ليه مريض السرطان نادرا ما بيفكر ينهي حياته، ومريض الاكتئاب ممكن؟
مش عشان وجع السرطان اخف، بالعكس، ده وجع بيموت.
الفكرة كلها في حاجة واحدة: مين مصدقك؟
مريض السرطان، اول ما يقول انا تعبان، الدنيا كلها بتتقلب عشانه.
اهله جنبه، صحابه بيسألوا، الدكتور متابعه، والناس كلها بتقوله "سلامتك، احنا معاك، هتعدي".
وجعه متشاف، فالناس بتحترمه.
انما مريض النفسي؟
بيقول انا تعبان، بيترد عليه:
"بطل دلع"
"انت ناقصك ايه يعني؟"
"ما انت بتضحك اهو"
"قرب من ربنا شوية وهتبقى كويس"
فبيسكت. بيعيش الوجع لوحده. بيحس انه لوحده ومحدش فاهمه، وان حتى وجعه مش حقيقي، وده اللي بيوصله انه يحس انه تقيل على اللي حواليه، وان وجوده ملوش لازمة.
المرض النفسي مش دلع، ومش ضعف ايمان، ومش هزار.
ده مرض زي اي مرض، بس الفرق انه مش باين في تحليل ولا اشعة، فالناس بتستسهل وتكذبه.
لو حواليك حد بيقولك انا مخنوق، انا تعبان نفسيا، متقولوش الكلام المحفوظ ده.
اسمعه بس. صدقه. قوله "انا معاك، ومصدقك".
ممكن الكلمة دي هي اللي تمنعه انه يوصل لمرحلة انه يفكر يأذي نفسه.
متسيبوش حد يضيع لمجرد ان مرضه مش متشاف.