غديت أدورني بزحمة أفكاري
كني سؤالٍ عجزت ألقى له إجابه
يا غربة الروح طال الدرب بمساري
والعمر يجري ولا أدري وش غدابه
متى على اللّٰه تضوى لي أنواري
وألقى الطريق اللي انكتب لي بابه
وأشوفني بحلم الهنا وأجمل أقداري
أقطف زهور الحظ عقب الخوف وانيابه
أغلى مقادير عمري وأصدق أماله
الله يديم الرضى .. ونعيش في ظلّه
أدور اللي يسرّك و أتعنى له
وأقدم العمر لك وأقول يا قلّه
لي عمر محدٍ وقف قبلك على جاله
ولك قدر محدٍ قدر فالناس يوصل له
لا قالوا الماضي أجمل قلت من قاله !
الأجمل أنت و عقبال العمر كله
الطير قبل يطير تسمع رفيفه
والشمس قبل تغيب يتفرق النور
والغيم قطراته لو إنها نظيفة
تتعكر ليا خالطت عشب وقفور
والذيب ما تغريه بالصيد جيفه
والظبّي من ظله يعافر ومذعور
والقمة اللي بالجبال المنيفة
تصعد لها ساقي لو العظم مكسور
وكل يروح ويترك أثار طيفه
وكل يقول إنه على البُعد مجبور
يارب من غيرك من الشر يحماه
طوّل بعمر أبوي لو أخذت روحي
يا أبوي لك وجه الرضا مرخصً ماه
وأرخصت لك قبله عيوني و روحي
قلبي على طاريك لبى من أقصاه
وتركد بك أعصابي و تبرأ جروحي
ما مر بي من عزّ كيف أقدر أنساه
وأنت الكرم منك يشيّد صروحي