ضوح
والأقرب لي من قلوب الاوادم فوقي و حدري

والأبعد من ظنون السو و الأعلى في حشاي صروح
والأطيب من شذا النوّار و أنقا من ضيا بدري

قبل تستبدل ايدين الغرام الحانية بجروح
و تستسهل مدا صبري الحليم و تشتهي غدري

فقدتك صح لكن ما ترك لي جرحك المفتوح
حنين إلا يوريني مساومته على قدري

ملام عيوني أكبر من ملامة حرفي المذبوح
لو إن اللوم كله لي على إسرافي لك و هدري

بتفقدني ليا من بلّ دمعك شالك المطروح
ولا عيّنت حولك من يحنّ النعس الخدري

وترجع لي تشيلك حسرتك شيل البحر للوح
وأغني لك وأنا مشتاق لك ماعاد به بدري

ما والله تدخل لقلبي لو إن قلبي سفينة نوح
عقب ما جاك مصفيه الهيام و صرت له جدري

تهنى فالحياة الناقصة يالناقص المملوح
عليك أنت و على الأيام يا كثري و يا ندري

[؏ @ixq]

" لو الاكسجين يشوف نفسه علينا
يمكن من العزّة ما عاد انتنفّس"

[؏ @ixq]

تموت جروحنا مادرىّ عن نزفها مخلوق
مقابرها الضلوع وعزة النفس تدفنها

[؏ @ixq]

إلهِيّ وقفت بباب رحمتك ذلّ وخوف
كبير الرجا وذنوبي كبار وانت اكبر

كرهت الخجل من كثر ما اعصيك وانت تشوف
وجيتك وانا المتوجلّ الاشعث الاغبر

[؏ @ixq]

انت داري اني بوضعك يوم قفيت ادرى
لا تلبس غيبتك ثوب بدون اكمامي

انشغل واهتم في امور الحياة الاخرى
الغلا والود تقديري مهوب الزامي

ومد خطواتك خلا مسراح ولا مسرى
ذا قرارك والعدود آلاف وانت الظامي

[مسلط ابن الحميدي @muslat88]

اكثر اللي ضيّق اخلاقي وفوّر دمّي
موقفٍ يوم القيامة ماحسبت حسابه
.
مقدر اعطي حسنةٍ وحدة لبويه وامّي
واعطي اللي كنت ماحبّه وكنت اغتابه

[؏ @ixq]

صاحبي راحت سنين العمر غبرً ، سرمديه
وش تبقى من سنين العمر والوقت يحداها

الديار دهور مافيها ما ترعاه .. المطيه
والحظوظ مكوعه والنار تحرق من وطاها

كل ما ربي فتح باب ولقينا فيه ( فّيه )
ماخذينا ألا علينا ترفع الدنيا عصاها

ليه ؟ كيف ؟ وشلون ؟ واصبحنا جناه بلا قضيه
الخطا منها وحنا اللي تحملنا .. خطاها

لـ الشقى فـ وجيهنا تعريف تقراه البريه
والسعاده ماتفيد اللي بديناره شراها

كم تعرضنا المضامي والديار الجرهديه
والفياض الخضر مانقدر ندوج في حماها

خطوةً في راس داب و خطوةً في راس حيه
وهقتنا دروبنا لعلهاااا ولا .. عساهااا

مابقى في جدول الرحلات رحله موسميه
كل رحله تلعن اللي قبلها واللي وراهاا .